തിരഞ്ഞെടുപ്പ് രാഷ്ട്രീയത്തില്‍ എസ്ഡിപിഐയുമായി സിപിഎം ഒരു തരത്തിലുള്ള വിട്ടുവീഴ്ചയ്ക്കും തയ്യാറായിട്ടില്ലെന്ന് സിപിഎം നേതാവ് എം.എ ബേബി. അവരുടെ പ്രവര്‍ത്തനശൈലി ജനാധിപത്യത്തിന് ഗുണകരമല്ലെന്നതാണ് പാര്‍ട്ടിയുടെ കൃത്യമായ നിലപാടെന്നും അദ്ദേഹം വ്യക്തമാക്കി. അതേസമയം, പിഡിപി നിലവില്‍ നല്‍കുന്ന പിന്തുണയെ സ്വാഗതം ചെയ്ത അദ്ദേഹം, അബ്ദുള്‍ നാസര്‍ മഅദനി തന്നെ തന്റെ നിലപാടുകളില്‍ മാറ്റം വരുത്തിയതായി അറിയിച്ചിട്ടുണ്ടെന്നും കൂട്ടിച്ചേര്‍ത്തു.

ബിജെപിയുടെ അയ്യായിരത്തോളം വോട്ട് തങ്ങള്‍ക്ക് ലഭിക്കുമെന്ന് യുഡിഎഫിന്റെ ഒരു മുതിര്‍ന്ന നേതാവ് പരസ്യമായി പറഞ്ഞത് ഗൗരവകരമാണെന്ന് എം.എ ബേബി ചൂണ്ടിക്കാട്ടി. ഇത്തരം പ്രസ്താവനകളിലൂടെ കോണ്‍ഗ്രസും ബിജെപിയും തമ്മിലുള്ള അവിശുദ്ധ കൂട്ടുകെട്ടാണ് പുറത്തുവരുന്നത്. ഇത്തരം രാഷ്ട്രീയ 'ഡീലുകള്‍' വോട്ടര്‍മാര്‍ തിരിച്ചറിയുമെന്നും അദ്ദേഹം പറഞ്ഞു. സീറ്റ് ലഭിക്കാത്തതിന്റെ പേരില്‍ പ്രസ്ഥാനത്തെ തള്ളിപ്പറഞ്ഞ് പുറത്തുപോകുന്നവര്‍ രാഷ്ട്രീയമായി അധഃപതിക്കുകയാണെന്ന് അദ്ദേഹം വിമര്‍ശിച്ചു. രക്തസാക്ഷികളുടെ പ്രസ്ഥാനത്തില്‍ പ്രവര്‍ത്തിച്ചിട്ട്, ആ രക്തസാക്ഷികളെ അരുംകൊല ചെയ്തവര്‍ക്കൊപ്പം ചേരുന്നത് അംഗീകരിക്കാനാവില്ല.

ചുരുക്കം ചിലരില്‍ പാര്‍ലമെന്ററി മോഹം അതിശക്തമാണെന്നും അത്തരക്കാരാണ് ഇത്തരം ചുവടുമാറ്റങ്ങള്‍ നടത്തുന്നതെന്നും അദ്ദേഹം പരിഹസിച്ചു. പയ്യന്നൂര്‍ ഏരിയ കമ്മിറ്റിക്കെതിരെ ഉയരുന്ന രക്തസാക്ഷി ഫണ്ട് തട്ടിപ്പ് ആരോപണങ്ങള്‍ അടിസ്ഥാനരഹിതമാണെന്ന് എം.എ ബേബി പറഞ്ഞു.

പാര്‍ട്ടിയുടെ ഫണ്ട് വിനിയോഗത്തില്‍ എന്തെങ്കിലും വീഴ്ചകള്‍ ശ്രദ്ധയില്‍പ്പെട്ടാല്‍ കര്‍ശനമായ നടപടി സ്വീകരിക്കുന്ന പാരമ്പര്യമാണ് സിപിഎമ്മിനുള്ളത്. പയ്യന്നൂരിലെ കാര്യത്തില്‍ പ്രചരിക്കുന്ന ആക്ഷേപങ്ങള്‍ വസ്തുതാവിരുദ്ധമാണെന്നും അദ്ദേഹം വിശദീകരിച്ചു.