കണിമംഗലത്ത് മോഷണശ്രമത്തിനിടെ വയോധികനായ വിന്‍സന്റിനെ കൊലപ്പെടുത്തിയ കേസില്‍ പ്രതികള്‍ക്ക് ശിക്ഷ വിധിച്ച് കോടതി. ഒന്നാം പ്രതി ഒല്ലൂര്‍ സ്വദേശി മനോജിന് 19 വര്‍ഷം തടവും രണ്ടാം പ്രതി വേലപ്പറമ്പില്‍ ജോര്‍ജ്ജിന്റെ ഭാര്യ ഷൈനിക്ക് 14 വര്‍ഷം തടവുമാണ് വിധിച്ചത്. തൃശൂര്‍ അഡീഷണല്‍ സെഷന്‍സ് കോടതിയുടെതാണ് വിധി. 2014നാണ് കണിമംഗലത്തെ കൈതക്കോടന്‍ വീട്ടില്‍ വിന്‍സന്റിനെ (79) കൊലപ്പെടുത്തിയത്. മനോജ് ഒരു ലക്ഷത്തിഎഴുപതിനായിരം പിഴയൊടുക്കണം. ഷൈനി ഒന്നരലക്ഷം പിഴയടയ്ക്കാനും കോടതി ഉത്തരവിട്ടു.

പ്രതികളില്‍ നിന്ന് ഈടാക്കുന്ന പിഴയില്‍ നിന്ന് ഒരു ലക്ഷം വീതം മരിച്ച വിന്‍സന്റിന്റെ കുടുംബത്തിന് കൈമാറാനും ഉത്തരവിലുണ്ട്. 2014 നവംബര്‍ 19ന് ബന്ധുവീട്ടില്‍ വിരുന്ന് കഴിഞ്ഞ് കണിമംഗലത്തെ വീട്ടിലെത്തിയ വിന്‍സന്റിനെയും ഭാര്യ ലില്ലിയെയും മുഖം മൂടി ധരിച്ചെത്തിയ മൂന്നംഗ സംഘം ആക്രമിക്കുകയായിരുന്നു. പിന്നീട് ഇരുവരെയും കെട്ടിയിട്ട് പന്ത്രണ്ട് പവന്‍ കവര്‍ന്നു.

അലമാരയിലുണ്ടായിരുന്ന മുപ്പത്തി അയ്യായ്യിരം രൂപയും മോഷ്ടാക്കള്‍ എടുത്തുകൊണ്ടുപോയി. കെട്ടഴിച്ച് നിലവിളിച്ചപ്പോള്‍ അയല്‍വാസിയായിരുന്ന ഷൈനിയാണ് കത്തിയുമായി ഓടിവന്ന് കെട്ടറുത്ത് ഇരുവരെയും മോചിപ്പിച്ചത്. വിന്‍സന്റ് ആശുപത്രിയില്‍ ചികിത്സയിലിരിക്കെയാണ് മരിച്ചത്. വിന്‍സന്റിന്റെ വായ ഒട്ടിക്കാനായി ഉപയോഗിച്ച പ്ലാസ്റ്രറിലെ സ്റ്റിക്കറായിരുന്നു കേസിന്റെ തുമ്പായത്. കടയില്‍ അന്വേഷിച്ചപ്പോള്‍ മനോജാണ് ഇത് വാങ്ങിയതെന്ന് വ്യക്തമായി.

മനോജില്‍ നിന്ന് ഷൈനിയിലേക്കും മകനിലേക്കും എത്തി. വിന്‍സന്റിന്റെ അയല്‍വാസിയായിരുന്ന ഷൈനിയായിരുന്നു കവര്‍ച്ച ആസൂത്രണം നടത്തിയത്. പ്രായപൂര്‍ത്തിയാവാത്ത മകനെയും അവന്റെ പ്രായപൂര്‍ത്തിയാകാത്ത മറ്റൊരു സുഹൃത്തിനെയും അടുപ്പക്കാരനായ മനോജിനെയും വച്ചാണ് കവര്‍ച്ച നടത്തിയത്. കേസില്‍ മകന്റെ കൂട്ടുകാരനെ മാപ്പുസാക്ഷിയാക്കി. മകനെ ജ്യുവനൈല്‍ കോടതി നേരത്തെ ശിക്ഷിച്ചിരുന്നു.