വിധിയെഴുതാന്‍ കേരളം കാത്തിരിക്കുകയാണെന്നും സംസ്ഥാനത്തെ ദുര്‍ഭരണം അവസാനിക്കാന്‍ ഇനി 26 ദിവസം മാത്രമെയുള്ളൂ എന്നും പതിപക്ഷ നേതാവ് വി.ഡി.സതീശന്‍. ദുര്‍ഭരണത്തിന് അന്ത്യം കുറിച്ച് കേരളത്തിലെ ജനങ്ങള്‍ പുതുയുഗ പിറവിയ്ക്ക് തുടക്കമിടും. പൂര്‍ണമായ പ്രതീക്ഷയോടും നിറഞ്ഞ ആത്മവിശ്വാസത്തോടും കൂടിയാണ് ടീം യുഡിഎഫ് തിരഞ്ഞെടുപ്പിനെ നേരിടുന്നത്. നൂറിലധികം സീറ്റുകളുമായി കേരളത്തില്‍ ടീം യുഡിഎഫ് അധികാരത്തിലേക്ക് തിരിച്ചെത്തും.

അഞ്ച് വര്‍ഷത്തിനിടെ നടന്ന എല്ലാ നിയമസഭ ഉപതിരഞ്ഞെടുപ്പുകളിലും അത്യപൂര്‍വമായ പ്രകടനമാണ് യുഡിഎഫ് കാഴ്ചവച്ചത്. തൃക്കാക്കരയില്‍ പന്ത്രണ്ടായിരം വോട്ടിന്റെ ഭൂരിപക്ഷം 25,000 ആയി വര്‍ധിപ്പിച്ചു. പുതുപ്പള്ളിയില്‍ ഒന്‍പതിനായിരം വോട്ടിന്റെ ഭൂരിപക്ഷം മുപ്പത്തി ഏഴായിരമായി വര്‍ധിപ്പിച്ചു. പാലക്കാട് നാലായിരം വോട്ടിന്റെ ഭൂരിപക്ഷം പതിനെണ്ണായിരമായി വര്‍ധിപ്പിച്ചു. ചേലക്കരയില്‍ സിപിഎമ്മിന് ഉണ്ടായിരുന്ന 40000 വോട്ടിന്റെ ഭൂരിപക്ഷം പന്ത്രണ്ടായിരമായി കുറച്ചു. നിലമ്പൂരില്‍ മൂവായിരം വോട്ടിന് തോറ്റ സ്ഥലത്ത് വിജയിച്ചു.

പാര്‍ലമെന്റ് തിരഞ്ഞെടുപ്പില്‍ 2019നെക്കാള്‍ കൂടുതല്‍ ഭൂരിപക്ഷത്തിന് യുഡിഎഫ് സ്ഥാനാര്‍ഥികള്‍ വിജയിച്ചു. തദ്ദേശ തിരഞ്ഞെടുപ്പില്‍ കഴിഞ്ഞ 30 വര്‍ഷക്കാലത്തെ ഏറ്റവും വലിയ വിജയമാണ് യുഡിഎഫിനുണ്ടായത്. സര്‍ക്കാരിന്റെ തെറ്റായ നടപടികള്‍ ടീം യുഡിഎഫ് കൃത്യമായി ജനങ്ങള്‍ക്ക് മുന്നില്‍ അവതരിപ്പിച്ചിട്ടുണ്ട്. അതിന്റെ പ്രതികരണം ജനങ്ങളില്‍ നിന്നുണ്ടാകും. എവിടെയൊക്കെ സര്‍ക്കാര്‍ പരാജയപ്പെട്ടോ അവിടെയൊക്കെ കേരളത്തെ കൈ പിടിച്ച് എഴുന്നേല്‍പ്പിക്കാനുള്ള പദ്ധതികളും പരിപാടികളുമായാണ് യുഡിഎഫ് മുന്നോട്ട് വരുന്നതെന്നും വി.ഡി.സതീശന്‍ പറഞ്ഞു.