പാരമ്പര്യമായി നിലനില്ക്കുന്ന ആചാരങ്ങള് സംരക്ഷിക്കുക എന്ന നിലപാടില് സംഘടനയ്ക്ക് മാറ്റമില്ലെന്ന് എന്എസ്എസ്
ശബരിമല യുവതീപ്രവേശന വിഷയത്തില് തങ്ങളുടെ നിലപാട് വ്യക്തമാക്കി നായര് സര്വീസ് സൊസൈറ്റി (എന്എസ്എസ്). പാരമ്പര്യമായി നിലനില്ക്കുന്ന ആചാരങ്ങള് സംരക്ഷിക്കുക എന്ന നിലപാടില് സംഘടനയ്ക്ക് മാറ്റമില്ലെന്നും, സര്ക്കാര് ഇക്കാര്യത്തില് അനുകൂലമായ നിലപാട് സ്വീകരിക്കുമെന്ന് പ്രതീക്ഷിക്കുന്നതായും എന്എസ്എസ് ജനറല് സെക്രട്ടറി ജി. സുകുമാരന് നായര് പറഞ്ഞു.
യുവതീപ്രവേശനത്തിന് അനുകൂലമായിട്ടാണ് സംസ്ഥാന സര്ക്കാര് നേരത്തെ സത്യവാങ്മൂലം നല്കിയതെങ്കിലും അടുത്ത കാലത്തായി സര്ക്കാര് ഇതില് മൗനമായി ചില മാറ്റങ്ങള് വരുത്തിയിട്ടുണ്ടെന്ന് സുകുമാരന് നായര് ചൂണ്ടിക്കാട്ടി. സുപ്രീംകോടതി വിധിയില് അന്തിമ തീരുമാനം വരാത്ത പശ്ചാത്തലത്തില്, കഴിഞ്ഞ ആറേഴ് വര്ഷമായി യുവതീപ്രവേശം തടഞ്ഞുകൊണ്ടുള്ള നടപടികളാണ് സര്ക്കാര് ഭാഗത്തുനിന്നുണ്ടായത്. അലിഖിതമായിട്ടാണെങ്കിലും ആചാരങ്ങള് സംരക്ഷിക്കുന്ന നിലപാടാണ് സര്ക്കാര് സ്വീകരിച്ചുവരുന്നത് എന്നദ്ദേഹം കൂട്ടിച്ചേര്ത്തു.
ശബരിമല വിഷയത്തില് ആചാരങ്ങള്ക്കായി കോടതിയില് സജീവമായി ഇടപെട്ടത് എന്എസ്എസ് മാത്രമാണെന്ന് സുകുമാരന് നായര് അവകാശപ്പെട്ടു. 'പഴയ വാശിയിലും ഉശിരിലും കേസ് തുടരും. കോടതിയില് സര്ക്കാര് ഇനി എന്ത് പറയാന് പോകുന്നു എന്ന് വ്യക്തമല്ല. സര്ക്കാരുമായി താന് ഇക്കാര്യത്തില് ബന്ധപ്പെട്ടിട്ടില്ല. കോടതി വിധി വരുന്നതുവരെ കാത്തിരിക്കേണ്ടതുണ്ട്,' അദ്ദേഹം വ്യക്തമാക്കി. സര്ക്കാരിന് വേണമെങ്കില് കോടതിയില് സത്യവാങ്മൂലം തിരുത്തി സമര്പ്പിക്കാമെന്നും അത് അവര് നിയമപരമായി ചെയ്യേണ്ടതാണെന്നും എന്എസ്എസ് സെക്രട്ടറി പറഞ്ഞു.
ശബരിമല വിഷയം നിയമസഭാ തിരഞ്ഞെടുപ്പിനെ ബാധിക്കുമോ എന്ന ചോദ്യത്തിന് ഇപ്പോള് പ്രതികരിക്കാനാവില്ലെന്ന് സുകുമാരന് നായര് പറഞ്ഞു. കേന്ദ്ര സര്ക്കാര് ഈ വിഷയത്തില് ഭക്തര്ക്കായി ഒന്നും ചെയ്തില്ലെന്ന വിമര്ശനവും അദ്ദേഹം ആവര്ത്തിച്ചു. വിഷയത്തില് മറ്റ് രാഷ്ട്രീയ പാര്ട്ടികളാരും കക്ഷിയായിട്ടില്ലെന്നും വിശ്വാസ സംരക്ഷണത്തിനായി എന്എസ്എസ് ഒറ്റയ്ക്കാണ് പോരാടുന്നതെന്നും അദ്ദേഹം വ്യക്തമാക്കി.
https://www.facebook.com/Malayalivartha
