ശ്രീകാര്യം അഭിരാം കൊലപാതകക്കേസിൽ പോലീസിന്റെ കണ്ടെത്തലുകളെ പാടെ നിഷേധിച്ചുകൊണ്ട് കൊല്ലപ്പെട്ട അഭിരാമിന്റെ ആത്മസുഹൃത്തിന്റെ നിർണായക വെളിപ്പെടുത്തൽ. ഒന്നാം പ്രതിയുടെ ലക്ഷ്യം അഭിരാമായിരുന്നില്ല, താനായിരുന്നുവെന്ന് സമ്മതിക്കുമ്പോഴും, കൊലപാതകം നടന്ന ലൊക്കേഷനെച്ചൊല്ലി വൻ പൊരുത്തക്കേടുകളാണ് സുഹൃത്തിന്റെ മൊഴി പുറത്തു കൊണ്ടുവരുന്നത്. ആനന്ദ എന്ന പെൺകുട്ടിയുടെ വ്യാജ ഇൻസ്റ്റഗ്രാം അക്കൗണ്ട് വഴി അഭിരാമിനെ വിളിച്ചുവരുത്തിയത് മൃതദേഹം കണ്ടെത്തിയ കാട്ടിലേക്കല്ലെന്നും, പാങ്ങപ്പാറയിലെ ബന്ധുവീടിന്റെ പരിസരത്തേക്കാണെന്നും സുഹൃത്ത് വ്യക്തമാക്കുന്നു. അഭിരാം കൊല്ലപ്പെട്ടതായി സംശയിക്കുന്ന സമയത്തും ഇൻസ്റ്റഗ്രാമിൽ നിന്ന് ലഭിച്ച മറുപടി സന്ദേശങ്ങളെക്കുറിച്ചുള്ള ദുരൂഹതയിലാണ് ഇപ്പോൾ പ്രത്യേക അന്വേഷണസംഘത്തിന്റെ പരിശോധന.