കഞ്ചാവ് വാങ്ങാനായി ദമ്പതികള്‍ എത്തിയത് നാലു വയസുള്ള കുട്ടിയുമായി
കഞ്ചാവ് വാങ്ങാനെത്തിയ ദമ്പതികള്‍ ഉള്‍പ്പെടെ 14 പേരെ ആന്റി നര്‍ക്കോട്ടിക്‌സ് സംഘം പിടികൂടി. ഹൈദരബാദിലെ ഐടി ഹബ്ബായ ഗച്ചിബൗളിയില്‍ ശനിയാഴ്ച നടന്ന ഒരു ഓപ്പറേഷനിലാണ് ഉദ്യോഗസ്ഥര്‍ ഇവരെ പിടികൂടിയത്. നാലു വയസുള്ള കുഞ്ഞിനൊപ്പം ദമ്പതിമാര്‍ കഞ്ചാവ് വാങ്ങാനെത്തിയത് ഉദ്യോഗസ്ഥരെ അമ്പരപ്പിച്ചു.
ഗച്ചിബൗളിയിലെ ഒരു സ്വകാര്യ ബാങ്കിനു സമീപം മഹാരാഷ്ട്രയില്‍ നിന്നുള്ള സന്ദീപ് എന്നയാള്‍ പതിവായി കഞ്ചാവ് വില്‍ക്കുന്നുണ്ടെന്നുള്ള വ്യക്തമായ വിവരം ലഭിച്ചിരുന്നു. മഹാരാഷ്ട്രയില്‍ നിന്ന് വാങ്ങിയ അഞ്ച് കിലോഗ്രാം കഞ്ചാവുമായാണ് ഇയാള്‍ പിടിക്കപ്പെട്ടത്.
50 ഗ്രാം വീതമുള്ള ചെറിയ പാക്കറ്റുകളാക്കി 3,000 രൂപയ്ക്ക് സന്ദീപ് ഉപഭോക്താക്കള്‍ക്ക് വിതരണം ചെയ്യുകയായിരുന്നു. ഈഗിള്‍ എന്ന് പേരിട്ടിരിക്കുന്ന എലൈറ്റ് ആക്ഷന്‍ ഗ്രൂപ്പ് ഫോര്‍ ഡ്രഗ് ലോ എന്‍ഫോഴ്‌സ്‌മെന്റാണ് സന്ദീപ് ഉള്‍പ്പെടെയുള്ളവരെ പിടികൂടിയത്. സ്ഥിരമായി വാങ്ങുന്ന നൂറിലധികം പേരുടെ ഒരു ഡാറ്റാബേസും ഇയാള്‍ സൂക്ഷിച്ചിരുന്നു. പുതിയ സ്‌റ്റോക്കെത്തിയിട്ടുണ്ടെന്ന് വാങ്ങുന്നവരെ അറിയിക്കാന്‍ കോഡ് ഭാഷയിലുള്ള വാട്ട്‌സ്ആപ്പ് സന്ദേശങ്ങള്‍ വഴിയാണ് ആശയവിനിമയം നടത്തിയിരുന്നതെന്നും പൊലീസ് വ്യക്തമാക്കി.
രണ്ട് മണിക്കൂറിനുള്ളില്‍ കഞ്ചാവ് വാങ്ങാന്‍ ശ്രമിച്ച 14 പേരെയാണ് സംഘം പിടികൂടിയത്. പിടിക്കപ്പെട്ടവരില്‍ ഒരു ഓണ്‍ലൈന്‍ വ്യാപാരി, ആര്‍ക്കിടെക്റ്റ്, റിയല്‍ എസ്‌റ്റേറ്റ് സെയില്‍സ് എക്‌സിക്യൂട്ടീവ്, ഒരു ഐടി ജീവനക്കാരന്‍, വിദ്യാര്‍ത്ഥികള്‍ എന്നിവരും ഉള്‍പ്പെടുന്നു. ഇവര്‍ മയക്കുമരുന്ന് ഉപയോഗിച്ചിട്ടുണ്ടോ എന്ന് പരിശോധിക്കാന്‍ സംഭവസ്ഥലത്ത് വച്ചു തന്നെ പരിശോധനയ്ക്ക് വിധേയരാക്കി. പരിശോധനയില്‍ 14 പേരും പോസിറ്റീവ് ആണെന്ന് കണ്ടെത്തി. തുടര്‍പരിശോധനകള്‍ക്കായി ഡി അഡിക്ഷന്‍ സെന്ററിലേക്ക് ഇവരെ മാറ്റുകയായിരുന്നു. അതില്‍ അമ്മയെയും കുഞ്ഞിനെയും വിട്ടയച്ചു.
സന്ദീപിന്റെ വിതരണ ശൃംഖല കണ്ടെത്തുന്നതിനായി വാട്ട്‌സ്ആപ്പ് ലോഗുകള്‍, ഫോണ്‍ നമ്പറുകള്‍, ഉപഭോക്താക്കളുടെ ഫോണുകളില്‍ നിന്ന് പിടിച്ചെടുത്ത മറ്റ് ഡിജിറ്റല്‍ തെളിവുകള്‍ എന്നിവ ഉദ്യോഗസ്ഥര്‍ വിശകലനം ചെയ്യുകയാണ്. തുടര്‍നടപടികള്‍ ആരംഭിക്കുന്നതിന് മുമ്പ് ഡാറ്റാബേസിലെ അവശേഷിക്കുന്ന 86പേരും സ്വമേധയാ ലഹരിയില്‍ നിന്ന് പിന്‍വാങ്ങണമെന്ന് ഉദ്യോഗസ്ഥര്‍ അഭ്യര്‍ത്ഥിക്കുന്നത്. ഐടി ഹബ്ബായ ഗച്ചിബൗളിയിയെ മയക്കുമരുന്ന് പിടിയില്‍ നിന്ന് ശുദ്ധീകരിക്കാന്‍ തുടര്‍ച്ചയായ നിരീക്ഷണവും പ്രവര്‍ത്തനങ്ങളും പദ്ധതിയിട്ടുണ്ടെന്ന് പൊലീസ് ഉദ്യോഗസ്ഥര്‍ പറഞ്ഞു.
https://www.facebook.com/Malayalivartha
