ഗന്ധർവ്വ സംഗീതവും സ്ത്രീശാക്തീകരണവും ഇഴചേർന്ന വേറിട്ട സാംസ്‌കാരിക വിരുന്നിന് ഭാരത് ഭവൻ വേദിയായി. സ്വാതിതിരുനാൾ സംഗീത കോളേജ് വിദ്യാർത്ഥിയായിരിക്കെ യേശുദാസ് താമസിച്ചിരുന്ന ഭാരത് ഭവനിലെ കെട്ടിടം യേശുദാസ് ഡിജിറ്റൽ ലൈബ്രറിയാക്കുന്നതിന്റെ ഭാഗമായുള്ള നവീകരണോദ്ഘാടനം സാംസ്‌കാരിക വകുപ്പ് മന്ത്രി സജി ചെറിയാൻ നിർവ്വഹിച്ചു. ഗ്രാമഫോൺ ഓൺ ചെയ്ത് ‘മനുഷ്യൻ  മതങ്ങളെ സൃഷ്ടിച്ചു’ എന്ന ഗാനത്തോടെയാണ് സജി ചെറിയാൻ ഉദ്‌ഘാടനം നിർവ്വഹിച്ചത്. ഡിജിറ്റൽ സംഗീതം, ഗ്രാമഫോൺ സംഗീതം, യേശുദാസിന്റെ അപൂർവ്വ ഫോട്ടോകൾ എന്നിവയ്‌ക്കൊപ്പം മുൻ സാംസ്‌കാരിക വകുപ്പ് മന്ത്രി എം.എ. ബേബി യുടെ സംഗീത ശേഖരത്തിൽ നിന്നും ലഭിച്ച അന്തർ  ദേശീയ തലത്തിൽ ശ്രദ്ധേയരായ സംഗീതഞ്ജരുടെ  സംഗീതവും യേശുദാസ് ഡിജിറ്റൽ ലൈബ്രറിയിൽ കേട്ടിരുന്ന് ആസ്വദിക്കാം.

രാവിലെ 10 മണി മുതൽ ശെമ്മാങ്കുടി ഹൈക്യു തിയേറ്ററിൽ, സ്വാതി തിരുനാൾ സംഗീത കോളേജ്, സംഗീത ഭാരതി, പാട്ടുപുര മ്യൂസിക് ബാൻഡ് എന്നീ സംഗീത സംഘങ്ങൾ  ഗാനഗന്ധർവ്വന്റെ  പാട്ടുകൾ ആലപിച്ചു.  ഒപ്പം യേശുദാസിനെ ദേശീയ പുരസ്കാരങ്ങൾക്ക് അർഹനാക്കിയ എട്ട് പാട്ടുകൾ അഷ്ടഗാനമാലികയായി ചലച്ചിത്ര പിന്നണി ഗായകൻ രവിശങ്കറും   വയലാർ രാമവർമ്മ സാംസ്കാരിക വേദി ഗായക സംഘത്തിലെ  50 പേരും ചേർന്ന് ആലപിച്ചു. ഇതിനൊപ്പം  ചിത്രകാരൻ  കാരയ്ക്കാമണ്ഡപം വിജയകുമാറിന്റെ നേതൃത്വത്തിലുഉള്ള കലാസംഘങ്ങൾ   തൽസമയ ചിത്രങ്ങൾ ഗ്രാഫിറ്റി വാളിൽ  രേഖപ്പെടുത്തി.   

ഭാരത് ഭവൻ മെമ്പർ സെക്രട്ടറി  ഡോ. പ്രമോദ് പയ്യന്നൂർ റിപ്പോർട്ട് അവതരിപ്പിച്ച് തുടങ്ങിയ ചടങ്ങിൽ പന്തളം ബാലൻ, അഖില ആനന്ദ്, അനു പ്രവീൺ എന്നിവർ മാനവ ഗീതം ആലപിച്ചു. ഡോ. ദിവ്യ എസ് അയ്യർ ആധ്യക്ഷയായി പത്മശ്രീ ഡോ. ഓമനക്കുട്ടി ടീച്ചർ,  പണ്ഡിറ്റ് രമേശ് നാരായണൻ,  ടി പി ശാസ്തമംഗലം,   കാവാലം ശ്രീകുമാർ, അഖില ആനന്ദ്, ഭാരത് ഭവൻ  എക്സിക്യൂട്ടീവ് അംഗങ്ങളായ ജയ്സപ്പൻ മത്തായി,  ജോസഫ്.കെ. നെല്ലുവേലി, ഡോ. സന്ധ്യ. എസ്. നായർ എന്നിവർ  ചടങ്ങിൽ പങ്കെടുത്തു.

സ്ത്രീധനം, അസമത്വം, പെൺകുട്ടികളോടുള്ള അതിക്രമം തുടങ്ങി സമൂഹത്തിൽ ആപൽക്കരമായി നിലനിൽക്കുന്ന ദുരവസ്ഥകളോട് നീതിപൂർവ്വം പ്രതികരിക്കുന്ന ഫിക്ഷനുകൾ, ശക്തമായ സന്ദേശം നൽകുന്ന റീൽസ്, പ്രതിസന്ധികളോട് പൊരുതി മുന്നേറിയ സ്ത്രീകളുടെ അതിജീവനം മുന്നോട്ട് വയ്ക്കുന്ന ഹ്രസ്വ ഡോക്ക്യുമെന്ററി എന്നീ വിഭാഗങ്ങളിൽ സംഘടിപ്പിച്ച മൈക്രോ ഫിലിം ഫെസ്റ്റിവലിൽ  പുരസ്‌ക്കാര ജേതാക്കളായ കേരളത്തിലെ വിവിധ കലാലയങ്ങളിലെ  വിദ്യാർത്ഥികൾ അവാർഡുകൾ  ഏറ്റു വാങ്ങി. ഡോ. ദിവ്യ എസ് അയ്യർ ഐ. എ. എസ്, പണ്ഡിറ്റ് രമേഷ് നാരായൺ എന്നിവർ സമം സംസ്ഥാനതല മൈക്രോ ഫിലിം  ഫെസ്റ്റിവലിന്റെ   പുരസ്കാര സമർപ്പണം നിർവ്വഹിച്ചു. വൈകുന്നേരം  6.30 ന് മണ്ണരങ്ങിൽ പത്മശ്രീ കലാമണ്ഡലം വിമലമേനോന് ഭാരത് ഭവന്റെ 10 വർഷക്കാലത്തെ ഭരണ സമിതി പ്രതിനിധികൾ മെമ്പർ സെക്രട്ടറിയുടെ സാന്നിധ്യത്തിൽ ഭാരത് ഭവന്റെ സ്നേഹാദരവ് അർപ്പിച്ചു.

തുടർന്ന് മണ്ണരങ്ങിൽ  അമ്പതോളം അഭിനേത്രികൾ അരങ്ങിലെത്തിയ ജാനകിയം ഡാൻസ് തിയേറ്റർ  അവതരണം നിറഞ്ഞ സദസ്സിന് മുന്നിൽ അരങ്ങേറി. പുരാണങ്ങളിലേയും, ഇതിഹാസങ്ങളിലേയും കരുത്താർന്ന സ്ത്രീകഥാപാത്രങ്ങളെ അടയാളപ്പെടുത്തുന്നതിനൊപ്പം  യുദ്ധത്തിനെതിരെയുള്ള സന്ദേശം കൂടി മുന്നോട്ടുവെച്ചത് സദസ്സിന് നവ്യാനുഭവവുമായി.