വേണാട് എക്‌സ്പ്രസിലെ തിരക്കിന് പരിഹാരമായി 10 ദിവസത്തിനകം പുതിയ ട്രെയിന്‍ സര്‍വീസ് ആരംഭിക്കും
വേണാട് എക്‌സ്പ്രസിലെ തിരക്കിന് പരിഹാരമായി 10 ദിവസത്തിനകം പുതിയ ട്രെയിന്‍ സര്‍വീസ് ആരംഭിക്കുമെന്ന് മാവേലിക്കര എംപി കൊടിക്കുന്നില്‍ സുരേഷ്. വൈകുന്നേരങ്ങളിലെ വേണാട് എക്‌സ്പ്രസിലെ രൂക്ഷമായ തിരക്കിന് പരിഹാരമായി എറണാകുളം–കോട്ടയം–ചെങ്ങന്നൂര്‍–കൊല്ലം റൂട്ടില്‍ പുതിയ ട്രെയിന്‍ സര്‍വീസ് ആരംഭിക്കുന്നതിന് റെയില്‍വേ മന്ത്രാലയത്തില്‍ നിന്ന് അംഗീകാരം ലഭിച്ചു.
ഡല്‍ഹിയില്‍ റെയില്‍വേ മന്ത്രി അശ്വിനി വൈഷ്ണവിനെ നേരില്‍ കണ്ട് വേണാട് എക്‌സ്പ്രസിലെ യാത്രക്കാര്‍ അനുഭവിക്കുന്ന ദുരിതത്തിന്റെ ചിത്രങ്ങളും വിഡിയോകളും ഉള്‍പ്പെടെ കാണിച്ച് വിഷയം വിശദമായി ബോധ്യപ്പെടുത്തിയിരുന്നു. സ്ത്രീകളും കുട്ടികളും മുതിര്‍ന്ന പൗരന്മാരും ഉള്‍പ്പെടെ നൂറുകണക്കിന് യാത്രക്കാര്‍ക്ക് ഇരിക്കാനോ നില്‍ക്കാനോ പോലും മതിയായ ഇടമില്ലാത്ത സാഹചര്യത്തില്‍ മണിക്കൂറുകളോളം യാത്ര ചെയ്യേണ്ടിവരുന്ന ഗുരുതരമായ സ്ഥിതിയാണ് നിലവിലുള്ളത്. ഓഫിസ് സമയം കഴിഞ്ഞ് എറണാകുളത്തുനിന്ന് കോട്ടയം, ചങ്ങനാശേരി, ചെങ്ങന്നൂര്‍, മാവേലിക്കര, കായംകുളം, ശാസ്താംകോട്ട, കൊല്ലം തുടങ്ങിയ മേഖലകളിലേക്ക് മടങ്ങുന്ന ആയിരക്കണക്കിന് സ്ഥിരം യാത്രക്കാരെയാണ് ഈ ദുരിതം നേരിട്ട് ബാധിക്കുന്നത്.
വേണാട് എക്‌സ്പ്രസ് എറണാകുളത്തുനിന്ന് പുറപ്പെടുന്നതിന് മുന്‍പായി ഒരു പുതിയ ട്രെയിന്‍ സര്‍വീസ് ആരംഭിക്കണം എന്നായിരുന്നു റെയില്‍വേ മന്ത്രിയോട് പ്രധാനമായും ആവശ്യപ്പെട്ടത്. ഇതിന്റെ തുടര്‍നടപടിയായി മന്ത്രിയുടെ ഓഫിസില്‍ നിന്ന് റെയില്‍വേ ബോര്‍ഡിലേക്ക് നിര്‍ദേശം കൈമാറുകയും, റെയില്‍വേ ബോര്‍ഡ് സതേണ്‍ റെയില്‍വേയിലെ ചീഫ് പാസഞ്ചര്‍ ട്രാന്‍സ്‌പോര്‍ട്ടേഷന്‍ മാനേജര്‍ക്ക് (ഇജഠങ) ആവശ്യമായ നടപടികള്‍ക്കായി നിര്‍ദേശം നല്‍കുകയും ചെയ്തിട്ടുണ്ട്.
വൈകിട്ട് ഏകദേശം 4 മണിയോടെ എറണാകുളം ജംക്?ഷനില്‍ നിന്ന് വേണാട് എക്‌സ്പ്രസിന് മുന്‍പായി പുറപ്പെടുന്ന തരത്തില്‍ പുതിയ പാസഞ്ചര്‍ ട്രെയിന്‍ സര്‍വീസ് ആരംഭിക്കുന്നതിനുള്ള നടപടികളാണ് ഇപ്പോള്‍ പുരോഗമിക്കുന്നത്. ഇതിനായി മെമു അല്ലെങ്കില്‍ ഐസിഎഫ് കോച്ചുകള്‍ ഉപയോഗിക്കുന്നതിനുള്ള സാധ്യത റെയില്‍വേ പരിശോധിച്ചുവരികയാണ്. എറണാകുളത്തുനിന്ന് കോട്ടയം, ചെങ്ങന്നൂര്‍ വഴി കൊല്ലം വരെയുള്ള സര്‍വീസായി ആരംഭിച്ച്, തുടര്‍ന്ന് കൊല്ലത്തുനിന്ന് പുനലൂരിലേക്ക് സര്‍വീസ് നീട്ടുന്നതിനുള്ള സാധ്യതയും പരിശോധിക്കുന്നുണ്ട്.
ഈ പുതിയ സര്‍വീസ് യാഥാര്‍ഥ്യമാകുന്നതോടെ എറണാകുളം മുതല്‍ കോട്ടയം, ചങ്ങനാശേരി, ചെങ്ങന്നൂര്‍, മാവേലിക്കര, കായംകുളം, കൊല്ലം, പുനലൂര്‍ മേഖലകളിലേക്ക് ദിവസേന യാത്ര ചെയ്യുന്ന ആയിരക്കണക്കിന് സ്ഥിരം യാത്രക്കാര്‍ക്ക് വലിയ ആശ്വാസമാകും. വേണാട് എക്‌സ്പ്രസിലെ അമിത തിരക്ക് കുറയ്ക്കുന്നതിനും യാത്രക്കാരുടെ സുരക്ഷയും സൗകര്യവും ഉറപ്പാക്കുന്നതിനും ഈ സര്‍വീസ് നിര്‍ണായകമാകും.
https://www.facebook.com/Malayalivartha
