അമേരിക്കൻ സംസ്ഥാനമായ ടെക്സസിൽ കനത്ത പ്രളയക്കെടുതി. പ്രളയജലത്തിൽ വാഹനങ്ങൾ ഒഴുക്കിൽപ്പെട്ട് രണ്ട് പേർ മരിച്ചു. വരും മണിക്കൂറുകളിൽ സംസ്ഥാനത്ത് റെക്കോഡുകൾ ഭേദിക്കുന്ന കനത്ത മഴ പെയ്യാനായി സാധ്യതയുണ്ടെന്നാണ് കാലാവസ്ഥാ നിരീക്ഷകർ മുന്നറിയിപ്പ് നൽകി. പ്രളയക്കെടുതി കണക്കിലെടുത്ത് സംസ്ഥാനത്ത് അതീവ ജാഗ്രതാ നിർദ്ദേശം പുറപ്പെടുവിച്ചിരിക്കുകയാണ്.

കനത്ത പ്രളയത്തിൽ കുടുങ്ങിയ 230ലധികം പേരെ രക്ഷാപ്രവർത്തകർ സുരക്ഷിത സ്ഥാനങ്ങളിലേക്ക് മാറ്റിയിരിക്കുകയാണ്. ഹെലികോപ്റ്ററിന്റെയും റെസ്ക്യൂ നീന്തൽക്കാരുടെയും സഹായത്തോടെ ഒരു ട്രക്കിൽ കുടുങ്ങിക്കിടന്ന വ്യക്തിയെയും അദ്ദേഹത്തിന്റെ വളർത്തുനായയെയും എയർലിഫ്റ്റ് ചെയ്ത് രക്ഷപ്പെടുത്തി.

ദുരന്ത പ്രതിരോധ പ്രവർത്തനങ്ങൾക്കായി ബ്ലാക്ക് ഹോക്ക് ഹെലികോപ്റ്ററുകളും സ്വിഫ്റ്റ് വാട്ടർ റെസ്ക്യൂ ബോട്ടുകളും ഉൾപ്പെടെ 1400 ഓളം അത്യാധുനിക ഉപകരണങ്ങളും 2,350 അടിയന്തര രക്ഷാപ്രവർത്തകരെയും സംസ്ഥാനത്തുടനീളം വിന്യസിച്ചു കഴിഞ്ഞു.