കേരളത്തില്‍ ഇത്തവണ ഭരണത്തുടര്‍ച്ചയുണ്ടാകുമെന്ന് കോണ്‍ഗ്രസ് പ്രവര്‍ത്തക സമിതിയംഗം എ.കെ. ആന്റണി. കേരളത്തിന്റെ നല്ല ഭാവിക്ക് യുഡിഎഫ് വീണ്ടും അധികാരത്തില്‍ വരണം. വിവാദങ്ങള്‍ യുഡിഎഫിന്റെ സാധ്യതകളെ ബാധിക്കുമെന്ന് കരുതുന്നില്ല. ഒരു വിഷയത്തിന്റെ അടിസ്ഥാനത്തില്‍ മാത്രമാകില്ല ജനങ്ങളുടെ വിധിയെഴുത്ത്. സര്‍ക്കാരിന്റെ വികസന നേട്ടങ്ങള്‍ ജനം തിരഞ്ഞെടുപ്പില്‍ വിലയിരുത്തും. കേരളത്തിലെ ജനങ്ങളുടെ കുത്തക ഒരു രാഷ്ട്രീയ പാര്‍ട്ടിയും ഏറ്റെടുക്കേണ്ട. ഇനിയുള്ള മൂന്നു മാസം എല്ലാ വിഷയവും ജനങ്ങളുടെ ചര്‍ച്ചയ്ക്ക് വയ്ക്കാനുള്ള അവസരമാണ് ഒരുക്കേണ്ടതെന്നും ആന്റണി പറഞ്ഞു.
ഉമ്മന്‍ചാണ്ടിയുടെ കാലത്തുണ്ടായ വികസനം കേരളത്തില്‍ ഒരു സര്‍ക്കാരിന്റെ കാലത്തും ഉണ്ടായിട്ടില്ല. യുഡിഎഫ് ഭരണം തുടങ്ങിയപ്പോഴുണ്ടായ അവസ്ഥയല്ല ഇപ്പോഴുള്ളത്. ബിജെപിക്ക് കേരള ഭരണത്തിന്റെ അയല്‍പ്പക്കത്ത് എത്താനാകില്ലെന്നും ആന്റണി പറഞ്ഞു.
പ്രതിപക്ഷത്തിന്റെ ആവശ്യപ്രകാരമാണ് സോളര്‍ കമ്മിഷനെ നിയോഗിച്ചത്. കമ്മിഷന്‍ റിപ്പോര്‍ട്ട് പുറത്തുവരുന്നതുവരെ പ്രതിപക്ഷം കാത്തിരിക്കണം. അതിനുള്ള ക്ഷമ അവര്‍ കാണിക്കണം. കമ്മിഷന്‍ റിപ്പോര്‍ട്ടിന്റെ അടിസ്ഥാനത്തില്‍ കുറ്റക്കാര്‍ക്കെതിരെ നടപടിയെടുക്കണം. അല്ലാതെ ഒരു പ്രതിയുടെ മൊഴിയുടെ അടിസ്ഥാനത്തില്‍ മാത്രം സര്‍ക്കാര്‍ രാജിവയ്ക്കണമെന്നു പറയുന്നത് ശരിയല്ല. പ്രതിയുടെ മൊഴി കേട്ട് തീരുമാനങ്ങളെടുക്കാനാവില്ലെന്നും ആന്റണി അഭിപ്രായപ്പെട്ടു.
ഒരു പ്രതിയുടെ സാക്ഷി മൊഴിയുടെ പേരില്‍ ഈ കോലാഹലമുണ്ടാക്കുന്നവര്‍ അവര്‍ പറയുന്ന ഏതെല്ലാം ഭാഗങ്ങള്‍ സ്വീകരിക്കണമെന്നും തള്ളിക്കളയണമെന്നും പറയണം. 10 കോടിയും വീടും മുഖ്യപ്രതിപക്ഷ കക്ഷി വാഗ്ദാനം ചെയ്‌തെന്നു പറഞ്ഞതും അവര്‍ തന്നെയാണ്. അതും ജനങ്ങള്‍ വിശ്വസിക്കണമോ? സര്‍ക്കാര്‍ രാജിവച്ച് പ്രസിഡന്റ് ഭരണത്തിന്‍ കീഴില്‍ തിരഞ്ഞെടുപ്പ് നടത്തണമെന്നു പറയുന്ന പ്രതിപക്ഷത്തിന് കേന്ദ്രം ഭരിക്കുന്ന ബിജെപിയില്‍ അത്ര വിശ്വാസമാണോ എന്നു വ്യക്തമാക്കണമെന്നും ആന്റണി ആവശ്യപ്പെട്ടു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha