കോഴഞ്ചേരി ജില്ലാ ആശുപത്രിയിലെ ചികിത്സാപ്പിഴവ് അന്വേഷണം നടത്തി റിപ്പോര്ട്ട് നല്കുമെന്ന് ഡിഎംഒ
പത്തനംതിട്ട കോഴഞ്ചേരി ജില്ലാ ആശുപത്രിയിലെ ചികിത്സാപ്പിഴവ് ആരോപണത്തില് അന്വേഷണം നടത്തി റിപ്പോര്ട്ട് നല്കുമെന്ന് പത്തനംതിട്ട ഡിഎംഒ. അന്വേഷണ റിപ്പോര്ട്ട് ആരോഗ്യമന്ത്രിക്ക് കെ മുരളീധരന് സമര്പ്പിക്കും.ഇതിനായി മെഡിക്കല് ബോര്ഡ് രൂപീകരിക്കുമെന്ന് ഡിഎംഒ അനിതാകുമാരി വ്യക്തമാക്കി. ഏകദേശം ഒരു വര്ഷം മുന്പ് പനിയും ഛര്ദിലും വയറിളക്കവും ഉണ്ടായതോടെ ആറന്മുള സ്വദേശിനി വത്സല കോഴഞ്ചേരി ജില്ലാ ആശുപത്രിയില് ചികിത്സ തേടി.
ചികിത്സയുടെ ഭാഗമായി ആശുപത്രി കുത്തിവെപ്പ് നല്കി. ഇതിന് പിന്നാലെ കുത്തിവെപ്പ് എടുത്ത ഇടുപ്പിന്റെ ഭാഗത്ത് നിരന്തരം വേദന അനുഭവപ്പെട്ടു. ആദ്യം കാര്യമാക്കിയില്ലെങ്കിലും പിന്നീട് വേദന അസഹനീയമായി. കുത്തിവെപ്പ് എടുത്ത സ്ഥലത്ത് നീര്ക്കെട്ടും പഴുപ്പും ഉണ്ടായി. ഇതോടെ നാല് ദിവസം മുമ്പ് വീണ്ടും കോഴഞ്ചേരി ജില്ലാ ആശുപത്രിയിലെത്തി എക്സ്റേ എടുത്തതില് സൂചി ശരീരത്തില് കുടുങ്ങിയത് തിരിച്ചറിഞ്ഞു. സൂചി പുറത്തെടുക്കാന് ശസ്ത്രക്രിയ നടത്തിയെങ്കിലും വിജയിച്ചില്ല.
സൂചിയുടെ ഒരു ഭാഗം മാത്രമാണ് പുറത്തെടുക്കാന് ആയത്. ആശുപത്രിയില് നിന്ന് കുത്തിവെപ്പ് നടത്തിയപ്പോള് സൂചി കുടുങ്ങിയതാണോ എന്ന് പറയാന് കഴിയില്ലെന്ന നിലപാടിലാണ് അധികൃതര്. കുത്തിവെപ്പിന് ഉപയോഗിക്കുന്ന സൂചിയാണ് ശസ്ത്രക്രിയയിലൂടെ പുറത്തെടുത്തത്. കൂടുതല് പരിശോധന നടത്തിയാലേ കാര്യങ്ങളില് വ്യക്തത വരികയുളൂവെന്ന് ആശുപത്രി സൂപ്രണ്ട് അറിയിച്ചു. ഒരു വര്ഷത്തിനു മുമ്പ് കോഴഞ്ചേരി ജില്ലാ ആശുപത്രിയില് ചികിത്സ തേടിയത് അല്ലാതെ മറ്റെവിടെയും ചികിത്സയ്ക്കായി പോയിട്ടില്ലെന്നും വത്സലയും കുടുംബവും വ്യക്തമാക്കി.
https://www.facebook.com/Malayalivartha
