സാമ്പത്തിക തട്ടിപ്പ് കേസില്‍ ദിയ കൃഷ്ണയുടെ 'ഓ ബൈ ഓസി' എന്ന സ്ഥാപനത്തിലെ മുന്‍ ജീവനക്കാര്‍ കീഴടങ്ങി. ദിയയുടെ സ്ഥാപനത്തില്‍ നിന്ന് 69 ലക്ഷം രൂപ ജീവനക്കാര്‍ തട്ടിയെന്നാണ് കേസ്. വിനീതയേയും രാധകുമാരിയേയും കൂടാതെ കേസില്‍ ദിവ്യ എന്നൊരു യുവതിയും പ്രതിയാണ്. ക്യൂ ആര്‍ കോഡില്‍ കൃത്രിമം കാണിച്ചാണ് തട്ടിപ്പ് നടത്തിയത്. യുവതികള്‍ കുറ്റം സമ്മതിക്കുന്ന വീഡിയോ മുമ്പ് ദിയ പുറത്തുവിട്ടിരുന്നു.

അതിനുപിന്നാലെ സ്ഥാപനത്തിലെ ജീവനക്കാര്‍ പണം തട്ടിയെടുത്തെന്ന് ചൂണ്ടിക്കാട്ടി ദിയ പരാതി നല്‍കുകയായിരുന്നു. സ്ഥാപനത്തില്‍ ജോലി ചെയ്തിരുന്ന മൂന്ന് ജീവനക്കാര്‍ 10 മാസക്കാലയളവില്‍ 69 ലക്ഷം രൂപ തട്ടിയെടുത്തെന്നാണ് പരാതി.

പിന്നാലെ തങ്ങളെ തട്ടിക്കൊണ്ടുപോയെന്ന് കാണിച്ച് കൃഷ്ണകുമാറിനും ദിയയ്ക്കുമെതിരെ പൊലീസില്‍ പരാതി നല്‍കി. സാമ്പത്തിക തട്ടിപ്പ് പ്രശ്‌നം പരിഹരിക്കാമെന്ന് പറഞ്ഞ് ജീവനക്കാരെ തട്ടിക്കൊണ്ടുപോയി ഭീഷണിപ്പെടുത്തി പണം കവര്‍ന്നെന്ന് ആരോപിച്ചായിരുന്നു മ്യൂസിയം പൊലീസില്‍ പരാതി നല്‍കിയത്.

ഈ പരാതി വ്യാജമാണെന്ന് പിന്നീട് കണ്ടെത്തി. ജീവനക്കാരെ തട്ടിക്കൊണ്ടുപോയിട്ടില്ല എന്ന് തെളിയിക്കുന്ന രീതിയിലുള്ള സിസിടിവി ദൃശ്യങ്ങള്‍ നേരത്തെ പുറത്തുവന്നിരുന്നു. പരാതിക്കാരെ തട്ടിക്കൊണ്ടുപോയതായി പറയുന്നതല്ലാതെ ഒരു തെളിവും ലഭിച്ചിട്ടില്ലെന്ന് പൊലീസ് കോടതിയെ അറിയിച്ചിരുന്നു.