തിരുവനന്തപുരം ശ്രീകാര്യം പാങ്ങപ്പാറയിലെ പ്ലസ് ടു വിദ്യാർത്ഥി അഭിറാമിന്റെ കൊലപാതകത്തിൽ അന്വേഷണ സംഘത്തെ വട്ടംകറക്കാൻ പ്രതികളുടെ നാടകീയ നീക്കങ്ങൾ. തെളിവെടുപ്പിനായി സംഭവസ്ഥലത്ത് എത്തിച്ചപ്പോൾ, തനിക്ക് അഭിറാമിനെ അറിയില്ലെന്നും ചെയ്യാത്ത കുറ്റത്തിനാണ് തന്നെ കുടുക്കിയതെന്നും പറഞ്ഞ് രണ്ടാം പ്രതി ഉമർ മാധ്യമങ്ങൾക്ക് മുന്നിൽ പൊട്ടിക്കരഞ്ഞു. എന്നാൽ, കാപ്പ കേസിലടക്കം പ്രതിയായ ഉമറിന്റെ ഈ നീക്കം കൃത്യമായ നിയമോപദേശത്തിന്റെ അടിസ്ഥാനത്തിലുള്ള വെറും നാടകമാണെന്നാണ് പോലീസിന്റെ വിലയിരുത്തൽ.

കൊലപാതകത്തിന് ശേഷം തെളിവുകൾ നശിപ്പിക്കാനും, അന്വേഷണം വഴിതെറ്റിക്കാനും ഉമറും ഒന്നാം പ്രതിയും നടത്തിയ ആസൂത്രണങ്ങൾ പോലീസിനെ പോലും ഞെട്ടിക്കുന്നതാണ്. അഭിറാമിന്റെ ഫോണും കൊലയ്ക്ക് ഉപയോഗിച്ച ബെൽറ്റും എവിടെയെന്ന ചോദ്യത്തിന് പരസ്പര വിരുദ്ധമായ മൊഴികളാണ് ഇരുവരും നൽകുന്നത്.