കാലവര്‍ഷം അതിദുര്‍ബലമാകുന്ന സാഹചര്യം വന്‍പ്രതിസന്ധി സൃഷ്ടിക്കും. സംസ്ഥാനത്തെ അണക്കെട്ടുകളില്‍ 29 ശതമാനം മാത്രം വെള്ളമുള്ള സാഹചര്യത്തില്‍ ഇക്കൊല്ലം പൂര്‍ണമായി പവര്‍കട്ടുണ്ടാകും. മാത്രവുമല്ല കൃഷിയും കുടിവെള്ളവും വന്‍പ്രതിസന്ധിയിലേക്കു നീങ്ങുകയാണ്. സംസ്ഥാനത്ത് രാത്രിയും ഭാഗിക വൈദ്യുതി നിയന്ത്രണവന്നു കഴിഞ്ഞു. എല്‍നിനോ പ്രതിഭാസത്തെ തുടര്‍ന്നുണ്ടായ മഴക്കുറവും അന്തരീക്ഷ താപനില താരതമ്യേന ഉയര്‍ന്ന നിലയില്‍ തുടരുന്നതും മൂലം സംസ്ഥാനത്ത് വൈദ്യുതി ഉപഭോഗം മുന്‍കാലങ്ങളെ അപേക്ഷിച്ച് ഗണ്യമായി വര്‍ധിച്ചിരിക്കുകയാണ്.

കോട്ടയം, പത്തനംതിട്ട, തിരുവനന്തപുരം ജില്ലകളില്‍മാത്രമാണ് സാധാരണ അളവില്‍ മഴ ലഭിച്ചത്. രാജ്യത്താകമാനം വൈദ്യുതി ആവശ്യകത വര്‍ധിച്ചതിനാല്‍ പവര്‍ എക്‌സ്‌ചേഞ്ചിലൂടെ ലഭ്യമാകുന്ന വൈദ്യുതിയുടെ ലഭ്യതയിലും കാര്യമായ കുറവ് അനുഭവപ്പെടുന്നുണ്ട്. സംസ്ഥാനത്ത് മഴ മാറിനില്‍ക്കുന്ന സാഹചര്യത്തില്‍ ഇന്നത്തെ വൈദ്യുതി ഉപഭോഗം മുന്‍ ദിവസങ്ങളെ അപേക്ഷിച്ച് ഏകദേശം 400 മുതല്‍ 500 മെഗാവാട്ട് വരെ വര്‍ധിച്ചിരിക്കുകയാണ്. സംസ്ഥാനത്ത് ഏറ്റവുമധികം മഴ ലഭിക്കേണ്ട് ജൂണ്‍, ജൂലൈ മാസങ്ങളില്‍ മുന്‍വര്‍ഷത്തേക്കാള്‍ നേര്‍പ്പകുതിയാണ് മഴ പെയ്തിരിക്കുന്നത്. ഓഗസ്റ്റിലും സെപ്റ്റംബറിലും മഴ ശക്തിപ്പെടുന്നില്ലെങ്കില്‍ കേരളം വന്‍പ്രതിസന്ധിയിലേക്ക് നീങ്ങുമെന്ന് വ്യക്തം.

തിമര്‍ത്തു പെയ്യേണ്ട ജൂണ്‍ മാസത്തില്‍ സംസ്ഥാനത്ത് 34 ശതമാനം മഴ കുറവാണ് അനുഭവപ്പെട്ടത്. ഇടവപ്പാതി ചതിച്ചതോടെ ഇനി ജൂലൈ, ഓഗസ്റ്റ് മാസങ്ങളിലെ മഴയെ ആശ്രയിച്ചിരിക്കും കേരളത്തിന്റെ മഴസംഭരണം. സംസ്ഥാനത്തു മിക്ക ജില്ലകളിലും 20 ശതമാനം മുതല്‍ 59 ശതമാനം വരെ കുറവാണ് മഴ ലഭിച്ചിരിക്കുന്നത്. ഏറ്റവും കുറവ് മഴ വയനാട് ജില്ലയിലാണ്. 703.6 മില്ലി മീറ്റര്‍ ലഭിക്കേണ്ട സ്ഥാനത്ത് 228.1 മില്ലി മീറ്റര്‍ മഴ മാത്രമേ ലഭിച്ചിട്ടുള്ളു.

ഇതേത്തുടര്‍ന്ന് സംസ്ഥാനത്ത് വീണ്ടും വൈദ്യുതി പ്രതിസന്ധി രൂക്ഷമാവുകയാണ്. ഇന്നലെ സംസ്ഥാനത്തിന്റെ വിവിധ ഇടങ്ങളില്‍ 15 മിനിറ്റ് മുതല്‍ 30 മിനിറ്റ് വരെ വൈദ്യുതി നിയന്ത്രണമാണ് ഏര്‍പ്പെടുത്തിയത്. മഴ കുറഞ്ഞതിനാല്‍ അണക്കെട്ടുകളില്‍ ജലനിരപ്പ് വളരെ താഴെയാണ്. സംസ്ഥാനത്തെ ഏറ്റവും വലിയ അണക്കെട്ടായ ഇടുക്കിയില്‍ നിലവിലുള്ളത് 29 ശതമാനം വെള്ളം മാത്രം. കഴിഞ്ഞ വര്‍ഷം ഇതേ ദിവസം 57 ശതമാനം വെള്ളമുണ്ടായിരുന്നു. സംസ്ഥാനത്തെ വൈദ്യുതി വകുപ്പിന്റെ ഡാമുകളില്‍ ആകെ അവശേഷിക്കുന്നതും 29 ശതമാനം ജലമാണ്. വൈദ്യുതിയിലെ പ്രതിസന്ധി ആഭ്യന്തര ഉല്‍പാദനം വര്‍ധിപ്പിച്ച് മറികടക്കാന്‍ കഴിയുമെങ്കിലും ജലനിരപ്പ് താഴ്ന്നുനില്‍ക്കുന്നത് ആശങ്കയാണ്. നിലവില്‍ 78 ശതമാനം വൈദ്യുതിയും പുറത്തുനിന്ന് വാങ്ങിയാണ് കേരളത്തിന്റെ വൈദ്യുതി പ്രതിസന്ധി മറികടന്നത്.

