കാറിന് തീപിടിച്ച് ഗര്ഭിണി മരിച്ച സംഭവത്തില് പൊള്ളലേറ്റ ഭര്ത്താവ് രജിന്ലാലും മരിച്ചു
ചെറുവണ്ണൂരില് കാറിന് തീപിടിച്ച് ആറുമാസം ഗര്ഭിണിയായ യുവതി മരിച്ച സംഭവത്തില് പൊള്ളലേറ്റ് ആശുപത്രിയില് ചികിത്സയിലായിരുന്ന ഭര്ത്താവും മരിച്ചു. ചെറുവണ്ണൂര് കക്കറമുക്ക് എടോളിത്താഴെയിലായിരുന്നു സംഭവം. കോഴിക്കോട് മെഡിക്കല് കോളേജ് ആശുപത്രിയില് ചികിത്സയിലായിരുന്ന ചെറുവണ്ണൂര് പൂവുത്തുംചാലില് സ്വദേശി രജിന്ലാലാണ് മരിച്ചത്. പാലേരി കുയിമ്പില് കള്ളിക്കണ്ടി മീത്തല് സ്വദേശിയായ ഭാര്യ സോന മേയ് 15നാണ് കാര് കത്തി മരിച്ചത്.
ആറുമാസം ഗര്ഭിണിയായ സോനയെ കോഴിക്കോട്ടെ സ്വകാര്യ ആശുപത്രിയില് കാണിച്ച് തിരിച്ചുപോകുമ്പോഴായിരുന്നു അപകടം. ചെറുവണ്ണൂരില് നിന്ന് കക്കറമുക്ക് റോഡില് എടോളിത്താഴെ എത്തിയപ്പോള് പെട്ടെന്ന് കാര് കത്തുകയായിരുന്നു. കാറിന്റെ പിന്സീറ്റില് സോന കിടക്കുകയായിരുന്നു. രജിന്ലാല് കാറില് നിന്നിറങ്ങി സോനയെ പുറത്തിറക്കാന് ശ്രമിച്ചെങ്കിലും കഴിഞ്ഞില്ല.
സോന സംഭവ ദിവസമായ മെയ് 15ന് ഒരു പെട്രോള് പമ്പില് നിന്ന് കന്നാസില് പെട്രോള് വാങ്ങുന്നതിന്റെ സിസിടിവി ദൃശ്യങ്ങള് പൊലീസിന് ലഭിച്ചിരുന്നു. ഫൊറന്സിക്, മോട്ടോര് വാഹന വകുപ്പ് പരിശോധനകളില് കാറിന് തീപിടിച്ചത് ഷോര്ട്ട് സര്ക്യൂട്ട് മൂലമല്ലെന്ന് വ്യക്തമാവുകയും ചെയ്തു. സോന കാനില് വാങ്ങിയ പെട്രോള് കാറിനുള്ളില് ഒഴിച്ച് തീകൊളുത്തി ആത്മഹത്യ ചെയ്തതാകാം എന്ന നിഗമനത്തിലാണ് നിലവില് പൊലീസ് എത്തിനില്ക്കുന്നത്.
https://www.facebook.com/Malayalivartha
