അലറിവിളിച്ച് അവര്‍.. തെങ്ങ് മറിഞ്ഞുവരുന്നേ എല്ലാവരും ഓടി മാറിക്കോ. ഉറക്കെ അലറിവിളിച്ചതിനെ തുടര്‍ന്ന് പലരും എണീറ്റോടി മാറിയെങ്കിലും വസന്തകുമാരിക്കും ചന്ദ്രികയ്ക്കും കഴിഞ്ഞില്ല .

രക്ഷിക്കണേയെന്ന് നിലവിളിച്ച അവരുടെ ദേഹത്തേക്ക് പെട്ടെന്ന് തെങ്ങ് മറിഞ്ഞ് വീണു. ഓടിപ്പോയവര്‍ നിലവിളികേട്ട് തിരിച്ചെത്തി നോക്കിയപ്പോഴാണ് ഇരുവരേയും ദേഹത്ത് തെങ്ങിന്‍ത്തടി പതിച്ച് അബോധാവസ്ഥയില്‍ കണ്ടത്''. ആഴ്ചകള്‍ക്കുശേഷം നാലു ദിവസത്തിന് മുന്‍പാണ് കുന്നത്തുകാല്‍ ഗ്രാമപ്പഞ്ചായത്തില്‍ ചാവടി വാര്‍ഡിലെ തൊഴിലുറപ്പ് പണികള്‍ ആരംഭിച്ചത്. ശനിയാഴ്ച രാവിലെ എട്ടുമണിയോടെ പണികള്‍ ആരംഭിച്ചെങ്കിലും പതിവുപോലെ 10 മണിയോടെ പണിസ്ഥലത്ത് എല്ലാവരും ഒരുമിച്ചിരുന്ന് നടപ്പാലത്തിലും തോടിന്റെ ബണ്ടിലും ഇരുന്ന് രാവിലത്തെ ഭക്ഷണം കഴിക്കാന്‍ തയ്യാറെടുക്കുകയായിരുന്നു. 48 തൊഴിലാളികള്‍ ഉണ്ടായിരുന്നു.

പെട്ടെന്നാണ് സമീപത്തെ പുരയിടത്തില്‍ മരങ്ങള്‍ക്കിടയില്‍ നിന്നിരുന്ന ഉണങ്ങി ജീര്‍ണിച്ച 40 അടിയിലേറെ ഉയരമുള്ള തെങ്ങ് മറിഞ്ഞുവരുന്നത് തൊഴിലാളിയായ രത്‌നമ്മ കണ്ടത്. ''ഓടി മാറിക്കോ തെങ്ങ് മറിയുന്നേ'' യെന്ന് അവര്‍ ഉടനെ ഉറക്കെവിളിച്ചു പറഞ്ഞു. ഇതുകേട്ട് പലരും ഓടിമാറി. എന്നാല്‍, വസന്തകുമാരിയും ചന്ദ്രികയും എഴുന്നേല്‍ക്കുന്നതിനു മുന്‍പുതന്നെ തെങ്ങ് അവരുടെ ദേഹത്ത് പതിച്ചിരുന്നു. ബണ്ടിലിരുന്ന ചന്ദ്രികയുടെ തലയിലാണ് തെങ്ങിന്‍തടി വീണത്. പാലത്തിലിരുന്ന വസന്തകുമാരിയുടെ ദേഹത്തും നടപ്പാലത്തിലുമായിട്ടാണ് തെങ്ങ് പതിച്ചത്. നടപ്പാലം തകര്‍ന്നുവീണ് വസന്തകുമാരിയുടെ ശരീരം അതില്‍ കുടുങ്ങിപ്പോയി.

ഓടിമാറുന്നതിനിടയില്‍ തെങ്ങിന്‍തടിയുടെ ഭാഗങ്ങള്‍ വീണ് സ്നേഹലത, ഉഷ എന്നീ തൊഴിലാളികള്‍ക്കും പരിക്കേറ്റു. അപകടസ്ഥലത്തുണ്ടായിരുന്ന തൊഴിലാളികളുടെ നിലവിളികേട്ട് സമീപത്തുണ്ടായിരുന്ന മറ്റ് തൊഴിലാളികളും നാട്ടുകാരും ഓടിയെത്തിയാണ് രക്ഷാപ്രവര്‍ത്തനങ്ങള്‍ നടത്തിയത്.

ഇടുങ്ങിയ വഴിയിലൂടെ കുറച്ചുദൂരം ചുമന്ന് നാലുപേരെയും വിവിധ ആംബുലന്‍സുകളില്‍ കാരക്കോണം ആശുപത്രിയിലെത്തിച്ചെങ്കിലും വസന്തകുമാരിയും ചന്ദ്രികയും യാത്രാമധ്യേ തന്നെജീവന്‍ നഷ്ടപ്പെട്ടു.


തൊഴിലുറപ്പ് പണിക്കിടയില്‍ ഉണങ്ങിയ തെങ്ങ് വീണുള്ള അപകടത്തില്‍ ജീവനെടുത്ത രണ്ട് വനിതാ തൊഴിലാളികളുടെ വിയോഗം കുന്നത്തുകാല്‍ ഗ്രാമനിവാസികളെ സങ്കടക്കയത്തിലാക്കി. കുന്നത്തുകാല്‍ ചെമ്മണ്ണുവിള ദര്‍ശനനിലയത്തില്‍ ശ്രീകുമാറിന്റെ ഭാര്യ എസ്.വസന്തകുമാരി (68), കുന്നത്തുകാല്‍ തൊളിയറ കിഴക്കേക്കര പുത്തന്‍വീട്ടില്‍ പരേതനായ രാമചന്ദ്രന്‍നായരുടെ ഭാര്യ പി.ചന്ദ്രിക (64) എന്നിവരാണ് മരിച്ചത്.