വീട്ടുകാരെയും നാട്ടുകാരെയും ബാങ്കില്‍ ജോലിയുണ്ടെന്ന് പറഞ്ഞ് വിശ്വസിപ്പിച്ച് സ്വര്‍ണാഭരണങ്ങള്‍ തട്ടിയെടുത്ത യുവതി ഡല്‍ഹിയില്‍ അറസ്റ്റില്‍. ബന്ധുക്കളില്‍ നിന്നും സുഹൃത്തുക്കളില്‍ നിന്നുമാണ് ഇവര്‍ ലക്ഷക്കണക്കിന് രൂപയുടെ ആഭരണങ്ങള്‍ തട്ടിയെടുത്തത്. അടിമാലി വിശ്വദീപ്തി സ്‌കൂളിനടുത്ത് താമസിക്കുന്ന കൊച്ചനാട്ടില്‍ അരുണിന്റെ ഭാര്യ അനുഷയെ (35) ആണ് അടിമാലി പൊലീസ് പിടിയിലായത്.

2019മുതല്‍ കോതമംഗലത്തുള്ള ബാങ്കിലെ ജീവനക്കാരിയാണെന്നാണ് അനുഷ എല്ലാവരെയും പറഞ്ഞ് വിശ്വസിപ്പിച്ചത്. ജോലിക്ക് പോകാനെന്ന വ്യാജേന ദിവസവും വീട്ടില്‍ നിന്ന് ഇറങ്ങും. ബാങ്കില്‍ സ്വര്‍ണം നിക്ഷേപിച്ചാല്‍ കൂടുതല്‍ പലിശ ലഭിക്കുമെന്ന് പറഞ്ഞാണ് ഇവര്‍ സുഹൃത്തുക്കളെയും ബന്ധുക്കളെയും കബിളിപ്പിച്ചത്. ഇത്തരത്തില്‍ ലഭിച്ച സ്വര്‍ണാഭരണങ്ങള്‍ അനുഷ കൈക്കലാക്കുകയായിരുന്നു.

കഴിഞ്ഞവര്‍ഷം ഡിസംബര്‍ 21ന് പ്രമോഷന് വേണ്ടിയുള്ള ഇന്റര്‍വ്യൂ ഉണ്ടെന്ന് പറഞ്ഞ് വീട്ടില്‍ നിന്നിറങ്ങിയ അനുഷ പിന്നീട് തിരിച്ചെത്തിയതേയില്ല. ഭാര്യയെ കാണാതായതോടെ അരുണ്‍ കോതമംഗലത്തെ ബാങ്ക് ശാഖയില്‍ അന്വേഷിച്ചെത്തിയപ്പോഴാണ് ഞെട്ടിക്കുന്ന വിവരങ്ങള്‍ അറിഞ്ഞത്. അനുഷ എന്ന പേരില്‍ ഒരാള്‍ അവിടെ ജോലി ചെയ്യുന്നില്ലെന്നായിരുന്നു ബാങ്ക് അധികൃതര്‍ വ്യക്തമാക്കിയത്. ഇതോടെ വര്‍ഷങ്ങളായി നീണ്ടുനിന്ന അനുഷയുടെ നാടകം പൊളിഞ്ഞു.

എട്ട് വര്‍ഷം മുമ്പായിരുന്നു അനുഷയുടെയും അരുണിന്റെയും വിവാഹം. 2019ല്‍ അരുണ്‍ വിദേശത്തേക്ക് പോയ സമയത്താണ് തനിക്ക് ബാങ്കില്‍ ജോലി ലഭിച്ചെന്ന് പറഞ്ഞ് പരത്തിയത്. പിന്നീട് വിദേശത്തുനിന്ന് അരുണ്‍ മടങ്ങിയെത്തിയ ശേഷവും ബാങ്ക് ഉദ്യോഗസ്ഥ ചമഞ്ഞ് അനുഷ തട്ടിപ്പ് തുടര്‍ന്നു. സ്വര്‍ണം നിക്ഷേപിച്ചവര്‍ തിരികെ ചോദിച്ചു തുടങ്ങിയതോടെയാണ് ഇവര്‍ ഡല്‍ഹിയിലേക്ക് കടന്നതെന്നാണ് വിവരം. ഡല്‍ഹിയിലെ ബന്ധുവീട്ടില്‍ ഒളിവില്‍ കഴിയുകയായിരുന്ന അനുഷയെ മൊബൈല്‍ ടവര്‍ കേന്ദ്രീകരിച്ച് നടത്തിയ അന്വേഷണത്തിലാണ് പൊലീസ് കണ്ടെത്തിയത്.