കമലേശ്വരത്ത് അമ്മയും മകളും ജീവനൊടുക്കിയ സംഭവത്തില്‍ മകളുടെ ഭര്‍ത്താവ് ഉണ്ണിക്കൃഷ്ണനെതിരെ കൂടുതല്‍ ആരോപണങ്ങള്‍. എസ്.എല്‍.സജിത (54), മകള്‍ ഗ്രീമ എസ്.രാജ് (30) എന്നിവരെ ബുധനാഴ്ച വൈകിട്ടാണു മരിച്ച നിലയില്‍ കണ്ടെത്തിയത്. ഗ്രീമയ്ക്ക് 'ഭാഗ്യമില്ലെന്ന്' ഉണ്ണികൃഷ്ണന്‍ നിരന്തരം കുറ്റപ്പെടുത്തിയിരുന്നതായി ബന്ധുക്കള്‍ ആരോപിച്ചു.

ഐഐടിയില്‍നിന്ന് ഒന്നാം റാങ്ക് നേടിയ ആളാണ് ഉണ്ണികൃഷ്ണന്‍. അയര്‍ലന്‍ഡിലേക്ക് പോയെങ്കിലും 6 വര്‍ഷമായി പിഎച്ച്ഡി പൂര്‍ത്തിയാക്കാന്‍ കഴിഞ്ഞില്ല. അതിനു കാരണം ഗ്രീമയാണെന്നും ഭാഗ്യമില്ലാത്തവളാണെന്നും കുറ്റപ്പെടുത്തിയിരുന്നതായി ബന്ധുക്കള്‍ പൊലീസിനോട് പറഞ്ഞു. എംടെക് ബിരുദം ഉണ്ടായിട്ടും ഗ്രീമയെ പരിഹസിച്ചു. നല്ല ജോലിയും വിദ്യാഭ്യാസമുള്ള കുട്ടിയെ കിട്ടുമായിരുന്നെന്നും ഗ്രീമ മോഡേണ്‍ അല്ലെന്നും കുറ്റപ്പെടുത്തിയതായി ബന്ധുക്കള്‍ പറഞ്ഞു. ഉണ്ണികൃഷ്ണന്‍ മാത്രമാണ് മരണത്തിന് ഉത്തരവാദിയെന്നാണ് ഇരുവരുടെയും ആത്മഹത്യക്കുറിപ്പില്‍ പറയുന്നത്.

എന്നാല്‍, ഉണ്ണികൃഷ്ണന്‍ തെറ്റുകാരനല്ലെന്നും പ്രശ്‌നങ്ങള്‍ക്ക് കാരണം ഗ്രീമയുടെ അമ്മയാണെന്നും ഉണ്ണികൃഷ്ണന്റെ ബന്ധുക്കള്‍ പറയുന്നു. പ്രശ്‌നങ്ങള്‍ പരിഹരിക്കാന്‍ കൗണ്‍സിലിങ് നടത്തിയിട്ടും ഫലമുണ്ടായില്ലെന്നും അവര്‍ പറയുന്നു. ഉണ്ണികൃഷ്ണന്റെ അറസ്റ്റ് പൂന്തുറ പൊലീസ് മുംബൈയിലെത്തി രേഖപ്പെടുത്തി. ഗാര്‍ഹിക പീഡനം, ആത്മഹത്യാ പ്രേരണ എന്നിവ ചുമത്തി കേസെടുത്ത ഉണ്ണിക്കൃഷ്ണനെ ഇന്നു നാട്ടിലെത്തിക്കും.

ഉണ്ണിക്കൃഷ്ണന്‍ വിദേശത്തേക്കു കടക്കാന്‍ ശ്രമിക്കവേ മുംബൈ വിമാനത്താവളത്തില്‍ വച്ചാണ് പിടിയിലായത്. ലുക്ക് ഔട്ട് നോട്ടിസിന്റെ അടിസ്ഥാനത്തിലാണ് തടഞ്ഞുവച്ചത്. കഴിഞ്ഞ ദിവസം മുംബൈയിലെത്തിയ പൂന്തുറ പൊലീസ് സംഘം ഇയാളെ അന്ധേരി ഫസ്റ്റ് ക്ലാസ് ജുഡീഷ്യല്‍ മജിസ്‌ട്രേറ്റിനു മുന്നില്‍ ഹാജരാക്കി കേരളത്തിലെത്തിക്കുന്നതിനുള്ള അനുമതി നേടിയിരുന്നു.