അങ്ങനെ അക്കാര്യത്തില്‍ ഒരു തീരുമാനമായി. അവസരം മുതലാക്കി മറ്റൊരു മറുകണ്ടം ചാടല്‍. വളരുംതോറും പിളരുന്ന കേരള കോണ്‍ഗ്രസ് പാരമ്പര്യം ആവര്‍ത്തിക്കുന്നു. കേരള കോണ്‍ഗ്രസ് (എം) വീണ്ടും പിളര്‍പ്പിലേക്ക്. ഫ്രാന്‍സിസ് ജോര്‍ജിന്റെ നേതൃത്വത്തിലുള്ള ഒരു വിഭാഗം നേതാക്കള്‍ പിളര്‍ന്ന് ഇടതുമുന്നണിയിലേക്ക് ചേക്കേറുകയാണ്. തെരഞ്ഞെടുപ്പില്‍ ഇടതുമുന്നണിയുമായി സഹകരിക്കാനാണ് ഇവരുടെ തീരുമാനം. കെ എം മാണിയെ പത്രസമ്മേളനത്തില്‍ ആന്റണി രാജു തള്ളിപ്പറഞ്ഞു.
ഫ്രാന്‍സിസ് ജോര്‍ജിനൊപ്പം ഡോ. കെ.സി ജോസഫ്, ആന്റണി രാജു തുടങ്ങിയവരും പാര്‍ട്ടി വിടുന്നുണ്ട്. പി.ജെ ജോസഫിനൊപ്പം മാണി വിഭാഗത്തില്‍ ലയിച്ചവരാണ് ഇവര്‍. ജോസഫിനെ വിട്ട് വലിയൊരു വിഭാഗം പ്രവര്‍ത്തകരും ഫ്രാന്‍സിസ് ജോര്‍ജിനു പിന്നില്‍ ഇതിനകം അണിനിരന്നുകഴിഞ്ഞുവെന്നാണ് സൂചന. ആരോഗ്യവും ക്ഷയിച്ച്, പാര്‍ട്ടിയില്‍ ഒതുക്കപ്പെട്ട ജോസഫിനൊപ്പം നില്‍ക്കുന്നതിലും നല്ലത് കേരള കോണ്‍ഗ്രസ് സ്ഥാപക നേതാവ് കൂടിയായ കെ.എം ജോര്‍ജിന്റെ മകനൊപ്പം ചേരുന്നതാണെന്ന വികാരവും പ്രവര്‍ത്തകര്‍ക്കുണ്ട്.
ആന്റണി രാജുവും ഡോ.കെ.സി ജോസഫും മുന്‍പ് നിയമസഭയില്‍ എത്തിയവരാണ്. സീറ്റ് ആവശ്യപ്പെട്ട് ഇവരും രംഗത്തെത്തിയിരുന്നു.
2014ലെ ലോക്‌സഭ തെരഞ്ഞെടുപ്പില്‍ ഇടുക്കി സീറ്റില്‍ മത്സരിക്കാന്‍ ഫ്രാന്‍സീസ് ജോര്‍ജ് ആഗ്രഹിച്ചിരുന്നു. എന്നാല്‍ പാര്‍ട്ടിക്ക് മത്സരിക്കാന്‍ ഒരു സീറ്റ് മാത്രം ആവശ്യപ്പെട്ട മാണി അത് മകനു വേണ്ടി മാറ്റിവയ്ക്കുകയായിരുന്നു. ഇടുക്കിയില്‍ മലയോര വികസന സമിതി സ്ഥാനാര്‍ത്ഥിയായി വരെ ഫ്രാന്‍സിസ് ജോര്‍ജിനെ പരിഗണിച്ചിരുന്നു. എന്നാല്‍ എല്‍.ഡി.എഫ് പ്രലോഭനങ്ങളില്‍ വീഴാതെ പാര്‍ട്ടി വിടാതെ പിടിച്ചുനിന്ന ഫ്രാന്‍സിസ് ജോര്‍ജ് നിയമസഭ തെരഞ്ഞെടുപ്പില്‍ ഒരു സീറ്റ് പ്രതീക്ഷിച്ചിരുന്നു. ചില സഭാ അധ്യക്ഷന്മാരുടെ സമ്മര്‍ദ്ദവും പാര്‍ട്ടിയില്‍ തുടരാന്‍ ഫ്രാന്‍സിസിനെ പ്രേരിപ്പിച്ചു.
ഫ്രാന്‍സിസ് ജോര്‍ജ് പാര്‍ട്ടി വിട്ടുവന്നാല്‍ സ്വീകരിക്കുമെന്ന് ഇടതുമുന്നണിക്കൊപ്പമുള്ള കേരള കോണ്‍ഗ്രസ് വിഭാഗം നേതാവായ സ്‌കറിയ തോമസ് വ്യക്തമാക്കി. താന്‍ പിതാവിനെ പോലെ ബഹുമാനിച്ചിരുന്ന കെ.എം ജോര്‍ജിന്റെ മകനായ ഫ്രാന്‍സിസിനെ അനുജനപോലെ കണ്ട് പാര്‍ട്ടിയിലേക്ക് സ്വീകരിക്കുമെന്ന് സ്‌കറിയ തോമസ് അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha