ആറ്റുകാല് പൊങ്കാല മഹോത്സവത്തിന്റെ ഒരുക്കങ്ങള് വിലയിരുത്തി മന്ത്രി വി ശിവന്കുട്ടി
ആറ്റുകാല് പൊങ്കാല മഹോത്സവത്തിന്റെ ഒരുക്കങ്ങള് വിലയിരുത്തി മന്ത്രി വി ശിവന്കുട്ടിയുടെ നേതൃത്വത്തില് തിരുവനന്തപുരത്ത് അവലോകനയോഗം ചേര്ന്നു. ഫെബ്രുവരി 23 മുതല് മാര്ച്ച് നാല് വരെ നടക്കുന്ന ഉത്സവത്തിന്റെ ഭാഗമായുള്ള എല്ലാ നിര്മ്മാണ അറ്റകുറ്റപ്പണികളും ഫെബ്രുവരി 20ന് മുമ്പ് തന്നെ പൂര്ത്തിയാക്കാന് ഉദ്യോഗസ്ഥര്ക്ക് മന്ത്രി കര്ശന നിര്ദ്ദേശം നല്കിയിട്ടുണ്ട്.
ഈ ഘട്ടത്തില് എല്ലാ വകുപ്പുകളുടെയും യോജിച്ചുള്ള പ്രവര്ത്തനമാണ് അത്യന്താപേക്ഷിതം. ഉത്സവ മേഖലകളായി പ്രഖ്യാപിച്ച വാര്ഡുകളിലെ തെരുവ് വിളക്കുകളുടെ അറ്റകുറ്റപ്പണി ഉടന് പൂര്ത്തിയാക്കണമെന്നും ഗ്രീന് പ്രോട്ടോക്കോള് കര്ശനമായി പാലിക്കണമെന്നും യോഗത്തില് മന്ത്രി ആവശ്യപ്പെട്ടു. സുരക്ഷാ ക്രമീകരണങ്ങളുടെ ഭാഗമായി ഇത്തവണ അഞ്ച് അധിക വാച്ച് ടവറുകള് പോലീസ് സജ്ജമാക്കും. കൂടാതെ 76 സിസിടിവി ക്യാമറകളും 14 കേന്ദ്രങ്ങളില് ബാരിക്കേഡുകളും ഒരുക്കി സുരക്ഷ ശക്തമാക്കും.
ഭക്തജനങ്ങളുടെ ആരോഗ്യ സുരക്ഷയ്ക്കായി ഫെബ്രുവരി 23 മുതല് ക്ഷേത്രപരിസരത്ത് മെഡിക്കല് ടീമിന്റെ സേവനം ലഭ്യമാക്കും. അടിയന്തര സാഹചര്യം നേരിടാന് സര്ക്കാര് സ്വകാര്യ ആശുപത്രികളില് പ്രത്യേക സൗകര്യങ്ങള് ഒരുക്കാന് മന്ത്രി ഡിഎംഒയ്ക്ക് നിര്ദ്ദേശം നല്കി. നഗരസഭയുടെ നേതൃത്വത്തില് ശുചീകരണ പ്രവര്ത്തനങ്ങള്ക്കും മൊബൈല് ടോയ്ലറ്റുകള് സ്ഥാപിക്കുന്നതിനും ആവശ്യമായ നടപടികള് സ്വീകരിച്ചു വരികയാണ്.
പൊങ്കാലയ്ക്ക് ശേഷം റോഡുകളില് നിന്ന് ഇഷ്ടികകള് നീക്കം ചെയ്യുന്നതിനും പ്രത്യേക ക്രമീകരണം ഉണ്ടാകും. ഗതാഗത സൗകര്യത്തിനായി കെഎസ്ആര്ടിസി ആകെ 950ഓളം ബസുകള് പ്രത്യേക സര്വീസിനായി നിയോഗിക്കും. ഇതില് 700ഓളം ബസുകള് സാധാരണ സര്വീസിനും 250 ബസുകള് തീര്ത്ഥാടന ടൂറിസത്തിന്റെ ഭാഗമായും ഓടും. സിറ്റി ഷട്ടില് സര്വ്വീസിനായി 25 ബസുകള് വേറെയും സജ്ജമാക്കിയിട്ടുണ്ടെന്ന് മന്ത്രി വ്യക്തമാക്കി.
പൊതുമരാമത്ത് വകുപ്പിന്റെ കീഴിലുള്ള റോഡുകളുടെ ടാറിംഗ് ജോലികള് ഫെബ്രുവരി 15നകം പൂര്ത്തിയാക്കും. അഗ്നിശമന സേനയുടെ 400 ഉദ്യോഗസ്ഥരെയും രണ്ട് ഫയര് എന്ജിനുകളെയും സുരക്ഷയ്ക്കായി വിന്യസിക്കും. എക്സൈസ് വകുപ്പിന്റെ നേതൃത്വത്തില് ലഹരി വിരുദ്ധ പരിശോധനകളും കണ്ട്രോള് റൂം സേവനവും ലഭ്യമാക്കും.
മലിനീകരണ നിയന്ത്രണ ബോര്ഡിന്റെ നേതൃത്വത്തില് വായുവിന്റെ ഗുണനിലവാരവും ശബ്ദനിലയും നിരീക്ഷിക്കാന് പ്രത്യേക സ്ക്വാഡുകളെ നിയോഗിച്ചിട്ടുണ്ട്. ജില്ലാ ഭരണകൂടത്തിന്റെയും ദുരന്തനിവാരണ വിഭാഗത്തിന്റെയും കണ്ട്രോള് റൂമുകള് ക്ഷേത്ര പരിസരത്ത് സജീവമായി പ്രവര്ത്തിക്കുമെന്നും ശിവന്കുട്ടി അറിയിച്ചു.
https://www.facebook.com/Malayalivartha
