കേരളത്തിന്റെ സ്വപ്ന പദ്ധതികള്ക്കായി കേന്ദ്രത്തോട് പിന്തുണ ആവശ്യപ്പെട്ടിട്ടുണ്ടെന്ന് മുഖ്യമന്ത്രി വി ഡി സതീശന്
സംസ്ഥാനത്തിന്റെ ധനസ്ഥിതിയില് ധവളപത്രം ഇറക്കുമെന്ന് മുഖ്യമന്ത്രി വി ഡി സതീശന്. കേരളത്തിന്റെ സ്വപ്ന പദ്ധതികള് നടപ്പിലാക്കാന് പ്രധാനമന്ത്രിയോടും ധനമന്ത്രിയോടും പിന്തുണ ആവശ്യപ്പെട്ടിട്ടുണ്ടെന്ന് പ്രധാനമന്ത്രിയുമായുള്ള കൂടിക്കാഴ്ചയ്ക്ക് ശേഷം ഡല്ഹിയില് മാദ്ധ്യമങ്ങളോട് സംസാരിച്ച് മുഖ്യമന്ത്രി.
'പ്രധാനമന്ത്രിയും ധനമന്ത്രിയുമായും കൂടിക്കാഴ്ച നടത്തി. വിശദമായ കൂടിക്കാഴ്ചയാണ് നടന്നത്. കേരളത്തിന്റെ പ്രശ്നങ്ങളെക്കുറിച്ചും മുന്ഗണനകളെക്കുറിച്ചും സൂചിപ്പിച്ചു. നമ്മുടെ സ്വപ്ന പദ്ധതികള്ക്ക് പിന്തുണ നല്കണമെന്നും അഭ്യര്ത്ഥിച്ചു. കേരളത്തിന്റെ സമ്പദ്വ്യവസ്ഥയെക്കുറിച്ചുള്ള ധവളപത്രം ജൂണ് ആദ്യവാരം പുറത്തിറക്കും. കേന്ദ്രവും സംസ്ഥാനവും തമ്മിലുള്ള ബന്ധങ്ങളിലെ പ്രശ്നങ്ങള് അറിയിച്ചിട്ടുണ്ട്. അനുകൂലമായ നിലപാടുണ്ടാകുമെന്നാണ് കേന്ദ്രം പറഞ്ഞത്.
പിഎം ശ്രീയുടെ നിയമപരമായ കാര്യങ്ങള് പരിശോധിക്കും. മന്ത്രിസഭാ യോഗത്തിലും ഇക്കാര്യം ചര്ച്ചചെയ്തു. സില്വര് ലൈന് പദ്ധതി ഉപേക്ഷിച്ചത് ഞങ്ങളല്ല. മുന് സര്ക്കാരാണ്. എന്നിട്ടും സ്ഥലം ഏറ്റെടുത്തുകൊണ്ടുള്ള വിജ്ഞാപനം നിലനിന്നു. അതാണ് ഇപ്പോള് പിന്വലിച്ചിരിക്കുന്നത്. സാധാരണക്കാരായ ജനങ്ങള്ക്ക് സ്ഥലം വില്ക്കാന് ഇതിനാല് സാധിക്കില്ല. ഇക്കാരണത്താലാണ് വിജ്ഞാപനം പിന്വലിച്ചത്. കടമെടുപ്പിന്റെ പരിധിയില് നിന്ന് ദേശീയപാതാ വികസനത്തിനുള്ള തുക ഒഴിവാക്കണമെന്നാവശ്യപ്പെട്ടു.
തൊഴിലുറപ്പ് പദ്ധതിയില് മുമ്പ് മുഴുവന് പണവും കേന്ദ്രമാണ് നല്കിയിരുന്നത്.ഇപ്പോള് 40 ശതമാനം സംസ്ഥാനം നല്കണം. പുതിയ സര്ക്കാരിന്റെ മുകളിലാണ് ആ ബാദ്ധ്യത. കിഫ്ബിയുടെ ബാദ്ധ്യതകള് സംബന്ധിച്ച റിപ്പോര്ട്ട് തേടിയിട്ടുണ്ട്' വി ഡി സതീശന് പറഞ്ഞു.
https://www.facebook.com/Malayalivartha
