ഏത് കാര്യമായാലും തന്റേതായ അഭിപ്രായം വ്യക്തമാക്കുന്ന താരമാണ് നടി മല്ലിക സുകുമാരന്‍. ഇപ്പോഴിതാ താരസംഘടനയായ അമ്മയില്‍ ഇപ്പോള്‍ തലപ്പൊക്കിയിരിക്കുന്ന അന്‍സിബ പ്രശ്‌നത്തില്‍ പ്രതികരിച്ചിരിക്കുകയാണ് താരം. താരസംഘടനയായ അമ്മയല്ല ഒരാളുടെ തലയെഴുത്ത് തീരുമാനിക്കുന്നതെന്ന് നടി മല്ലിക സുകുമാരന്‍. ഇപ്പോഴത്തെ അവസ്ഥവച്ച് ആര്‍ക്കും അമ്മയില്‍ തുടരാന്‍ ആഗ്രഹമില്ലെന്നും മല്ലിക ഒരു മാദ്ധ്യമത്തോട് പറഞ്ഞു. ഭരണസമിതിയെ പിരിച്ചുവിടുക, അല്ലെങ്കില്‍ എക്‌സിക്യുട്ടീവ് മെമ്പേഴ്‌സിനെ മാറ്റണമെന്നും വീണ്ടും തിരഞ്ഞെടുപ്പ് നടത്തുന്നതാണ് നല്ലതെന്നും അവര്‍ കൂട്ടിച്ചേര്‍ത്തു.

'ഇപ്പോഴും അമ്മ എന്ന സംഘടനയെ പുറത്തുനിന്ന് നിയന്ത്രിക്കുന്നവരുണ്ട്. അത് ആരാണെന്ന് ഞാന്‍ ഇപ്പോള്‍ പറയുന്നില്ല. അമ്മയില്‍ നിന്ന് പണം പല വഴിയും പോകുന്നുണ്ട്. ജിഹാദി എന്ന് ടിനി വിളിച്ചിട്ടുണ്ടെങ്കില്‍ നീന കുറുപ്പ് അതിന് തെളിവ് നല്‍കണം. ഇക്കാര്യത്തില്‍ അന്‍സിബ വളരെ വ്യക്തമായി അന്വേഷണം നടത്തണമെന്ന് ഞാന്‍ പറയും. എങ്കിലെ അന്‍സിബയ്ക്ക് കാര്യങ്ങള്‍ മനസിലാക്കൂ. ഇത് താര സംഘടനയല്ല. ഇത്തരം കാര്യങ്ങള്‍ കേള്‍ക്കുമ്പോള്‍ ജനങ്ങള്‍ക്ക് എന്ത് തോന്നും.

ശ്വേതയെ കണ്ടപ്പോള്‍ ഞാന്‍ ചോദിച്ചു. കണക്ക് നോക്കുന്നില്ലെയെന്ന്, അപ്പോള്‍ പറഞ്ഞത് കുക്കുവും ഉണ്ണി ശിവപാലുമാണ് ചെക്കില്‍ ഒപ്പിടുന്നതെന്നാണ്. ഞാന്‍ പറഞ്ഞു അത് മാറ്റണമെന്ന്. തെറ്റ് ചെയ്ത എല്ലാവരെയും മാറ്റി നിര്‍ത്തണമായിരുന്നു. ഉണ്ണി ശിവപാലിനെ മാറ്റി നിര്‍ത്തിയപ്പോള്‍ കുക്കു പരമേശ്വരനെയും മാറ്റിനിര്‍ത്തണമായിരുന്നു അവിടെയാണ് തെറ്റ് പറ്റിയത്. അമ്മ പണ്ട് ഒരുപാട് നല്ല കാര്യങ്ങള്‍ ചെയ്തിട്ടുണ്ട്. എന്നാല്‍ ഇപ്പോള്‍ അമ്മയില്‍ നിന്ന് പണം എടുത്ത് ഉപയോഗമില്ലാത്ത പല കാര്യങ്ങളും ചെയ്യുന്നുണ്ട്' മല്ലിക പറഞ്ഞു.