എല്‍നിനോ വര്‍ഷങ്ങളിലെ മഴക്കുറവും കാലംതെറ്റിപ്പെയ്യുന്ന ശക്തമായ മഴയും കാര്‍ഷികമേഖലയില്‍ വന്‍നഷ്ടമുണ്ടാക്കും. മഴയുടെ വിതരണത്തില്‍ ഏറ്റക്കുറച്ചിലുണ്ടാവും. നെല്ല്, തെങ്ങ്, വാഴ, കാപ്പി, കുരുമുളക് എന്നിവയെയെല്ലാം ഇത് ബാധിക്കും. പച്ചക്കറിയടക്കം വിളകളുടെ പൂക്കളും കായ്കളും കൊഴിച്ചുകളയും. അന്തരീക്ഷ ഈര്‍പ്പം കാരണം രോഗ, കീടശല്യം ഇക്കാലയളവില്‍ കൂടും. കുരുമുളകിന് ദ്രുതവാട്ടം പോലെയുള്ള പ്രശ്‌നങ്ങളുണ്ടാകാം.

ജൂണ്‍ നാലിന് കേരളത്തിലെത്തിയ കാലവര്‍ഷം 15 ന് ശേഷം ശക്തി കുറയുന്നതായാണ് കാണുന്നത്. പസഫിക്കിലെ ഉഷ്ണജല പ്രവാഹമായ എല്‍നിനോയുടെ ശക്തിയും പരപ്പും വര്‍ധിക്കുന്നത്, പടിഞ്ഞാറന്‍കാറ്റിലെ ഈര്‍പ്പം കുറയുന്നത് തുടങ്ങി നിരവധി കാരണങ്ങളാണ് കാലാവസ്ഥ നിരീക്ഷകര്‍ നിരത്തുന്നത്. വടക്കുപടിഞ്ഞാറന്‍ ഇന്ത്യയില്‍ നിന്നുള്ള ചൂടുകാറ്റിന്റെ വ്യാപനവും മഴയുടെ മുന്നോട്ടുള്ള ഗതിയെ പ്രതികൂലമായി ബാധിക്കുന്നുണ്ട്. ചക്രവാതചുഴികള്‍, ന്യൂനമര്‍ദങ്ങള്‍ എന്നിവയും കാര്യമായി രൂപപ്പെട്ടിട്ടില്ല. ഇതും മഴയെ ബാധിച്ചിട്ടുണ്ടെന്നാണ് വിദഗ്ധര്‍ പറയുന്നത്.

അതേ സമയം കേരളത്തില്‍ വരുംദിവസങ്ങളില്‍ ഒറ്റപ്പെട്ട മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. വരും ദിവസങ്ങളിലും സംസ്ഥാനത്ത് നേരിയതോ മിതമായതോ ആയ മഴ തുടര്‍ന്നേക്കും. എന്നാല്‍ ഇന്ന് ഒരു ജില്ലകളിലും പ്രത്യേക അലര്‍ട്ടുകളൊന്നും പ്രഖ്യാപിച്ചിട്ടില്ല. മഴയ്‌ക്കൊപ്പം മണിക്കൂറില്‍ 30 മുതല്‍ 40 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുള്ളതിനാല്‍ പൊതുജനങ്ങള്‍ ജാഗ്രത പാലിക്കണം. വടക്കന്‍ ബംഗാള്‍ ഉള്‍ക്കടലിനും അതിനോട് ചേര്‍ന്നുള്ള തെക്കന്‍ ബംഗ്ലാദേശിനും മുകളിലായി നിലനിന്നിരുന്ന ചക്രവാതച്ചുഴി ഇപ്പോള്‍ വടക്ക്-പടിഞ്ഞാറന്‍ ബംഗാള്‍ ഉള്‍ക്കടലില്‍, വടക്കന്‍ ഒഡീഷ പശ്ചിമ ബംഗാള്‍ തീരങ്ങള്‍ക്ക് മുകളിലായി ന്യൂനമര്‍ദ്ദമായി ശക്തി പ്രാപിച്ചിട്ടുണ്ട്.അടുത്ത രണ്ട് ദിവസത്തിനുള്ളില്‍ ഇത് കൂടുതല്‍ ശക്തി പ്രാപിക്കാന്‍ സാധ്യതയുണ്ടെന്നാണ് പ്രവചനം.ഇതിന്റെ സ്വാധീനഫലമായി ഈ മാസം 20 വരെ കേരളത്തില്‍ മഴ തുടരും. മഴ സാധ്യത നിലനില്‍ക്കുമ്പോഴും സംസ്ഥാനത്തെ ഒറ്റപ്പെട്ടയിടങ്ങളില്‍ ഇന്നും ഉയര്‍ന്ന താപനില സാധാരണയേക്കാള്‍ 4 മുതല്‍ 5 ഡിഗ്രി സെല്‍ഷ്യസ് വരെ ഉയരാന്‍ സാധ്യതയുണ്ടെന്നും കാലാവസ്ഥ വകുപ്പ് മുന്നറിയിപ്പ് നല്‍കുന്നു.