മമ്മൂട്ടിയുടെ പേരില്‍ മോഹന്‍ലാല്‍ ശബരിമലയില്‍ വഴിപാട് കഴിപ്പിച്ചതിനെതിരെ രൂക്ഷ വിമര്‍ശനമാണ് പ്രമുഖ മാദ്ധ്യമപ്രവര്‍ത്തകനും രാഷ്ട്രീയ നിരീക്ഷകനുമായ ഒ അബ്ദുള്ള നടത്തിയത്. എന്നാല്‍ അബ്ദുള്ളയ്ക്കെതിരെ സോഷ്യല്‍ മീഡിയയില്‍ രൂക്ഷ വിമര്‍ശനമാണ് ഉയരുന്നത്. മുസ്ലീം സമുദായത്തിന്റെ ഒസിയത്ത് നിങ്ങള്‍ക്ക് ആരാണ് എഴുതിത്തന്നതെന്ന് സോഷ്യല്‍ മീഡിയ ചോദിക്കുന്നു. ഇത്തരം നീര്‍ക്കോലികളുടെ പ്രസ്താവന അര്‍ഹിക്കുന്ന അവഗണനയോടെ തള്ളിക്കളയണമെന്നും ഇതൊരു സുവര്‍ണ അവസരമായി ആരും കാണരുതെന്നും ഒരു ഉപയോക്താവ് കുറിച്ചു.

ശബരിമലയില്‍ വഴിപാട് അര്‍പ്പിച്ചത് മമ്മൂട്ടിയുടെ അറിവോടെയാണെങ്കില്‍ അത് വിശ്വാസ പ്രകാരം തെറ്റാണെന്നും മമ്മൂട്ടി തൗബ ചെയ്യണമെന്നും ഒ അബ്ദുള്ള സോഷ്യല്‍ മീഡിയയില്‍ പങ്കുവച്ച ശബ്ദസന്ദേശത്തില്‍ പറയുന്നു. മമ്മൂട്ടിക്ക് ആരോഗ്യപ്രശ്‌നങ്ങളുണ്ടെന്ന വാര്‍ത്തകളെ തുടര്‍ന്നാണ് ശബരിമലയില്‍ എത്തിയ മോഹന്‍ലാല്‍ അദ്ദേഹത്തിന് വേണ്ടി ഉഷഃപൂജ നടത്തിയത്. ഇതിന്റെ റെസിപ്റ്റ് അടക്കം സോഷ്യല്‍ മീഡിയയില്‍ പ്രചരിച്ചിരുന്നു. ഇതോടെയാണ് പ്രതികരണവുമായി ഒ അബ്ദുള്ള രംഗത്തെത്തിയത്.

'മമ്മൂട്ടിയുടെ അറിവോടെയാണെങ്കില്‍ മമ്മൂട്ടി തൗബ ചെയ്യണം. മുസ്ലീം സമുദായത്തോട് മാപ്പ് പറയണം. ഗുരുതരമായ വീഴ്ചയാണ് മമ്മൂട്ടിയെന്ന കലാകാരനില്‍ നിന്നുണ്ടായത്. മമ്മൂട്ടിയുടെ അറിവോടെയല്ല മോഹന്‍ലാല്‍ വഴിപാട് ചെയ്തതെങ്കില്‍ തെറ്റില്ല. കാരണം മോഹന്‍ലാലിന്റെ വിശ്വാസം അത്രത്തോളമുണ്ടാകും ശബരിമല ശാസ്താവിനോട്. ആ വിശ്വാസത്തിന്റെ അടിസ്ഥാനത്തിലായിരിക്കാം ചെയ്തത്. എന്നാല്‍ മമ്മൂട്ടി പറഞ്ഞ് ഏല്‍പ്പിച്ചിട്ടാണ് അത് ചെയ്തതെങ്കില്‍ അത് മഹാ അപരാധമാണ്. കാരണം, ഇസ്ലാം വിശ്വാസ പ്രകാരം അള്ളാഹുവിനല്ലാതെ ഒരു വഴിപാടും നടത്തരുത്. ഇത് ലംഘനമാണ്'- ഖുറാന്‍ സൂക്തങ്ങള്‍ ഉദ്ധരിച്ച് അബ്ദുള്ള പറഞ്ഞു. ഇക്കാര്യത്തില്‍ മമ്മൂട്ടിയുടെ വിശദീകരണം ആവശ്യമാണെന്നും മുസ്ലീം മതപണ്ഡിതന്മാര്‍ ഈ വിഷയത്തില്‍ ഇടപെടണമെന്നും അബ്ദുള്ള ആവശ്യപ്പെട്ടു.