ശ്രീപദ്മനാഭസ്വാമി ക്ഷേത്രത്തിലെ സുരക്ഷാച്ചുമതലയുള്ള പൊലീസ് ഉദ്യോഗസ്ഥന്റെ കൈയിലെ തോക്കില്‍നിന്ന് അബദ്ധത്തില്‍ വെടിപ്പൊട്ടി. സുരക്ഷാ ചുമതലയിലുള്ള ഗ്രേഡ് എസ്.ഐയുടെ തോക്കില്‍ നിന്നാണ് വെടിപൊട്ടിയത്.

ഇന്നലെ രാവിലെ എട്ടോടെയായിരുന്നു സംഭവം നടന്നത്. സംഭവത്തെത്തുടര്‍ന്ന് എസ്.ഐയെ ക്ഷേത്ര സുരക്ഷാച്ചുമതലയില്‍ നിന്നൊഴിവാക്കി സിറ്റി പൊലീസ് കമ്മിഷണറുടെ ഓഫീസിലേക്ക് മാറ്റി.

പ്രത്യേക മുറിയിലായിരുന്നു സംഭവം നടന്നത്. പതിവുപോലെ തോക്ക് വൃത്തിയാക്കുകയായിരുന്നു ഗ്രേഡ് എസ്.ഐ. വെടിയുണ്ടകള്‍ നീക്കം ചെയ്ത ശേഷമാണ് സാധാരണ തോക്കുകള്‍ വൃത്തിയാക്കാറുള്ളത്. എന്നാല്‍ ഇന്നലെ ഉദ്യോഗസ്ഥന്റെ കൈയിലുണ്ടായിരുന്ന തോക്കില്‍ ഒരു വെടിയുണ്ട അവശേഷിച്ചിരുന്നു. അബദ്ധത്തിലാണ് ഇത് സംഭവിച്ചതെന്നാണ് വിശദീകരണമുള്ളത്. തോക്കിന്റെ പ്രവര്‍ത്തനം ശരിയെന്ന് ഉറപ്പാക്കാന്‍ ട്രിഗര്‍ വലിച്ച സമയത്ത് വെടി പൊട്ടുകയായിരുന്നു.

വെടിയുണ്ട മേശയില്‍ തുളഞ്ഞുകയറി. തോക്ക് വൃത്തിയാക്കുന്ന സമയത്ത് മറ്റാരും മുറിയിലുണ്ടായിരുന്നില്ല. അതിനാല്‍ ആളപായമൊഴിവായി. ശബ്ദം കേട്ട് ഉദ്യോഗസ്ഥര്‍ പാഞ്ഞെത്തി. തോക്കും പെല്ലറ്റുകളും പൊലീസ് കസ്റ്റഡിയിലെടുക്കുകയും ചെയ്തു. സംഭവത്തെക്കുറിച്ച് ഡെപ്യൂട്ടി കമാന്‍ഡന്റിന്റെ നേതൃത്വത്തില്‍ അന്വേഷണം തുടങ്ങി.