പതിമൂന്നാം നിയമസഭയുടെ അവസാന സമ്മേളനത്തിന് ഗവര്‍ണറുടെ നയപ്രഖ്യാപന പ്രസംഗത്തോടെ ഇന്നു തുടക്കമായി. ഇന്നു രാവിലെ ഒന്‍പതിനാണു ഗവര്‍ണര്‍ ജസ്റ്റീസ് പി. സദാശിവം നയപ്രഖ്യാപന പ്രസംഗം നടത്തുന്നത്. ഇതോടൊപ്പം തെരഞ്ഞെടുപ്പു ലക്ഷ്യമിട്ടു സര്‍ക്കാരിനെ പ്രതിരോധത്തിലാക്കാനുള്ള വിഷയങ്ങളുമായി പ്രതിപക്ഷവും രംഗത്തെത്തും.

പ്രതിപക്ഷം പ്രതിഷേധവും ബഹളവും ബഹിഷ്‌കരണവുമൊക്കെയായി മുന്നോട്ടുപോകുമെങ്കിലും കഴിഞ്ഞ വര്‍ഷത്തേതു പോലുള്ള അക്രമത്തിലേക്കു നീങ്ങില്ലെന്നാണു സൂചന. കഴിഞ്ഞ ദിവസം എല്‍ഡിഎഫ് നേതാക്കള്‍ ഗവര്‍ണറെ കണ്ട്് നയപ്രഖ്യാപനത്തില്‍ നിന്നു വിട്ടുനില്‍ക്കണമെന്ന് അഭ്യര്‍ഥിച്ചിരുന്നു. എന്നാല്‍, ഭരണഘടനാ പരമായ ബാധ്യത നിറവേറ്റാതിതിരിക്കാന്‍ കഴിയില്ലെന്നു ഗവര്‍ണര്‍ മറുപടി നല്‍കുകയും ചെയ്തു. ഇന്നു രാവിലെ ഇടതുമുന്നണി നിയമസഭയ്ക്കു പുറത്തും സമരം പ്രഖ്യാപിച്ചിട്ടുണ്ട്. രാവിലെ നിയമസഭാ മാര്‍ച്ച് നടത്തും.
വരുന്ന 12നാണു ബജറ്റ് അവതരണം. ധനവകുപ്പിന്റെ ചുമതലയുള്ള മുഖ്യമന്ത്രി ഉമ്മന്‍ ചാണ്ടിയാകും ബജറ്റ് അവതരിപ്പിക്കുക. അങ്ങനെയെങ്കില്‍ രണ്ടര പതിറ്റാണ്ടിനു ശേഷമാകും ഒരു മുഖ്യമന്ത്രി ബജറ്റ് അവതരിപ്പിക്കുന്നത്. 1987 ല്‍ മുഖ്യമന്ത്രിയായിരുന്ന ഇ.കെ. നായനാര്‍ ബജറ്റ് അവതരിപ്പിച്ചിരുന്നു. സോളാര്‍ ആരോപണം നേരിടുന്ന മുഖ്യമന്ത്രി ഉമ്മന്‍ ചാണ്ടി ബജറ്റ് അവതരിപ്പിക്കുന്നതിനെതിരേയും പ്രതിപക്ഷ പ്രതിഷേധമുണ്ടാകും.

ബാര്‍ കോഴ വിവാദത്തിനു പുറമേ സോളാര്‍ കേസിലെ വെളിപ്പെടുത്തലുകളും കൂടി ചേര്‍ന്ന അവസ്ഥയിലാണു നിയമസഭ ഇന്നു തുടങ്ങുന്നത്. അതേസമയം, ലാവ്‌ലിന്‍ കേസ് ഉള്‍പ്പെടെയുള്ള വിഷയങ്ങള്‍ പ്രതിപക്ഷത്തിനു നേരേ തൊടുക്കാനുള്ള ആയുധമായി ഭരണപക്ഷവും ഉപയോഗപ്പെടുത്തുമെന്നാണു സൂചന.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha