ഗുരുവായൂർ എ.സി.പി സി. പ്രേമാനന്ദകൃഷ്ണന് വിശിഷ്ട സേവനത്തിനുള്ള രാഷ്ട്രപതിയുടെ പൊലീസ് മെഡൽ. കേരളത്തിൽ നിന്നുള്ള പത്ത് പൊലീസ് ഉദ്യോഗസ്ഥർക്കും മൂന്ന് അഗ്നിരക്ഷസേന ഉദ്യോഗസ്ഥർക്കുമാണ് സ്തുത്യർഹ സേവനത്തിനുള്ള രാഷ്ട്രപതിയുടെ മെഡൽ ലഭിച്ചിട്ടുള്ളത്.

ഒറ്റപ്പാലം കരിമ്പുഴ കോട്ടപ്പുറം സ്വദേശിയായ പ്രേമാനന്ദകൃഷ്ണൻ തന്റെ പൊലീസ് ജീവിതം ആരംഭിച്ചത് ഗുരുവായൂരിൽ നിന്നാണ്. 2004ൽ പ്രൊബേഷൻ എസ്.ഐ ആയി ഗുരുവായൂർ സ്റ്റേഷനിൽ എത്തിയ ഇദ്ദേഹം ജൂനിയർ എസ്.ഐ, പ്രിൻസിപ്പൽ എസ്.ഐ, ഇൻസ്‌പെക്ടർ എന്നീ തസ്തികകളിൽ ഗുരുവായൂർ സ്റ്റേഷനിൽ സേവനം ചെയ്തു.

കഴിഞ്ഞ വർഷം മുതൽ ഗുരുവായൂർ എ.സി.പിയാണ്. ടെമ്പിൾ സ്റ്റേഷനിലും ഗുരുവായൂർ സ്റ്റേഷനിലും ഇൻസ്‌പെക്ടറായി സേവനം ചെയ്യാനുള്ള നിയോഗവും ലഭിക്കുകയായിരുന്നു. പൊലീസ് സേനയിലെത്തുന്നതിനു മുമ്പേ അദ്ദേഹം അധ്യാപകനായിരുന്നു. പാരലൽ കോളജിലും കോഓപറേറ്റിവ് കോളജിലും എംപ്ലോയ്‌മെന്റ് എക്‌സ്ചേഞ്ച് മുഖേന സ്‌കൂൾ അധ്യാപകനായും സേവനം അനുഷ്ഠിച്ചിട്ടുണ്ട്.