എസ്എസ്എല്സി 2 തവണ എഴുതി; അങ്ങനെ പഠിച്ചുപഠിച്ച് സിവില് സര്വീസിലെത്തി : ഡി ഐ ജി വിജയന് അനുഭവങ്ങള് പങ്കിടുന്നു
പരീക്ഷയില് ഒരു വട്ടം വിജയിച്ചില്ലെന്നു വച്ച് ജീവിതം തീര്ന്നു എന്നു കരുതരുതെന്ന് വ്യക്തമാക്കുന്നു സ്വന്തം അനുഭവ സാക്ഷ്യവുമായി ഡി ഐ ജി വിജയന് അനുഭവങ്ങള് പങ്കിടുന്നു.
എസ്എസ്എല്സി പരീക്ഷ കൊണ്ട് ജീവിതം അവസാനിക്കുമെന്നോ എസ്എസ്എല്സി പരീക്ഷയാണ് ജീവിതം കരുപ്പിടിപ്പിക്കാനുള്ള അവസാന അവസരമെന്നോ ചിന്തിക്കുന്നൊരാളല്ല ഞാന്. എസ്എസ്എല്സി വിജയം ജീവിതത്തിന്റെ ആത്യന്തിക വിജയമല്ല. കുട്ടിക്കാലത്തു തന്നെ ജീവിതം കണ്ടറിയാന് കഴിഞ്ഞൊരാളാണ് ഞാന്. അതുകൊണ്ട് ഞങ്ങളുടെ നാട്ടിലെ നിര്മാണമേഖലയിലെ തൊഴിലാളിയാകുകയാണ് പ്രധാനമെന്നു ഞാന് ചിന്തിച്ചിരുന്നു. ഏറ്റവും നല്ല പണിക്കാരനായാല് ഏറ്റവുംകൂടുതല് വരുമാനം കിട്ടുമെന്നു ചിന്തിക്കേണ്ട സാഹചര്യം. എങ്ങനെയെങ്കിലും എസ്എസ്എല്സി പരീക്ഷ കടന്നു കിട്ടിയാല് മതിയെന്നു ചിന്തിച്ച്, അവസാനത്തെ പരീക്ഷ ഞാന് എഴുതിയില്ല. പിന്നെ നിര്മാണ മേഖലയില് തൊഴിലിന് ഇറങ്ങിത്തിരിച്ചു.
അത്യാവശ്യം നല്ല വരുമാനം കുടുംബത്തിലേക്ക് ഉണ്ടായിത്തുടങ്ങിയപ്പോഴാണു വായന തുടങ്ങിയത്. വായിച്ചുവായിച്ച് പഠിക്കാനുള്ള ആഗ്രഹം വീണ്ടും മനസിലുണ്ടായി. എസ്എസ്എല്സി പരീക്ഷ വീണ്ടും എഴുതി വിജയിച്ചു. അങ്ങനെ പഠിച്ചുപഠിച്ച് സിവില് സര്വീസിലെത്തി.
ഇപ്പോഴും കൂടുതല് മികച്ചരീതിയില് എങ്ങനെ മുന്നോട്ടുപോകാമെന്നു ചിന്തിക്കുന്നു. എനിക്കു പഠിക്കണമെന്ന് എനിക്കുതന്നെ തോന്നിയപ്പോഴാണു ഞാന് വിജയിക്കാന് തുടങ്ങിയത്. എനിക്കു ശരിയെന്നു തോന്നുന്നതു ചെയ്യാനുള്ള സ്വാതന്ത്ര്യം വീട്ടുകാര് എനിക്കു തന്നിരുന്നു.
പഠനം ഉപേക്ഷിച്ചു ജോലിക്കു പോയപ്പോഴും വരുമാനമുള്ള ജോലി ഉപേക്ഷ!ിച്ചു വീണ്ടും പഠിക്കാന് പോയപ്പോഴും അവര് പിന്തുണച്ചു. ആസ്വദിച്ചു പഠിക്കാന് എനിക്കു കഴിഞ്ഞു. ചിലര് എന്റെ കഥ സ്വന്തം ജീവിതത്തില് ഒഴികഴിവായി എടുത്ത് പഠനം ഉഴപ്പാറുണ്ട്.
അവരോട് എനിക്കു പറയാനുള്ളത്, എനിക്കു ജീവിതത്തില് ഒരു ലക്ഷ്യമുണ്ടായിരുന്നു. ലക്ഷ്യബോധമില്ലെങ്കില് ഒന്നും ആകാന് കഴിയില്ല.
പരീക്ഷ എഴുതുന്ന കുട്ടികളോട് ഒരുവാക്ക്: പിരിമുറുക്കം സൃഷ്ടിക്കാനുള്ള വേദിയല്ല പരീക്ഷ. നമ്മള് മനസിലാക്കിയത് എഴുതിവയ്ക്കണം. മാര്ക്കിനെക്കാള് നമ്മുടെ അറിവ് പരിശോധിക്കാനുള്ള അവസരമായി പരീക്ഷയെക്കാണണം. പരീക്ഷയില് തോറ്റെന്നുവെച്ച് ലോകം ഇടിഞ്ഞുവീഴുമെന്നു കരുതേണ്ട. പരീക്ഷയില് തോറ്റ ഒരുപാടുപേര് ജീവിതത്തില് വിജയിച്ച കഥകള് നമുക്കു ചുറ്റുമുണ്ട്. അതുപോലെ പരീക്ഷയില് വിജയിച്ചവരും ജീവിതത്തില് വിജയിച്ചിട്ടുണ്ട്. എസ്എസ്എല്സി പരീക്ഷയില് തോറ്റാല് ജീവിതത്തില് എന്നെന്നേക്കുമായി തോറ്റു എന്നു കരുതേണ്ട. പക്ഷേ, സ്വയം പരാജയപ്പെട്ട് അനുഭവം നേടിയിട്ടേ പഠിക്കാന് തുടങ്ങൂ എന്നും വിചാരിക്കേണ്ട. തീയില് തൊട്ടാല് പൊള്ളുമെന്നു മറ്റുള്ളവരുടെ അനുഭവം കണ്ടാണു നമ്മള് മനസിലാക്കുന്നത്. അതുപോലെ മറ്റുള്ളവരുടെ പരാജയം കണ്ട് നമ്മുടെ തെറ്റുകള് തിരുത്തി വിജയത്തിലേക്കെത്താന് പരിശ്രമിക്കുക.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha