വെള്ളിയാഴ്ച മൂന്ന് ദിവസം പ്രായമുള്ള ഒരു ആണ്‍ കുഞ്ഞ് തിരുവനന്തപുരം അമ്മത്തൊട്ടിലില്‍ അതിഥിയായി എത്തി. അമ്മത്തൊട്ടിലിന്റെ അലാറം കേട്ട ഉടനെ സമിതി ചേമ്പറില്‍ ഉണ്ടായിരുന്ന സംസ്ഥാന ശിശുക്ഷേമ സമിതി ജനറല്‍ സെക്രട്ടറി ജി.എല്‍. അരുണ്‍ ഗോപിയും അഡോപ്ഷന്‍ മാനേജര്‍ സരിതയും സ്‌നേഹത്തൊട്ടിലില്‍ എത്തി കുഞ്ഞിനെ വാരിയെടുത്ത് പൊറ്റമ്മമാരുടെ തുടര്‍ സംരക്ഷണത്തിനായി കൈമാറി.

സര്‍ക്കാരിന്റെയും സംസ്ഥാന ശിശുക്ഷേമ സമിതിയുടെയും കീഴില്‍ പ്രവര്‍ത്തിക്കുന്ന സ്‌നേഹ കൂടിലേക്ക് ചേക്കേറിയ കുരുന്നിന് 2.4 കി.ഗ്രാം തൂക്കം ഉണ്ട്. നാട്ടില്‍ സമത്വവും തുല്യതയും നല്ല മനസ്സും കാത്തു സൂക്ഷിക്കാന്‍ സമൂഹത്തിനുള്ള സന്ദേശമായി പുതിയ കുരുന്നിന് ' സമന്‍' എന്നു പേരിട്ടതായി അരുണ്‍ ഗോപി പറഞ്ഞു. കുഞ്ഞിനെ ലഭിച്ച ഉടന്‍ തൈക്കാട് കുട്ടികളുടെ ആശുപത്രിയില്‍ എത്തിച്ച് പ്രാഥമിക പരിശോധനയില്‍ മറ്റ് ആരോഗ്യ പ്രശ്‌നങ്ങള്‍ ഒന്നുമില്ലാത്തതിനാല്‍ തിരികെ സമിതി ദത്തെടുക്കല്‍ കേന്ദ്രത്തില്‍ എത്തിച്ചു. കേന്ദ്രത്തിലെ 'അമ്മ' മാരുടെ പൂര്‍ണ്ണ നിരീക്ഷണത്തിലും പരിചരണയിലുമാണ് സമന്‍.

തിരുവനന്തപുരം അമ്മത്തൊട്ടിലില്‍ ഈ വര്‍ഷം ലഭിക്കുന്ന 13 ാമത്തെ കുരുന്നാണ്. സെപ്തംബര്‍ മാസം അമ്മത്തൊട്ടില്‍ സമിതിയുടെ സംരക്ഷണയിലേക്ക് എത്തിയ മൂന്നാമത്തെ കുട്ടിയാണ്. കഴിഞ്ഞ ദിവസങ്ങളില്‍ ഇവിടെ ലഭിച്ച കുഞ്ഞിനെ തുമ്പ, മുകില്‍ എന്നിങ്ങനെ പേരിട്ടിരുന്നു.

നിലവിലുള്ള ഭരണ സമിതി അധികാരത്തില്‍ വന്ന ശേഷം 175 കുട്ടികളെയാണ് ഇതുവരെ ഉചിതമായ മാതാപിതാക്കളെ നിയമപരമായ കണ്ടെത്തി ദത്ത് നല്‍കിയത്. കഴിഞ്ഞ വര്‍ഷം 32 കുട്ടികളാണ് സംസ്ഥാനത്ത് ഒട്ടാകെ സര്‍ക്കാരിന്റെയും സമിതിയുടെയും സംരക്ഷണാര്‍ത്ഥം സംസ്ഥാനത്ത് അമ്മ തൊട്ടില്‍ മുഖാന്തിരം ലഭിച്ചത്. സമന്റെ ദത്തെടുക്കല്‍ നടപടിക്രമങ്ങള്‍ ആരംഭിക്കേണ്ടതിനാല്‍ കുരുന്നിന് അവകാശികള്‍ ആരെങ്കിലുമുണ്ടെങ്കില്‍ അടിയന്തിരമായി ബന്ധപ്പെടണമെന്ന് അരുണ്‍ ഗോപി അറിയിച്ചു.