ഡിജിറ്റൽ യുഗത്തിലും ഇൻലൻഡ് ലെറ്ററുകളിൽ കുട്ടികൾ എഴുതിയ സ്നേഹക്കത്തുകൾക്ക് സോഷ്യൽ മീഡിയയിലൂടെ മറുപടി നൽകി ആഭ്യന്തരമന്ത്രി രമേശ് ചെന്നിത്തല. സർക്കാരിന്റെ ലഹരി വിരുദ്ധ ക്യാമ്പയിനായ 'ഓപ്പറേഷൻ തൂഫാന്' ഐക്യദാർഢ്യം പ്രഖ്യാപിച്ചാണ് മുട്ടാർ സെന്റ് ജോർജ് ഹയർ സെക്കൻഡറി സ്കൂളിലെ വിദ്യാർത്ഥികൾ മന്ത്രിക്ക് കത്തുകൾ അയച്ചത്. ലഹരിക്കെതിരെയുള്ള പോരാട്ടത്തിൽ വിദ്യാർത്ഥികൾ ഒന്നടങ്കം നൽകിയ ഈ വലിയ പിന്തുണയെ ഹൃദയപൂർവ്വമാണ് ആഭ്യന്തരമന്ത്രി അഭിനന്ദിച്ചത്. ചങ്ങനാശേരി അതിരൂപതാ കോർപ്പറേറ്റ് മാനേജ്മെന്റിന്റെ കീഴിലുള്ള സ്കൂളുകളിൽ 'തൂഫാൻ സ്നേഹപൂർവം നന്മയ്ക്ക്' എന്ന വിഷയത്തിൽ കഴിഞ്ഞ സെപ്റ്റംബർ 30-നാണ് കത്തെഴുത്ത് മത്സരം സംഘടിപ്പിച്ചത്. ഡിജിറ്റൽ കാലത്തും സ്വന്തം കൈപ്പടയിൽ കുട്ടികൾ എഴുതിയ കത്തുകൾ വലിയൊരു മാതൃകയാണെന്ന് മന്ത്രി തന്റെ ഫേസ്ബുക്ക് കുറിപ്പിൽ വ്യക്തമാക്കി. "പ്രിയപ്പെട്ട മക്കളെ, ലഹരി മാഫിയയുടെ വേരറുക്കാൻ നാടൊന്നാകെ പൊരുതുന്ന ഈ ഘട്ടത്തിൽ, നിങ്ങളുടെ കത്തുകളിൽ പകർന്നുനൽകിയ പിന്തുണ ഈ പോരാട്ടത്തിന് കിട്ടിയ ഏറ്റവും വിലപ്പെട്ട അംഗീകാരമാണ്. യുവത്വത്തിന്റെ ചിന്തകളിലേക്ക് ലഹരിയുടെ വിഷപ്പുക ഒരിക്കലും പടരരുത്. ഈ പ്രതിരോധം കേരളത്തിന് തന്നെ വലിയൊരു മാതൃകയാണ്." - കത്തുകൾക്ക് മറുപടിയായി ആഭ്യന്തരമന്ത്രി രമേശ് ചെന്നിത്തല കുറിച്ച വാക്കുകളാണിത്. സാമൂഹിക പ്രതിബദ്ധതയുള്ള ഒരു തലമുറയെ വാർത്തെടുക്കാൻ മുന്നിൽ നിന്ന വിദ്യാർഥികളെയും, അധ്യാപകരെയും ചങ്ങനാശ്ശേരി അതിരൂപതാ മാനേജ്മെന്റിനെയും മന്ത്രി പ്രത്യേകമായി അഭിനന്ദിച്ചു. സ്കൂൾ അധികൃതരും അധ്യാപകരും ചേർന്ന് കത്തുകളെഴുതിയ വിദ്യാർത്ഥികളെ സ്കൂളിൽ വെച്ച് അനുമോദിക്കുകയും ചെയ്തു.