മീനംകൊല്ലി സ്വദേശിനിയായ പതിനഞ്ചുകാരിയെ സ്വകാര്യ വ്യക്തിയുടെ കൃഷിയിടത്തില്‍ മരിച്ച നിലയില്‍ കണ്ടെത്തിയ സംഭവത്തില്‍ കൂടുതല്‍ വിവരങ്ങള്‍ പുറത്ത്. മീനംകൊല്ലി കനിഷ്‌ക നിവാസില്‍ കുമാറിന്റെ മകള്‍ കനിഷ്‌കയാണ് (16) മരിച്ചത്. ഓട്ടോ ഡ്രൈവര്‍ പിന്നാലെ നടന്ന് ശല്യം ചെയ്തതായി പെണ്‍കുട്ടി സുഹൃത്തുക്കളോട് പറഞ്ഞിരുന്നു. ഇക്കാര്യം മാതാപിതാക്കളെ അറിയിച്ചതോടെ സ്‌കൂള്‍ മാറ്റി. സുഹൃത്തുക്കളെ പിരിയേണ്ടി വന്നതിന്റെ വേദന കനിഷ്‌കയ്ക്ക് ഉണ്ടായിരുന്നു.

കൂടാതെ കനിഷ്‌കയുടെ മാതാപിതാക്കള്‍ വേര്‍പിരിഞ്ഞാണ് താമസിക്കുന്നത്. ഇതും പെണ്‍കുട്ടിയില്‍ സമ്മര്‍ദമുണ്ടാക്കിയിരുന്നു. പിതാവിനും മുത്തച്ഛനും മുത്തശ്ശിക്കുമൊപ്പമാണ് കനിഷ്‌ക താമസിക്കുന്നത്. പെണ്‍കുട്ടി മുമ്പും ആത്മഹത്യയ്ക്ക് ശ്രമിച്ചിരുന്നതായി റിപ്പോര്‍ട്ടുകളുണ്ട്.

ശനിയാഴ്ച പ്രദേശത്ത് നടന്ന ഓണാഘോഷ പരിപാടിയിലൊക്കെ കനിഷ്‌ക പങ്കെടുത്തിരുന്നു. ഞായറാഴ്ച വൈകിട്ട് മുതലാണ് കനിഷ്‌കയെ കാണാതായത്. വീട്ടുകാരും നാട്ടുകാരും തെരച്ചില്‍ നടത്തിയിട്ടും കണ്ടെത്താനായില്ല. തുടര്‍ന്ന് പൊലീസില്‍ വിവരമറിയിക്കുകയായിരുന്നു. പുല്‍പള്ളി ടൗണിലെ അനശ്വര ജംഗ്ഷന് സമീപത്തെ സ്വകാര്യ വ്യക്തിയുടെ കൃഷിയിടത്തില്‍ ഇന്നലെ ഉച്ചയോടെയാണ് പെണ്‍കുട്ടിയുടെ മൃതദേഹം കണ്ടെത്തിയത്.