തിരുവല്ല സ്പായിലെ ഗുണ്ടാ ആക്രമണത്തിലും ബലാത്സംഗത്തിലും വിശദീകരണവുമായി ജില്ലാ പൊലീസ് മേധാവി ആര്‍.ആനന്ദ്. പൊലീസിന്റെ ഭാഗത്തുനിന്ന് വീഴ്ചയുണ്ടായിട്ടില്ലെന്നും സംഭവത്തില്‍ പരാതി ലഭിച്ചിരുന്നില്ലെന്നും അദ്ദേഹം വ്യക്തമാക്കി. വിവരമറിഞ്ഞതിന് പിന്നാലെ സമയബന്ധിതമായി നടപടിയെടുത്തു. സ്പാകളില്‍നിന്ന് പൊലീസുകാര്‍ മാസപ്പടി വാങ്ങുന്നതായി ശ്രദ്ധയില്‍പ്പെട്ടിട്ടില്ല. നേരത്തേ ഇത്തരം വിഷയങ്ങള്‍ ശ്രദ്ധയില്‍പ്പെട്ടപ്പോള്‍ ബന്ധപ്പെട്ടവര്‍ക്കെതിരേ ഉടനടി നടപടി സ്വീകരിച്ചിട്ടുണ്ടെന്നും അദ്ദേഹം വ്യക്തമാക്കി.

''ഫെബ്രുവരി ഒന്നാം തീയതിയാണ് സംഭവമുണ്ടായത്. ആരും പരാതി തന്നിരുന്നില്ല. രണ്ടാം തീയതി ഉദ്യോഗസ്ഥര്‍ക്ക് ഇതേക്കുറിച്ച് വിവരം ലഭിച്ചപ്പോള്‍ തനിക്കും എസ്എച്ച്ഒയ്ക്കും അത് കൈമാറി. ജീവനക്കാരുടെ മൊഴിയെടുത്ത് കേസെടുത്തു. ഉടന്‍തന്നെ പ്രധാന പ്രതിയായ സുബിന്‍ അലക്‌സാണ്ടറിനെയും രണ്ടാംപ്രതിയായ ബെര്‍ലിന്‍ദാസിനെയും പിടികൂടി. ബാക്കി പ്രതികള്‍ക്കായി തിരുവല്ല ഡിവൈഎസ്പിയുടെ നേതൃത്വത്തില്‍ പ്രത്യേകസംഘം അന്വേഷണം നടത്തുകയാണ്. അന്വേഷണം നല്ല രീതിയില്‍ മുന്നോട്ടുപോകും. സംഭവം ക്വട്ടേഷന്‍ ആണോ എന്ന് വ്യക്തമല്ല.

സ്പാ ഉടമയില്‍നിന്ന് മൊഴിയെടുത്തു. കേസില്‍ വീഴ്ചയുണ്ടായിട്ടില്ല. പണം ചോദിച്ചാണ് പ്രതികള്‍ സ്പായില്‍വന്നത്. പണം കൊടുക്കാത്തതിനാണ് ക്രൂരമായ കൃത്യം നടത്തിയത്. സംഭവത്തിലെ അതിജീവിതയ്ക്ക് പൊലീസ് നിയമസഹായവും കൗണ്‍സിലിങ്ങും നല്‍കും. ജില്ലയിലെ കാപ്പാ പ്രതികളെ മുഴുവന്‍സമയവും നിരീക്ഷിക്കും. ഡിജിറ്റല്‍ നിരീക്ഷണമടക്കം ഉണ്ടാകും'' – ജില്ലാ പൊലീസ് മേധാവി വ്യക്തമാക്കി.