അമ്മയും മകനും ഒരേ വീട്ടിൽ വെട്ടേറ്റു മരിച്ച സംഭവത്തിന്റെ നടുക്കത്തിൽ നിന്ന് മുക്തമാകാതെ മട്ടന്നൂർ. റിട്ട. അധ്യാപികയായ ജ്യോതി ടീച്ചറുടെയും മകൻ നവീൻ കൃഷ്ണയുടെയും മൃതദേഹങ്ങൾ സംസ്‌കരിച്ചു. നൂറുകണക്കിന് ആളുകളാണ് ഇരുവർക്കും അന്തിമോപചാരം അർപ്പിക്കാൻ മട്ടന്നൂരിലെ ലയൺസ് ക്ലബ് റോഡിലുള്ള നന്ദനം വീട്ടിലെത്തിയത്. അതേസമയം, ഇരട്ട മരണത്തിലേക്ക് നയിച്ച സാഹചര്യങ്ങൾ കണ്ടെത്താൻ പൊലീസ് അന്വേഷണം ഊർജിതമാക്കി.
ബുധനാഴ്ച ഉച്ചയോടെ തലശ്ശേരി ജനറൽ ആശുപത്രിയിൽ പോസ്റ്റ്‌മോർട്ടം പൂർത്തിയാക്കിയ മൃതദേഹങ്ങൾ വീട്ടിലെത്തിച്ച് പൊതുദർശനത്തിന് വെച്ചു. ഭർത്താവ് കെ.ടി. ജയകൃഷ്ണൻ, മൂത്ത മകൻ നവനീത്, മറ്റ് ബന്ധുക്കൾ എന്നിവരും നാട്ടുകാരും അന്ത്യാഞ്ജലിയർപ്പിച്ചു. തുടർന്ന് ഉച്ചയ്ക്ക് രണ്ടരയോടെ ഇടവേലിക്കൽ തറവാട് ശ്മശാനത്തിൽ ഇരുവരുടെയും മൃതദേഹങ്ങൾ സംസ്‌കരിച്ചു.

ചൊവ്വാഴ്ച രാവിലെ പത്തരയോടെയാണ് മട്ടന്നൂർ നഗരത്തെ നടുക്കിയ സംഭവം പുറത്തറിയുന്നത്. വീട്ടിലെ ഒന്നാം നിലയിൽ ജ്യോതിയെയും നവീൻ കൃഷ്ണയെയും ഗുരുതരമായി വെട്ടേറ്റ നിലയിൽ കണ്ടെത്തുകയായിരുന്നു. രാവിലെ മട്ടന്നൂർ മഹാദേവ ക്ഷേത്രത്തിൽ പോയിരുന്ന കെ.ടി. ജയകൃഷ്ണൻ വീട്ടിൽ തിരിച്ചെത്തിയപ്പോഴാണ് ഭാര്യയെയും മകനെയും രക്തത്തിൽ കുളിച്ച നിലയിൽ കണ്ടത്. ഭയന്നുപോയ അദ്ദേഹം നിലവിളിച്ച് അയൽവാസികളുടെ സഹായം തേടി. തുടർന്ന് അയൽവാസികൾ പൊലീസിനെ വിവരമറിയിച്ചു.

മട്ടന്നൂർ പൊലീസ് സ്ഥലത്തെത്തി ഇരുവരെയും സമീപത്തെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പിന്നീട് മൃതദേഹങ്ങൾ തലശ്ശേരി ജനറൽ ആശുപത്രിയിലേക്ക് മാറ്റി.

പുറത്തുനിന്നുള്ള ആക്രമണത്തിന് തെളിവില്ലെന്ന് പൊലീസ്

സംഭവത്തിൽ പുറത്തുനിന്ന് ആരെങ്കിലും വീട്ടിലെത്തി ആക്രമണം നടത്തിയതിനുള്ള സൂചനകൾ പ്രാഥമിക പരിശോധനയിൽ ലഭിച്ചിട്ടില്ലെന്നാണ് പൊലീസ് പറയുന്നത്. ഫോറൻസിക് പരിശോധനയിൽ മരിച്ച രണ്ടുപേരുടേതല്ലാത്ത വിരലടയാളങ്ങൾ കണ്ടെത്തിയിട്ടില്ലെന്നും അന്വേഷണ സംഘം വ്യക്തമാക്കുന്നു.

പ്രാഥമിക അന്വേഷണത്തിൽ ലഭിച്ച സൂചനകൾ പ്രകാരം നവീൻ കൃഷ്ണ അമ്മയെ മൂർച്ചയേറിയ ആയുധം ഉപയോഗിച്ച് ആക്രമിച്ചശേഷം സ്വയം മുറിവേൽപ്പിച്ചതാകാമെന്നാണ് പൊലീസിന്റെ നിഗമനം. എന്നാൽ മരണത്തിലേക്ക് നയിച്ച കൃത്യമായ സാഹചര്യം സംബന്ധിച്ച് അന്വേഷണം തുടരുകയാണ്. ജ്യോതിയുടെ കഴുത്തിൽ ആഴത്തിലുള്ള മുറിവുകളുണ്ടായിരുന്നുവെന്നാണ് പരിശോധനയിൽ വ്യക്തമായത്.