പൊങ്കാലയ്ക്കെത്തുന്ന ഭക്തര്ക്ക് വിശ്രമിക്കാനായി വീടുകളും മസ്ജിദുകളും തുറന്നുനല്കണമെന്ന് പാളയം ഇമാം
നോമ്പാണെങ്കിലും ആറ്റുകാല് പൊങ്കാലയ്ക്കെത്തുന്ന ഭക്തര്ക്ക് ആവശ്യമായ സൗകര്യങ്ങള് ഒരുക്കാന് എല്ലാവരും മുന്നിട്ടിറങ്ങണമെന്നും അവര്ക്ക് വിശ്രമിക്കാനായി വീടുകളും മസ്ജിദുകളും തുറന്നുനല്കണമെന്നും പാളയം ഇമാം വി.പി. സുഹൈബ് മൗലവി. പലയിടങ്ങളില് നിന്നായി ഒഴുകിയെത്തുന്ന സ്ത്രീകളും കുട്ടികളും ഉള്പ്പെടെയുള്ള ഭക്തരെ സ്വീകരിക്കേണ്ടത് ഓരോരുത്തരുടെയും കടമയാണെന്ന് ജുമാ നമസ്കാരത്തിനിടെ നടത്തിയ പ്രസംഗത്തില് ഇമാം ഓര്മ്മിപ്പിച്ചു. ഇമാമിന്റെ പ്രസംഗം സോഷ്യല് മീഡിയയിലടക്കം നിമിഷങ്ങള്ക്കുള്ളില് വൈറലായി.
റംസാന് നോമ്പുകാലമായതിനാല് വീടുകളില് പകല് സമയം ഭക്ഷണവും പാനീയങ്ങളും ഉണ്ടാകില്ലെങ്കിലും പൊങ്കാലയ്ക്കെത്തുന്നവര്ക്കായി അവ പ്രത്യേകം കരുതണമെന്ന് അദ്ദേഹം പറഞ്ഞു. ഇത്തരത്തിലുള്ള സ്നേഹത്തിന്റെയും സാഹോദര്യത്തിന്റെയും ഇടപെടലുകളിലൂടെ മാത്രമേ വിദ്വേഷത്തെയും ഇസ്ലാമോഫോബിയയെയും പ്രതിരോധിക്കാന് സാധിക്കൂ എന്നും ജാതിമത വ്യത്യാസമില്ലാതെ ഇത്തരം പ്രവര്ത്തനങ്ങള് അല്ലാഹു അവന്റെ പ്രീതിയിലേക്ക മാറ്റുമെന്നും അദ്ദേഹം കൂട്ടിച്ചേര്ത്തു.
എല്ലാവര്ഷവും പാളയം ജുമാ മസ്ജിദിന്റെയും സെന്റ് ജോസഫ് പള്ളിയുടെയും നേതൃത്വത്തില് ആറ്റുകാല് പൊങ്കാലയ്ക്കെത്തുന്ന ഭക്തര്ക്ക് സൗകര്യങ്ങള് ഒരുക്കാറുണ്ട്. അവര്ക്ക് വിശ്രമിക്കാനും പ്രാഥമിക കൃത്യങ്ങള് നിര്വഹിക്കാനുമായി പള്ളിയിലെ പ്രാര്ത്ഥനാ സമയക്രമത്തില് പോലും മാറ്റം വരുത്താറുണ്ട്.
https://www.facebook.com/Malayalivartha
