ജപ്പാൻ മാസ്റ്റേഴ്സ് ബാഡ്മിന്റൺ ടൂർണമെന്റിൽ ഇന്ത്യൻ താരം ലക്ഷ്യ സെൻ സെമിഫൈനലിലേക്ക്. ക്വാർട്ടർ ഫൈനലിൽ ജപ്പാന്റെ യൂഷി തനാക്കയെ നേരിട്ടുള്ള ഗെയിമുകൾക്ക് തോൽപ്പിച്ചാണ് ലക്ഷ്യ അവസാന നാലിൽ ഇടംപിടിച്ചത്. അതേസമയം, മറ്റൊരു ഇന്ത്യൻ താരമായ കിഡംബി ശ്രീകാന്ത് ക്വാർട്ടറിൽ തോറ്റ് പുറത്തായി.

വെള്ളിയാഴ്ച നടന്ന മത്സരത്തിൽ ലക്ഷ്യ 21-16, 21-15 എന്ന സ്കോറിനാണ് തനാക്കയെ പരാജയപ്പെടുത്തിയത്. 40 മിനിറ്റ് നീണ്ട പോരാട്ടത്തിൽ ആദ്യ ഗെയിമിൽ 11-8 ന് ഇടവേളയ്ക്ക് പിരിഞ്ഞ ലക്ഷ്യ, എതിരാളിയുടെ തിരിച്ചുവരവ് ശ്രമങ്ങളെ അതിജീവിച്ച് ഗെയിം സ്വന്തമാക്കി. രണ്ടാം ഗെയിമിലും ആധിപത്യം തുടർന്ന താരം 21-15ന് വിജയം ഉറപ്പിച്ചു. സെമിഫൈനലിൽ ഇന്തോനേഷ്യയുടെ അൽവി ഫർഹാനാണ് ലക്ഷ്യയുടെ എതിരാളി.ടൂർണമെന്റിലുടനീളം മികച്ച പ്രകടനമാണ് ലക്ഷ്യ കാഴ്ചവെക്കുന്നത്.