ചാരുംമൂട് വള്ളികുന്നത്ത് സ്വകാര്യ ധനകാര്യ സ്ഥാപനത്തിലെ ​ഗുണ്ടകളുടെ ഭീഷണിയെത്തുടർന്ന് പട്ടികജാതിക്കാരനായ ശശി ആത്മഹത്യ ചെയ്തകേസിൽ സർക്കാരോ സിപിഎം പ്രവർത്തകരോ പ്രതിസ്ഥാനത്ത് വരാത്ത സാഹചര്യത്തിൽ സർക്കാർ ആരുടെ ഒപ്പമാണ്? നിർണായക ചോദ്യമുയർത്തി സന്ദീപ് വാചസ്പതി. അദ്ദേഹത്തിന്റെ ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ;-

പിണറായി സർക്കാരിന്റെ മുതലാളി പ്രേമം

ചാരുംമൂട് വള്ളികുന്നത്ത് സ്വകാര്യ ധനകാര്യ സ്ഥാപനത്തിലെ ​ഗുണ്ടകളുടെ ഭീഷണിയെത്തുടർന്ന് പട്ടികജാതിക്കാരനായ ശശി ആത്മഹത്യ ചെയ്ത സംഭവം നടന്നിട്ട് ഇന്നേയ്ക്ക് 18 ദിവസമാകുന്നു. മുത്തൂറ്റിൽ നിന്ന് നഷ്ടപരിഹാരം ആവശ്യപ്പെട്ട് ബിജെപി കഴിഞ്ഞ 16 ദിവസമായി സമരത്തിലുമാണ്. ബിജെപിയുടെ സമരത്തെ തുടർന്ന് 3 മുത്തൂറ്റ് ജീവനക്കാർക്കെതിരെ പട്ടികജാതി പീഡന നിരോധന നിയമപ്രകാരം കേസെടുത്തു. പക്ഷേ നാളിതുവരെ പ്രതികളെ പിടികൂടാതെ അവർക്ക് മുൻകൂർ ജാമ്യം നേടാൻ ഹൈക്കോടതിയിൽ പോകാൻ അവസരമൊരുക്കുകയായിരുന്നു പിണറായി പൊലീസ്. കേസ് കോടതിയിലെത്തിയപ്പോഴാണ് പട്ടികജാതി സംരക്ഷകരായി നടിക്കുന്ന ഇടത് സർക്കാരിന്റെ യഥാർത്ഥ മുഖം തിരിച്ചറിഞ്ഞത്.

പട്ടികജാതി പീഡന നിരോധന നിയമപ്രകാരമുള്ള കേസുകളിൽ നേരിട്ട് ജാമ്യം നൽകാൻ ഹൈക്കോടതിക്ക് അധികാരം ഇല്ലെന്നിരിക്കെ ഈ കേസിൽ എസ് സി/ എസ്ടി അട്രോസിറ്റി വകുപ്പുകൾ ചേർത്തിട്ടുണ്ടെന്ന കാര്യം കോടതിയിൽ നിന്ന് മറച്ചു വെച്ചായിരുന്നു സർക്കാർ വക്കീലിന്റെ പ്രകടനം. എങ്കിലും ബഹുമാനപ്പെട്ട ഹൈക്കോടതി കൂടുതൽ വാദം കേൾക്കാൻ കേസ് മാറ്റി വെക്കുകയായിരുന്നു. ഇക്കാര്യം അറിഞ്ഞതോടെയാണ് കേസിൽ ഇടപെടാൻ ബിജെപിക്ക് അവസരം കിട്ടിയത്. ബിജെപിയുടെ അഭിഭാഷകൻ കേസിന്റെ സ്വഭാവം ശ്രദ്ധയിൽപ്പെടുത്തിയതോടെ ബഹുമാനപ്പെട്ട ഹൈക്കോടതി പ്രതികളുടെ മുൻകൂർ ജാമ്യാപേക്ഷ തള്ളി കേസ് തീർപ്പാക്കുകയാണ് ഉണ്ടായത്.

ഇനി ചില ചോദ്യങ്ങൾ. സർക്കാരോ സിപിഎം പ്രവർത്തകരോ പ്രതിസ്ഥാനത്ത് വരാത്ത ഈ കേസിൽ സർക്കാർ ആരുടെ ഒപ്പമാണ്? സർക്കാർ ഏജന്റായ പബ്ലിക് പ്രോസിക്യൂട്ടർക്ക് സർക്കാർ നയം നടപ്പാക്കാൻ ഉത്തരവാദിത്തമില്ലേ? അതോ മുതലാളിക്കൊപ്പം എന്നതാണോ പിണറായി സർക്കാർ നയം? പാവപ്പെട്ടവന്റെ കണ്ണീരൊപ്പുന്നവർ എന്ന് അവകാശവാദം ഉന്നയിക്കുന്ന ഇടത് സർക്കാരിന് കൂലിത്തൊഴിലാളിയായ പട്ടികജാതിക്കാരന്റെ കുടുംബത്തിന് നീതി കിട്ടണമെന്ന് താത്പര്യം ഇല്ലാത്തത് എന്തു കൊണ്ടാണ്?

പ്രതികൾ അനായാസമായി ജാമ്യം കിട്ടി ഇറങ്ങിപ്പോകണമെന്ന് തീരുമാനിച്ചത് ആരാണ്? പട്ടികജാതിക്കാരൻ, കർഷകത്തൊഴിലാളി എന്നിവയൊന്നും പിണറായി സർക്കാരിന്റെ പരി​ഗണനാ പട്ടികയിൽ ഇല്ലാത്തത് എന്തുകൊണ്ട്? നിങ്ങളുടെ നയം എന്തായാലും ബിജെപി ഇരകൾക്കൊപ്പമാണ്. നീതി ഉറപ്പാക്കാൻ ബിജെപി ഉണ്ടാകും.