സംസ്ഥാനത്തിന്റെ വിവിധ ഭാഗങ്ങളിലേയ്ക്കുള്ള കെ.എസ്.ആര്‍.ടി.സി ബഡ്ജറ്റ് ടൂറിസം യാത്രകള്‍ ഹിറ്റായതിന് പിന്നാലെ, അന്തര്‍ സംസ്ഥാന യാത്രകളും സൂപ്പര്‍ ഹിറ്റ്. തമിഴ്‌നാട്ടിലെ ഊട്ടി, കൊടൈക്കനാല്‍, മേഘമല, രാമേശ്വരം. കന്യാകുമാരി തുടങ്ങിയ ടൂറിസം സ്‌പോട്ടുകളാണ് പുതുവര്‍ഷത്തില്‍ ബഡ്ജറ്റ് ടൂറിസത്തിന്റെ റൂട്ട് മാപ്പില്‍ ഇടം പിടിച്ചിരിക്കുന്നത്. സാധാരണ ബസുകളില്‍ നിന്ന് വ്യത്യസ്തമായി പ്രത്യേക നിറത്തിലുള്ള ബസുകള്‍ ടൂറിനായി നിരത്തിലിറക്കിയത് യാത്രക്കാരെ കൂടുതല്‍ ഉഷാറാക്കി.

2025ല്‍ ബഡ്ജറ്റ് ടൂറിസം യാത്രകള്‍ വഴി മാത്രം 43 കോടി രൂപയാണ് കെ.എസ്.ആര്‍.ടി.സിയുടെ വരുമാനം. 2024ലെ 23 കോടി എന്ന് വരുമാനത്തെയാണ് ഒരു വര്‍ഷം കൊണ്ട് ഡബിളാക്കിയത്. കുറഞ്ഞ നിരക്കില്‍ സുരക്ഷിത യാത്ര എന്നതാണ് പ്രായഭേദമന്യേ കെ.എസ്.ആര്‍.ടി.സിയുടെ ബി.ടി.സി യാത്രകളിലേക്ക് ജനങ്ങളെ ആകര്‍ഷിക്കുന്നത്. ക്രിസ്മസ് പുതുവത്സര അവധിക്കാലത്ത് മൂന്നാറും മലക്കപ്പാറയും കാണാനാണ് കൂടുതല്‍ സഞ്ചാരികള്‍ കെ.എസ്.ആര്‍.ടി.സി തിരഞ്ഞെടുത്തത്.

കുടുംബമായും, കൂട്ടുകാര്‍ സംഘങ്ങളായും യാത്രയുടെ ഭാഗമായി. െ്രെഡവറും കണ്ടക്ടറുമടങ്ങുന്ന ജീവനക്കാര്‍ സ്ഥലങ്ങളെ കുറിച്ച് വിശദീകരിച്ചും, യാത്രക്കാര്‍ക്കൊപ്പം ആടിയും പാടിയും ഒത്തിണങ്ങി പോകുന്നത് യാത്രകളെ കൂടുതല്‍ ജനകീയമാക്കാന്‍ സഹായിക്കുന്നുണ്ട്. 2021 മുതലാണ് ടിക്കറ്റേതര വരുമാനം ലക്ഷ്യമിട്ട് കെ.എസ്.ആര്‍.ടി.സി ബഡ്ജറ്റ് ടൂറിസം യാത്രകള്‍ വിപുലമാക്കിയത്.