പ്രതിഷേധ പ്രകടനത്തിനിടെ പ്രകോപനപരമായ മുദ്രാവാക്യം വിളിച്ചതില്‍ സിപിഎം നേതാവ് ചിന്ത ജെറോം ഉള്‍പ്പെടെ 55 പേര്‍ക്കെതിരെ കേസ്. ആരോഗ്യമന്ത്രി വീണാ ജോര്‍ജിന് കെഎസ്‌യു പ്രവര്‍ത്തകരുടെ പ്രതിഷേധത്തിനിടെ പരുക്കേറ്റ സംഭവത്തില്‍ പ്രതിഷേധിച്ച് നടന്ന പ്രകടനത്തിനിടെ ചിന്ത അടക്കമുള്ളവര്‍ പ്രകോപനപരവും സ്ത്രീവിരുദ്ധവുമായി മുദ്രാവാക്യം വിളിച്ചെന്ന പരാതിയിലാണ് കൊല്ലം ഇരവിപുരം പൊലീസ് കേസെടുത്തത്.

സമൂഹത്തില്‍ സ്പര്‍ധയുണ്ടാക്കി കലഹം സൃഷ്ടിക്കണമെന്ന ഉദ്ദേശ്യത്തോടെ സംഘം ചേര്‍ന്ന് ജാഥ നടത്തിയെന്ന് എഫ്‌ഐആറില്‍ പറയുന്നു. ഡിവൈഎഫ്‌ഐ കൊല്ലം ഈസ്റ്റ് ബ്ലോക്ക് കമ്മിറ്റിയുടെ പ്രകടനത്തിലാണ് സ്ത്രീവിരുദ്ധ മുദ്രാവാക്യങ്ങളുണ്ടായത്. സംഭവം വിവാദമായതിനു പിന്നാലെ ചിന്ത വിശദീകരണവുമായി രംഗത്തെത്തിയിരുന്നു.

സമൂഹമാധ്യമങ്ങളില്‍ പ്രചരിക്കുന്നത് വിഡിയോയുടെ ഒരു ഭാഗം മാത്രമാണെന്ന് ചിന്ത പറഞ്ഞു. പ്രതിഷേധപ്രകടനം നടക്കുമ്പോള്‍ വൈകാരികമായി മുദ്രാവാക്യം വിളിക്കുന്നത് സ്വാഭാവികമാണ്. എന്നാല്‍ സ്ത്രീകള്‍ക്കും അരികുവല്‍ക്കരിക്കപ്പെട്ടവര്‍ക്കും ഒപ്പം നില്‍ക്കുന്ന പുരോഗമന രാഷ്ട്രീയമാണ് സിപിഎമ്മിന്റേത്. എല്ലാക്കാലത്തും സ്തീപക്ഷ നിലപാട് ഉയര്‍ത്തിപ്പിടിക്കുന്ന ആളാണ് താന്‍. ഇത്തരം ആരോപണങ്ങള്‍ വേദനിപ്പിക്കുന്നുണ്ട്. മുദ്രാവാക്യം ഏറ്റുവിളിച്ചിട്ടില്ലെന്നും അങ്ങനെയുണ്ടായപ്പോള്‍ തിരുത്താനാണ് ശ്രമിച്ചതെന്നും ചിന്ത പറഞ്ഞു.