ചെറുകാവ് പഞ്ചായത്തിലെ എട്ടാം വാർഡിൽ രണ്ടാം ബൂത്തിൽ വോട്ടു ചെയ്യാനെത്തിയയാൾ ​കുഴഞ്ഞുവീണു മരിച്ചു. പുളിക്കൽ ഹൈസ്കൂളിന് സമീപം കാപ്പിൽ റഹ്മത്ത് മൻസിലിൽ താമസിക്കുന്ന മുഹമ്മദ് കോയയാണ് മരിച്ചത്. രാവിലെ 12 മണിയോടെ വോട്ടു ചെയ്യാനായി പുളിക്കൽ ​പറവൂർ മുഹമ്മദീയ മദ്രസയിൽ എത്തിയ സമയത്താണ് കുഴഞ്ഞുവീണത്.

പോളിങ് ബൂത്തിൽ കയറി തിരിച്ചറിയൽ രേഖകൾ സമർപ്പിച്ചതിനു ശേഷം കൈയിൽ മഷിയും പുരട്ടി വോട്ടിങ് മെഷീനിലേക്ക് പോവാനിരിക്കെയാണ് കുഴഞ്ഞു വീണ് മരിച്ചത്. ഉടനെ സമീപത്തെ ആശുപത്രിയിൽ എത്തിച്ചെങ്കിലും ജീവൻ നഷ്ടപ്പെട്ടിരുന്നു. ഭാര്യ: റസിയ. മക്കൾ: റീമ, മുഹമ്മദ് റയ്യാൻ, മുഹമ്മദ് റഈദ്. മരുമക്കൾ: നവാഫ്, ഹിബ. മയ്യത്ത് നമസ്കാരം വ്യാഴാഴ്ച രാത്രി 9.30ന് പുളിക്കൽ ജുമാമസ്ജിദിലായിരുന്നു.