നവരാത്രി ഘോഷയാത്ര ആരംഭിച്ചു....പദ്മനാഭപുരം കൊട്ടാരത്തില് നിന്ന് അനന്തപുരിയിലേക്ക്.... തിരുവനന്തപുരത്ത് എത്തുന്നതോടെ നവരാത്രി ആഘോഷങ്ങള് തുടങ്ങും. പദ്മതീര്ത്ഥത്തിലെ ആറാട്ടിനുശേഷം നവരാത്രി മണ്ഡപത്തില് സരസ്വതിദേവീയെ ഒക്ടോബര് 4 വരെ പൂജയ്ക്കിരുത്തും
അനന്തപുരിക്ക് നവരാത്രി പുണ്യം ചൊരിയാന് വിഗ്രഹ ഘോഷയാത്ര,പദ്മനാഭപുരം കൊട്ടാരത്തില് നിന്ന് ഇന്നലെ പുറപ്പെട്ടു. തേവാരക്കെട്ട് സരസ്വതിദേവീ, വേളിമല കുമാരസ്വാമി,ശുചീന്ദ്രം മുന്നൂറ്റിനങ്ക വിഗ്രഹങ്ങളാണ് എഴുന്നള്ളുന്നത്.
പത്മനാഭപുരം കൊട്ടാരത്തിലെ ഉപ്പരിക്ക മാളികയില് നടന്ന ഉടവാള് കൈമാറ്റ ചടങ്ങിനു ശേഷമായിരുന്നു ഘോഷയാത്ര. പട്ടുവിരിച്ച പീഠത്തില് സൂക്ഷിച്ച ഉടവാള് സംസ്ഥാന പുരാവസ്തു വകുപ്പ് ഡയറക്ടര് ഇ.ദിനേശനില് നിന്ന് മന്ത്രി രാമചന്ദ്രന് കടന്നപ്പള്ളി സ്വീകരിച്ചു.
തുടര്ന്ന് തമിഴ്നാട് മന്ത്രി മനോ തങ്കരാജും കന്യാകുമാരി എം.പി വിജയ് വസന്തും വാള് ഏറ്റുവാങ്ങിയതിനുശേഷം ആചാരപ്രകാരം തമിഴ്നാട് ഹിന്ദു റിലീജിയന്സ് ആന്ഡ് ചാരിറ്റബിള് എന്ഡോവ്മെന്റ്സ് വകുപ്പ് ജോയിന്റ് കമ്മിഷണര് ജാന്സി റാണിക്ക് കൈമാറി. ഘോഷയാത്രയ്ക്ക് അകമ്പടി പോകുന്ന ദേവസ്വം ജീവനക്കാരന് മോഹനകുമാറിന് ജാന്സി റാണി വാള് നല്കി. മഹാരാജാവ് ഘോഷയാത്ര അനുഗമിക്കുന്നതിന്റെ പ്രതീകമായാണ് ഉടവാള് കൊണ്ടുപോകുന്നത്.
തിരുവനന്തപുരത്ത് എത്തുമ്പോള് തിരുവിതാംകൂര് രാജകുടുംബാംഗം വാള് ഏറ്റുവാങ്ങും.എം.എല്.എമാരായ സി.കെ.ഹരീന്ദ്രന്, എം.വിന്സന്റ്, കന്യാകുമാരി ജില്ലാകളക്ടര് ആര്.അളഗമീന, സബ്കളക്ടര് വിനയ് കുമാര് മീണ, കന്യാകുമാരി ദേവസ്വം ബോര്ഡ് ചെയര്മാന് പ്രഭാരാമകൃഷ്ണന്, തിരുവിതാംകൂര് കൊട്ടാരം പ്രതിനിധി രാജരാജ വര്മ്മ തുടങ്ങിയവര് പങ്കെടുത്തു.
കേരള, തമിഴ്നാട് സായുധ പൊലീസിന്റെ ഗാര്ഡ് ഓഫ് ഓണറിന് ശേഷം ഘോഷയാത്ര കൊട്ടാരമുറ്റത്തേക്ക് നീങ്ങി. തുടര്ന്ന് തലസ്ഥാനത്തേക്കു പുറപ്പെുകയായിരുന്നു. തേവാരക്കെട്ട് സരസ്വതിദേവീ വിഗ്രഹം ആനപ്പുറത്തും. വേളിമല കുമാര സ്വാമിയും ശുചീന്ദ്രം മുന്നൂറ്റി നങ്കയും പല്ലക്കുകളിലുമാണ് പുറപ്പെട്ടത്. രാത്രി കുഴിത്തുറ മഹാദേവക്ഷേത്രത്തിലെത്തി വിഗ്രഹങ്ങള് അവിടെ ഇറക്കി പൂജ നടത്തി.
അതേസമയം ഇന്ന് ഉച്ചയ്ക്ക് 12ന് കളിയിക്കാവിളയില് എത്തുന്ന ഘോഷയാത്രയ്ക്ക് ഗവര്ണര് രാജേന്ദ്ര ആര്ലേക്കറുടെ നേതൃത്വത്തില് സ്വീകരണം നല്കും. കേരള തമിഴ്നാട് സായുധ സേനാവിഭാഗങ്ങളുടെ നേതൃത്വത്തില് ഘോഷയാത്രയ്ക്ക് ഗാര്ഡ് ഒഫ് ഓണര് നല്കും.
പാറശാല മഹാദേവ ക്ഷേത്രത്തില് വിഗ്രഹങ്ങള് ഇറക്കി പൂജ നടത്തും. തുടര്ന്ന് ഘോഷയാത്ര നെയ്യാറ്റിന്കര ശ്രീകൃഷ്ണ സ്വാമി ക്ഷേത്രത്തിലെത്തും. 22ന് വൈകിട്ട് തിരുവനന്തപുരത്ത് എത്തുന്നതോടെ നവരാത്രി ആഘോഷങ്ങള് തുടങ്ങും. സന്ധ്യയോടെ ഘോഷയാത്ര കിഴക്കേകോട്ടയില് എത്തുമ്പോള് ശ്രീപദ്മനാഭസ്വാമി ക്ഷേത്രത്തില് ഉടവാള് ഏറ്റുവാങ്ങി ആചാരപ്രകാരം വരവേല്ക്കും.
പദ്മതീര്ത്ഥത്തിലെ ആറാട്ടിനുശേഷം നവരാത്രി മണ്ഡപത്തില് സരസ്വതിദേവീയെ ഒക്ടോബര് 4 വരെ പൂജയ്ക്കിരുത്തും. കരമന മുതല് വെള്ളിക്കുതിരപ്പുറത്ത് എഴുന്നള്ളിക്കുന്ന കുമാരസ്വാമിയെ ആര്യശാല ദേവീക്ഷേത്രത്തിലും മുന്നൂറ്റിനങ്കയെ ചെന്തിട്ട ദേവീക്ഷേത്രത്തിലും പൂജയ്ക്കിരുത്തുകയും ചെയ്യും.
നവരാത്രി പൂജയ്ക്ക് ശേഷം ഒരു ദിവസത്തെ നല്ലിരുപ്പിന് ശേഷം മൂന്ന് വിഗ്രഹങ്ങളും തിരുവനന്തപുരത്ത് നിന്നും തിരിച്ചെഴുന്നള്ളത്തായി പദ്മനാഭപുരത്തേക്ക് പുറപ്പെടുകയും ചെയ്യും.
https://www.facebook.com/Malayalivartha
