ശബരിമല സ്വര്ണക്കൊള്ള; കട്ടിളപ്പാളികളുടെ കാലപ്പഴക്കത്തില് ആശയക്കുഴപ്പം
ശബരിമലയില് നിന്നും കടത്തിക്കൊണ്ടുപോയ കട്ടിളപ്പാളികളുടെ കാലപ്പഴക്കത്തെക്കുറിച്ച് ആശയക്കുഴപ്പം തുടരുന്നു. വിഎസ്എസ്സി നടത്തിയ സാമ്പിള് പരിശോധനയിലെ അന്തിമഫലം വന്നെങ്കിലും സ്വര്ണം പൊതിഞ്ഞ ചെമ്പുപാളികള് പൂര്ണമായി മാറ്റി പുതിയ പാളികള് സ്ഥാപിക്കുകയായിരുന്നോ എന്ന കാര്യത്തില് വ്യക്തതയില്ല.
നിലവിലെ ആശയക്കുഴപ്പം പരിഹരിക്കാനായി വീണ്ടും സാമ്പിളുകള് ശേഖരിച്ച് കൂടുതല് സൗകര്യമുള്ള മറ്റൊരു ലാബില് കൂടി പരിശോധന നടത്തും. നഷ്ടമായ സ്വര്ണത്തിന്റെ ഏകദേശ കണക്കും തുടര് പരിശോധനയുടെ ആവശ്യവും വ്യക്തമാക്കി അന്വേഷണസംഘം നാളെ ഹൈക്കോടതിയില് റിപ്പോര്ട്ട് നല്കും.
ശബരിമലയില് നിന്നും കടത്തി കൊണ്ടുപോയ സ്വര്ണപാളികള് മറിച്ചുവിറ്റശേഷം പുതിയ പാളികളാണോ സ്ഥാപിച്ചതെന്ന കാര്യം ഇപ്പോഴും ദുരൂഹമാണ്. ശാസ്ത്രീയ പരിശോധനാഫലം പുറത്തുവരുമ്പോള് സംശയങ്ങള്ക്ക് ഉത്തരം കിട്ടുമെന്നായിരുന്നു അന്വേഷണ സംഘത്തിന്റെ പ്രതീക്ഷ.
1998ല് മെര്ക്കുറി ഉപയോഗിച്ചാണ് കട്ടിളപ്പാളികളില് യുബി ഗ്രൂപ് സ്വര്ണം പൊതിഞ്ഞത്. എന്നാല്, ചില പാളികളില് മെര്ക്കുറിയുടെ സാനിധ്യം തീരെയില്ല. ഇതാണ് സ്വര്ണപാളികള് പൂര്ണമായി കടത്തിയിട്ടുണ്ടോയെന്ന സംശയം ബലപ്പെടുത്തുന്നത്. ശബരിമലയിലെ സ്ട്രോങ് റൂമിലുണ്ടായിരുന്ന പഴയ വാതിലില് നിന്നും സാമ്പിള് ശേഖരിച്ച് താരതമ്യ പരിശോധന നടത്തിയിരുന്നു. ശാസ്ത്രീയ പരിശോധനാ റിപ്പോര്ട്ടിലും ഈ ചോദ്യത്തിന് ഉത്തരമില്ല. മാസപൂജയ്ക്ക് അടുത്ത ആഴ്ച നട തുറന്നതിനുശേഷം വീണ്ടും സ്വര്ണപാളികളുടെ സാമ്പിളുകള് ശേഖരിച്ച് കൂടുതല് മികച്ച ലാബില് പരിശോധന നടത്താനാണ് എസ്ഐടിയുടെ നീക്കം.
https://www.facebook.com/Malayalivartha
