എരുമേലി മുക്കൂട്ടുതറയിലെ സ്വകാര്യ ആശുപത്രിയില്‍ ചികിത്സ തേടിയ രോഗിയും കൂടെ വന്നവരും അകാരണമായി അത്യാഹിത വിഭാഗത്തിലെ ഡോക്ടറെ ആക്രമിച്ചതായി പരാതി. വൈകിട്ട് മൂന്നരയോടെയാണ് അകാരണമായി ഡോക്ടറെ ആക്രമിച്ച് ഭീഷണിപ്പെടുത്തിയ സംഭവം.

തലയ്ക്ക് പെരുപ്പ് ആണെന്നു പറഞ്ഞ് ചികിത്സ തേടിയ അറയാഞ്ഞിലിമണ്ണ് സ്വദേശിയാണ് അത്യാഹിത വിഭാഗത്തില്‍ ഡ്യൂട്ടിയിലുണ്ടായിരുന്ന ഡോ. സോനു സോമനുമായി ആദ്യം വാക്കു തര്‍ക്കമുണ്ടാക്കിയത്. ഡോക്ടര്‍ പരിശോധിച്ച് പ്രാഥമിക ചികിത്സ നല്‍കാന്‍ ആരംഭിച്ചപ്പോള്‍ പ്രകോപനമില്ലാതെ ഇയാള്‍ ഡോക്ടറോട് തട്ടിക്കയറി.

ഏത് മരുന്നാണ് തനിക്ക് നല്‍കുന്നതെന്നും എന്ത് ചികിത്സയാണ് നല്‍കുന്നതെന്നും വ്യക്തമാക്കണമെന്ന് ആവശ്യപ്പെട്ട് ഇയാള്‍ അത്യാഹിത വിഭാഗത്തില്‍ ബഹളം വച്ചു. ഡോക്ടര്‍ വിശദീകരിക്കാന്‍ ശ്രമിച്ചെങ്കിലും ഇയാള്‍ ഡോക്ടര്‍ക്ക് എതിരെ രോഷപ്രകടനം നടത്തുകയും ബഹളം വയ്ക്കുകയും ചെയ്തതോടെ മറ്റ് ഏതെങ്കിലും ആശുപത്രിയില്‍ പോകാന്‍ ഡോക്ടര്‍ ആവശ്യപ്പെട്ടു. ഇതോടെ രോഗിയും കൂടെ ഉണ്ടായിരുന്ന രണ്ടുപേരും ഡോക്ടറെ ആക്രമിക്കുകയും ശരീരത്തില്‍ കുത്തിപ്പിടിച്ച് ഷര്‍ട്ട് വലിച്ചു കീറുകയും ചെയ്തു. അതിനുശേഷം സംഭവസ്ഥലത്തുനിന്ന് രക്ഷപ്പെട്ടു.

രോഗിക്കൊപ്പം എത്തിയവര്‍ ആക്രമണത്തിനു ശേഷം വയറ്റില്‍ കത്തി കയറ്റുമെന്ന് ഭീഷണിപ്പെടുത്തിയതായും ഡോക്ടര്‍ സോനു പറഞ്ഞു. പ്രതികള്‍ക്കായി പൊലീസ് അന്വേഷണം ആരംഭിച്ചു. ഡ്യൂട്ടി ഡോക്ടറെ ആക്രമിച്ച സംഭവത്തില്‍ ഐഎംഎ കോട്ടയം യൂണിറ്റ് ശക്തമായി അപലപിച്ചു. പ്രതികളെ എത്രയും വേഗം അറസ്റ്റ് ചെയ്യണമെന്നും ഐഎംഎ ആവശ്യപ്പെട്ടു. അന്വേഷണം ആരംഭിച്ചതായി എരുമേലി പൊലീസ് അറിയിച്ചു.