ഇസ്രയേലിലെ ആണവ കേന്ദ്രങ്ങളുള്ള മേഖലകളിൽ ഇറാൻ്റെ മിസൈൽ ആക്രമണം. ആക്രമണത്തിൽ വൻ നാശനഷ്ടം സംഭവിച്ചിട്ടുണ്ടെന്ന് വിവരങ്ങൾ പുറത്ത് വരുന്നുണ്ട്. തെക്കൻ ഇസ്രായേലിലെ ദിമോണ (Dimona), അരാദ് (Arad) എന്നീ നഗരങ്ങളെയാണ് ഇറാൻ ലക്ഷ്യം വെച്ചതെന്നാണ് സൂചന. ഈ ആക്രമണം മൂന്ന് ആഴ്ച പിന്നിടുന്ന യുദ്ധത്തിലെ നിർണ്ണായകമായ ഘട്ടമായാണ് വിലയിരുത്തപ്പെടുന്നത്.

ഇറാൻ്റെ മിസൈലുകളെ തടയാൻ തങ്ങളുടെ പ്രതിരോധ സംവിധാനങ്ങൾക്ക് സാധിച്ചില്ലെന്ന് ഇസ്രായേൽ സൈന്യം സമ്മതിച്ചു. ലക്ഷ്യസ്ഥാനങ്ങളിൽ മിസൈലുകൾ നേരിട്ട് പതിച്ചു. പരിക്കേറ്റ പത്തോളം പേരെ വിവിധ ആശുപത്രികളിലേക്ക് മാറ്റി. പലരുടെയും നില ഗുരുതരമെന്നാണ് വിവരം. 'ടു-സ്റ്റേജ് ഇന്റർകോണ്ടിനെന്റൽ ബാലിസ്റ്റിക് മിസൈൽ' ആണ് ഇറാൻ പ്രയോഗിച്ചതെന്ന് ഇസ്രായേൽ സൈനിക മേധാവി ജനറൽ ഇയാൽ സാമിർ പറഞ്ഞു.

അതേ സമയം വരും ആഴ്ചയിൽ ഇറാനെതിരായ ആക്രമണങ്ങൾ "ഗണ്യമായി വർദ്ധിക്കുമെന്ന്" ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്‌സ് പറഞ്ഞു. മിഡിൽ ഈസ്റ്റിലേക്ക് കൂടുതൽ യുദ്ധക്കപ്പലുകളും മറൈനുകളും അയയ്ക്കുന്നതായി അമേരിക്ക പ്രഖ്യാപിക്കുകയും ലോകമെമ്പാടുമുള്ള വിനോദസഞ്ചാര കേന്ദ്രങ്ങളെ ആക്രമിക്കുമെന്ന് ഇറാൻ ഭീഷണിപ്പെടുത്തുകയും ചെയ്തിട്ടും, മിഡിൽ ഈസ്റ്റിലെ സൈനിക പ്രവർത്തനങ്ങൾ "അവസാനിപ്പിക്കാൻ" ആലോചിക്കുന്നതായി യുഎസ് പ്രസിഡന്റ് ഡൊണാൾഡ് ട്രംപ് പറഞ്ഞതിന് മണിക്കൂറുകൾക്ക് ശേഷം, മിസ്റ്റർ കാറ്റ്‌സ് പ്രതികരണവുമായി രം​ഗത്ത് എത്തി.

ഇറാനിൽ 1,300-ലധികം പേരും ലെബനനിൽ 1,000-ത്തിലധികം പേരും ഇസ്രായേലിൽ 15 പേരും ഈ മേഖലയിൽ 13 യുഎസ് സൈനികരും കൊല്ലപ്പെട്ടു. ലെബനനിലും ഇറാനിലും ദശലക്ഷക്കണക്കിന് ആളുകൾ പലായനം ചെയ്തിട്ടുണ്ട്.