രത്തന് യു ഖേല്ക്കര് മുഖ്യമന്ത്രി വി ഡി സതീശന്റെ സെക്രട്ടറി
രത്തന് യു ഖേല്ക്കറെ മുഖ്യമന്ത്രിയുടെ ഓഫീസ് സെക്രട്ടറി ആയി നിയമിച്ചു ഉത്തരവിറങ്ങി. നിലവില് ഇദേഹം കേരളത്തിന്റെ മുഖ്യ തെരഞ്ഞെടുപ്പ് ഓഫീസറാണ്. നിയമന ഉത്തരവ് ഇന്ന് വൈകിട്ട് പുറത്തിറങ്ങി. 2003 ബാച്ചിലെ കേരള കേഡര് ഐഎഎസ് ഉദ്യോഗസ്ഥനാണ് രത്തന് യു ഖേല്ക്കര്. കണ്ണൂര് കളക്ടറായും കേരള മെഡിക്കല് മിഷന് ഡയറക്ടറായും സേവനം അനുഷ്ടിച്ചിട്ടുണ്ട്.വി ഡി സതീശനാണ് രത്തന് ഖേല്ക്കറിന്റെ പേര് നിര്ദേശിച്ചത്. നിയമനത്തിനെതിരെ സിപിഐഎം ഉള്പ്പടെ വിമര്ശനവുമായി രംഗത്ത് എത്തിയിരുന്നു. നേരത്തേ മുഖ്യമന്ത്രിയുടെ പേഴ്സണല് സ്റ്റാഫുകളെ നിയമിച്ച് ഉത്തരവിറക്കിയിരുന്നു. 20 പേരെയാണ് പേഴ്സണല് സ്റ്റാഫായിട്ട് നിയമിച്ചിട്ടുള്ളത്. ശ്രീകുമാര് ടിയെ സ്പെഷ്യല് പ്രൈവറ്റ് സെക്രട്ടറിയായും സിജി ജി എസിനെ പ്രസ് സെക്രട്ടറിയായും നിയമിച്ചു.
റോയ് മാത്യുസാണ് മീഡിയ സെക്രട്ടറി. തിലകന് കെ പി കെ, അനീഷ് അനിരുദ്ധന്, മോഹനചന്ദ്രന് എന്നിവരെ അഡീഷണല് െ്രെപവറ്റ് സെക്രട്ടറിമാരായും നിയമിച്ചു.2003 ബാച്ച് കേരള കേഡര് ഐഎഎസ് ഉദ്യോഗസ്ഥനായ രത്തന് യു. ഖേല്ക്കര് കര്ണാടക സ്വദേശിയാണ്. 2024 ഡിസംബര് നാലാണ് കേന്ദ്ര തിരഞ്ഞെടുപ്പ് കമ്മീഷന് അദ്ദേഹത്തെ കേരളത്തിന്റെ മുഖ്യ തിരഞ്ഞെടുപ്പ് ഓഫീസറായി നിയമിക്കുന്നത്.ആരോഗ്യവകുപ്പ് സെക്രട്ടറി, നാഷണല് ഹെല്ത്ത് മിഷന് സ്റ്റേറ്റ് മിഷന് ഡയറക്ടര്, ഇന്ഫോപാര്ക്ക് ചെയര്മാന്, വിവിധ ജില്ലകളില് ജില്ലാകളക്ടര് എന്നീ നിലകളില് പ്രവര്ത്തിച്ചിട്ടുണ്ട്. 2013ല് കണ്ണൂര് കളക്ടര് ആയിരിക്കെ മികച്ച കളക്ടര്ക്കുള്ള സംസ്ഥാന സര്ക്കാരിന്റെ പുരസ്കാരത്തിനു അര്ഹനായിട്ടുണ്ട്.
അതേസമയം മുഖ്യമന്ത്രിയുടെ പ്രിന്സിപ്പല് സെക്രട്ടറിയായി രത്തന് ഖേല്ക്കറെ നിയമിച്ചത് ഗൗരവമുള്ള പ്രശ്നമാണെന്ന് പി രാജീവ് വ്യക്തമാക്കി. കൂളിങ് പിരീഡ് പോലും പാലിക്കാതെയാണ് നിയമനമുണ്ടായിരിക്കുന്നത്. ബംഗാളിലെ വിഷയത്തില് രാഹുല് ഗാന്ധി എതിര്ക്കുമ്പോള് കേരളത്തില് നിയമനം നടത്തുകയായണ്. വലിയ കൊള്ളയ്ക്ക് വലിയ പ്രതിഫലം എന്നാണ് രാഹുല് ഗാന്ധി ബംഗാളിലെ നിയമനത്തെ വിശേഷിപ്പിച്ചത്. കേരളത്തിലും ഇതേ നിലപാട് ആണോ ഉള്ളതെന്നും പി രാജീവ് ഡല്ഹിയില് മാധ്യമങ്ങളോട് ചോദിച്ചു. കോണ്ഗ്രസിന്റെ അഖിലേന്ത്യ നേതൃത്വവും രാഹുല് ഗാന്ധിയും നിലപാട് വ്യക്തമാക്കണമെന്നും അദ്ദേഹം പറഞ്ഞു.
https://www.facebook.com/Malayalivartha
