ശബരിമലയില്‍ നടന്ന അയ്യപ്പ സംഗമം ശുദ്ധമായ ധൂര്‍ത്താണെന്ന് മുതിര്‍ന്ന കോണ്‍ഗ്രസ് നേതാവ് കെ. മുരളീധരന്‍. പരിപാടിക്കായി 500 കട്ടിലുകള്‍ വാങ്ങിയെന്ന കണക്കുകളെ പരിഹസിച്ച അദ്ദേഹം, സംഗമത്തിനെത്തിയവര്‍ അവിടെ കിടന്നുറങ്ങാനാണോ പോയതെന്ന് ചോദിച്ചു.

4000 പേര്‍ പങ്കെടുത്ത പരിപാടിയില്‍ 8000 പേര്‍ ഭക്ഷണം കഴിച്ചുവെന്ന് പറയുന്നത് എങ്ങനെയാണെന്നും, വിഗ്രഹം സ്വര്‍ണ്ണം അല്ലാത്തതുകൊണ്ട് മാത്രമാണ് അത് ബാക്കിയായതെന്നും അദ്ദേഹം പരിഹസിച്ചു.

മന്ത്രി വി.എന്‍ വാസവനെതിരെ രൂക്ഷമായ വ്യക്തിപരമായ പരാമര്‍ശങ്ങള്‍ നടത്തിയ മുരളീധരന്‍, നിയമസഭയെ തെറ്റിദ്ധരിപ്പിച്ചതിന് മന്ത്രിക്കെതിരെ അവകാശലംഘനത്തിന് നോട്ടീസ് നല്‍കുമെന്നും വ്യക്തമാക്കി.

സര്‍ക്കാരിന്റെ നടപടി വീരപ്പനെപ്പോലും തോല്‍പ്പിക്കുന്ന കൊള്ളയാണെന്ന് അദ്ദേഹം കുറ്റപ്പെടുത്തി. ഈ അഴിമതിയില്‍ ഒത്തുതീര്‍പ്പിന് തങ്ങളില്ലെന്നും നിയമസഭയ്ക്കകത്തും പുറത്തും ശക്തമായ പ്രതിഷേധം തുടരുമെന്നും അദ്ദേഹം കൂട്ടിച്ചേര്‍ത്തു. 'ഞാന്‍ ഭയന്നോടുന്നവനല്ല' എന്ന് വ്യക്തമാക്കിയ മുരളീധരന്‍, ഏത് വെല്ലുവിളിയെയും നേരിടാന്‍ തയ്യാറാണെന്ന് പ്രഖ്യാപിച്ചു. അയ്യപ്പ സംഗമ വിവാദത്തില്‍ മന്ത്രി വി.എന്‍ വാസവന്‍ രാജിവെക്കണമെന്ന നിലപാടില്‍ ഉറച്ചുനില്‍ക്കുകയാണ് മുരളീധരനും യു.ഡി.എഫും.