സോണിയ ഗാന്ധിക്കും രാഹുലിനും എതിരായ ഇഡി കുറ്റപത്രം പ്രതികാര നടപടിയെന്ന് ഡിഎംകെ
നാഷണല് ഹെറാള്ഡ് കേസില് സോണിയ ഗാന്ധിക്കും രാഹുല് ഗാന്ധിക്കും എതിരെയുള്ള എന്ഫോഴ്സ്മെന്റ് ഡയറക്ടറേറ്റ് (ഇഡി) കുറ്റപത്രം അംഗീകരിക്കാനാവാത്തതെന്നും ലജ്ജാകരമെന്നും ഡിഎംകെ. ബിജെപിയുടെ പ്രതികാര നടപടിയാണിത്. വഖഫ് ഉള്പ്പെടെയുള്ള വിഷയങ്ങളില് പ്രതിഷേധം ശക്തമാക്കിയ കോണ്ഗ്രസിനെതിരെ ഇഡി ഉള്പ്പെടെയുള്ള അന്വേഷണ ഏജന്സികളെ കേന്ദ്രം കെട്ടഴിച്ചുവിട്ടിരിക്കുകയാണെന്നും ഡിഎംകെ ട്രഷററും പാര്ലമെന്ററി പാര്ട്ടി നേതാവുമായ ടി ആര് ബാലു ആരോപിച്ചു.
നടപടിയെ ഡിഎംകെയുടെ പേരില് ശക്തമായി അപലപിക്കുന്നുവെന്നും ടി ആര് ബാലു പാര്ട്ടി പ്രസ്താവനയിലൂടെ വ്യക്തമാക്കി. 'ഗുജറാത്തില് അടുത്തിടെ നടന്ന എഐസിസി യോഗത്തില് കേന്ദ്രത്തിന്റെ ജനവിരുദ്ധ പ്രവര്ത്തനങ്ങളെ ഉയര്ത്തിക്കാട്ടിയത് ബിജെപിയെ അസ്വസ്ഥരാക്കി. ഛത്തീസ്ഗഡിലെ റായ്പൂരില് നടന്ന എഐസിസി സമ്മേളനത്തിനിടയിലും ഇഡി റെയ്ഡുകള് നടത്തി.
വഖഫ് ബില്ലിനെതിരെ കോണ്ഗ്രസ് ഉറച്ചുനില്ക്കുന്നതും പ്രതിപക്ഷ പാര്ട്ടികളെ ചേര്ത്തുനിര്ത്തുന്നതും ബിജെപി സര്ക്കാരിനെ അസ്വസ്ഥരാക്കുന്നു. കേന്ദ്ര സര്ക്കാരിന്റെ ജനവിരുദ്ധ സംരംഭങ്ങളെയും അതിന്റെ പരാജയങ്ങളെയും കോണ്ഗ്രസ് ജനങ്ങളിലേക്ക് എത്തിക്കുമെന്ന് അവര് ഭയപ്പെടുന്നു. അതുകൊണ്ടാണ് ഇഡി കോണ്ഗ്രസിനെ ചുറ്റിപ്പറ്റി പ്രവര്ത്തിക്കുന്നത്. കോണ്ഗ്രസ് നേതാക്കളായ സോണിയ ഗാന്ധിയെയും രാഹുല് ഗാന്ധിയെയും അവര് വെറുതെവിടുന്നില്ല. കോണ്ഗ്രസിനെ രാഷ്ട്രീയമായി നേരിടാന് കഴിയാത്തതിനാല് ബിജെപി സര്ക്കാര് ഇഡിയെയും മറ്റ് ഏജന്സികളെയും കെട്ടഴിച്ചുവിടുകയാണ്. ഇത് അംഗീകരിക്കാനാവാത്തതാണ്. ലജ്ജാകരമായ രാഷ്ട്രീയ പ്രതികാരമാണിത്'- ഡിഎംകെ നേതാവ് ടി ആര് ബാലു വിമര്ശിച്ചു.
അതേസമയം, നാഷണല് ഹെറാള്ഡ് കേസില് സിപിഎം നിലപാട് വ്യക്തമാക്കി. ഇഡി ആരെ വേട്ടയാടുന്നുവോ അവര്ക്കൊപ്പമാണെന്ന് സിപിഎം ജനറല് സെക്രട്ടറി എം എ ബേബി വ്യക്തമാക്കി. ഇക്കാര്യത്തില് സിപിഎമ്മിന് രണ്ട് നിലപാട് ഇല്ലെന്നും എം എ ബേബി പറഞ്ഞു.
https://www.facebook.com/Malayalivartha
