സംസ്ഥാനത്ത് സ്വകാര്യ ബസുടമകള് അനിശ്ചിതകാല സമരത്തിലേക്ക്
വിദ്യാര്ത്ഥികളുടെ ടിക്കറ്റ് നിരക്ക് വര്ദ്ധന ഉള്പ്പെടെ വിവിധ ആവശ്യങ്ങള് സംസ്ഥാന സര്ക്കാര് അംഗീകരിക്കാത്തതിനെത്തുടര്ന്ന് അനിശ്ചിതകാല സമരത്തിനൊരുങ്ങി സ്വകാര്യ ബസുടമകള്. സമരം ആരംഭിക്കുന്ന തീയതി രണ്ട് ദിവസത്തിനുള്ളില് പ്രഖ്യാപിക്കുമെന്നാണ് സൂചന.
വിവിധ ആവശ്യങ്ങള് ഉന്നയിച്ച് ബസുടമകള് നേരത്തേ സൂചനാപണിമുടക്ക് നടത്തിയിരുന്നു. ബസുടമകളുടെ ആവശ്യങ്ങള് അടിസ്ഥാനമാക്കി ഇനി സര്ക്കാര് തലത്തില് ചര്ച്ചയ്ക്കുള്ള സാദ്ധ്യത നിലനില്ക്കുന്നില്ല എന്നാണ് സൂചന.
ജൂലായ് 22 മുതല് അനിശ്ചിതകാല സമരം ആരംഭിക്കുമെന്ന് പ്രഖ്യാപിച്ചിരുന്നെങ്കിലും മുന് മുഖ്യമന്ത്രി വിഎസ് അച്യുതാനന്ദന്റെ വിയോഗത്തെത്തുടര്ന്ന് അത് മാറ്റിവച്ചിരുന്നു. അതിന് മുമ്പ് മന്ത്രിതല ചര്ച്ചകളും ഗതാഗത സെക്രട്ടറിയുമായുള്ള ചര്ച്ചകളും നടന്നിരുന്നു. വിദ്യാര്ത്ഥി സംഘടനകളുമായി ആലോചിച്ച ശേഷം വിദ്യാര്ത്ഥികളുടെ യാത്രാനിരക്ക് വര്ദ്ധിപ്പിക്കാമെന്ന ഗതാഗത മന്ത്രിയുമായുള്ള ചര്ച്ചയില് പറഞ്ഞിരുന്നു. വിദ്യാര്ത്ഥി സംഘടനാ പ്രതിനിധികളും ബസുടമകളും ഗതാഗത സെക്രട്ടറിയും തമ്മില് ചൊവ്വാഴ്ച നടന്ന ചര്ച്ച പരാജയപ്പെട്ടതിനെ തുടര്ന്നാണ് അനിശ്ചിതകാലസമരം എന്ന തീരുമാനത്തിലേക്ക് ബസുടമകള് എത്തിയത്.
https://www.facebook.com/Malayalivartha
