ഇത്തവണത്തെ സ്കൂള് കലോത്സവത്തിനായുള്ള ഒരുക്കങ്ങള് ആരംഭിച്ചതായി വിദ്യാഭ്യാസമന്ത്രി
വരാനിരിക്കുന്ന സ്കൂള് കലോത്സവത്തിനായുള്ള ഒരുക്കങ്ങള് ആരംഭിച്ചതായി വിദ്യാഭ്യാസമന്ത്രി വി ശിവന്കുട്ടി. മത്സരങ്ങളില് എ ഗ്രേഡ് നേടുന്ന എല്ലാ വിദ്യാര്ത്ഥികള്ക്കും സര്ക്കാരിന്റെ വകയായി 1000 രൂപ ഗ്രാന്ഡ് നല്കുമെന്നും മന്ത്രി അറിയിച്ചു.
'ജനപങ്കാളിത്തത്തോടെ പരാതിരഹിതമായി കലോത്സവം സംഘടിപ്പിക്കുകയാണ് ലക്ഷ്യം. താമസം, ഭക്ഷണം തുടങ്ങിയവ കൃത്യമായി സജ്ജീകരിക്കാന് നിര്ദേശം നല്കിയിട്ടുണ്ട്. കലോത്സവത്തിന്റെ സ്വര്ണക്കപ്പ് തൃശൂരില് ആയതിനാല് ഘോഷയാത്ര തിരുവനന്തപുരത്തുനിന്നും കാസര്കോട് നിന്നും തൃശൂരിലേയ്ക്ക് എത്തുന്ന തരത്തിലാണ് ക്രമീകരിക്കാന് ഉദ്ദേശിച്ചിട്ടുള്ളത്. സ്കൂള് കായികമേളയില് ഇത്തവണ പരിഷ്കരിച്ച മാനുവലായിരിക്കും നടപ്പാക്കുക. മത്സരയിനത്തില് കളരിപ്പയറ്റ് ഉള്പ്പെടുത്തും' മന്ത്രി വ്യക്തമാക്കി.
അതേസമയം, കുട്ടികള്ക്ക് ആധാര് കാര്ഡ് ഇല്ലാത്തതിന്റെ പേരില് അദ്ധ്യാപകര്ക്ക് തൊഴില് നഷ്ടപ്പെടുന്ന സാഹചര്യം ഗൗരവകരമാണെന്ന് മന്ത്രി ചൂണ്ടിക്കാട്ടി. നിരവധി അപേക്ഷകള് വന്നതിന്റെ പശ്ചാത്തലത്തില് പുനഃപരിശോധന നടത്താന് തീരുമാനിച്ചിട്ടുണ്ട്. എട്ടുപത്ത് വര്ഷം ജോലി ചെയ്തിട്ട് പിരിച്ചുവിടുന്നത് അനീതിയാണ്. വിഷയത്തില് വിദ്യാഭ്യാസ സെക്രട്ടറി വാസുകിയെ കണ്വീനറായി ചുമതലപ്പെടുത്തി കമ്മിറ്റിയെ നിയമിച്ചിട്ടുണ്ട്. ആധാറിന് പകരം കുട്ടികളുടെ ജനന സര്ട്ടിഫിക്കറ്റ് കൂടി പരിഗണിക്കാമെന്നത് നിര്ദേശിക്കുമെന്നും മന്ത്രി വി ശിവന്കുട്ടി പറഞ്ഞു.
https://www.facebook.com/Malayalivartha
