പിണറായി വിജയന്‍ നയിക്കുന്ന നവകേരളമാര്‍ച്ച് നാളെ തിരുവനന്തപുരത്ത് സമാപിക്കും. വൈകിട്ട് അഞ്ചിന് ശംഖുംമുഖത്ത് നടക്കുന്ന പൊതുസമ്മേളനം സി.പി.എം ജനറല്‍ സെക്രട്ടറി സീതാറാം യച്ചൂരി ഉദ്ഘാടനം ചെയ്യും. പിണറായി വിജയന്റെ മുഖ്യമന്ത്രി പദവിയിലേക്കുള്ള വിളംബരമായിരുന്നു ഒരുമാസം നീണ്ടുനിന്ന നവകേരള മാര്‍ച്ച്. 

നിയമസഭാതിരഞ്ഞെടുപ്പിന്റെ അരങ്ങൊരുക്കമായിരുന്നു സി.പി.എമ്മിന് നവകേരളമാര്‍ച്ച്. അടുത്തഭരണം തന്നെയായിരുന്നു ജാഥാനായകന്റെ വാക്കുകള്‍ നിറയെ. എന്നാല്‍ ലാവലിന്‍ കേസ് വീണ്ടും സജീവമാക്കിയുള്ള ഹൈക്കോടതി ഇടപെടല്‍ തുടക്കത്തിലെ കല്ലുകടിയായി. ലാവലിന്‍ വിഷയത്തില്‍ മറുപടിയില്ലെന്ന പിണറായിയുടെ നിലപാട് വി.എം.സുധീരന്റെ തുടര്‍ച്ചയായ ആരോപണങ്ങളില്‍ തട്ടിത്തകര്‍ന്നു. ഒടുവില്‍ പി.ജയരാജന്റെ കീഴടങ്ങല്‍ വരെ ജാഥ കടന്നുപോയ പ്രതിസന്ധികള്‍ നിരവധിയാണ്. പിന്നെ, മുഖ്യമന്ത്രിക്കും സര്‍ക്കാരിനുമെതിരായ ആരോപണങ്ങളിലായിരുന്നു ശ്രദ്ധ അത്രയും. ഓരോ പ്രദേശത്തേയും പ്രമുഖരെ സന്ദര്‍ശിച്ച് പിന്തുണ ഉറപ്പാക്കാനും പിണറായിക്ക് സാധിച്ചു. ശംഖുമുഖത്ത് നടക്കുന്ന സമാപനം ചരിത്രമാക്കാനുള്ള ശ്രമത്തിലാണ് സംഘാടകസമിതി. മൂന്നുലക്ഷം പേരെ പൊതുസമ്മേളനത്തില്‍ അണിനിരത്തുമെന്നാണ് അവകാശവാദം. 

പാര്‍ട്ടിക്കൊപ്പം നിലയുറപ്പിച്ചിരിക്കുന്ന വി.എസ്.അച്യുതാനന്ദന്റെ സാന്നിധ്യവും സമാപനത്തിന് ഉറപ്പുവരുത്തിയിട്ടുണ്ട്. പാര്‍ട്ടിക്കുള്ളിലെ ഐക്യം നവകേരളാമാര്‍ച്ചിലൂടെ ഊട്ടി ഉറപ്പിക്കാനായെന്ന ആത്മവിശ്വാസത്തിലാണ് സി.പി.എം. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha