അമേരിക്ക ഇറാന് നേരെ നടത്തിയ ആക്രമണങ്ങൾക്ക് ശക്തമായ തിരിച്ചടി ഉണ്ടാകുമെന്ന് സൂചന. ബ്രിട്ടനിലെ അമേരിക്കൻ സൈനിക താവളങ്ങൾ ലക്ഷ്യമിട്ട് ഇറാൻ ആക്രമണം നടത്തിയേക്കുമെന്ന രഹസ്യവിവരം. പിന്നാലെ നിർണായക നീക്കവുമായി അമേരിക്ക. ബ്രിട്ടനിലെ സൈനിക വ്യോമതാവളത്തിൽനിന്ന് നിരവധി വിമാനങ്ങൾ അടിയന്തരമായി മാറ്റി. പശ്ചിമേഷ്യയിൽ ഇറാനുമായുള്ള സംഘർഷം വീണ്ടും രൂക്ഷമാകാനുള്ള സാധ്യത നിലനിൽക്കുന്നതിനിടെയാണ് അമേരിക്കയുടെ ഈ നീക്കം അന്താരാഷ്ട്ര തലത്തിൽ ശ്രദ്ധ നേടുന്നത്.

ഇറാന്റെ ഭാഗത്തുനിന്ന് പുറത്തുവന്ന ഏറ്റവും പുതിയ പ്രഖ്യാപനം അമേരിക്കയെയും യൂറോപ്പിനെയും ഒരുപോലെ ആശങ്കയിലാക്കുന്നതാണ്. ഇതുവരെ ബാലിസ്റ്റിക് മിസൈലുകളുടെ ദൂരപരിധി 2,000 കിലോമീറ്ററായി സ്വയം പരിമിതപ്പെടുത്തിയിരുന്ന ഇറാൻ, ആ നിയന്ത്രണം നീക്കിയതായി പ്രഖ്യാപിച്ചിരിക്കുകയാണ്. ഇനി മിസൈലുകളുടെ ദൂരപരിധിക്ക് നിയന്ത്രണമുണ്ടാകില്ലെന്ന ഇറാന്റെ സൈനിക നേതൃത്വത്തിന്റെ പ്രഖ്യാപനം പശ്ചിമേഷ്യയ്ക്ക് പുറത്തേക്കും ഭീഷണി വ്യാപിക്കുമെന്ന ആശങ്ക ഉയർത്തുന്നു. എന്നാൽ 2,000 കിലോമീറ്ററിലധികം ദൂരത്തിൽ സഞ്ചരിക്കാൻ ശേഷിയുള്ള മിസൈലുകൾ ഇറാൻ നിലവിൽ വികസിപ്പിച്ചിട്ടുണ്ടെന്നതിന് സ്ഥിരീകരണമില്ല. ഈ സാഹചര്യത്തിലാണ് ബ്രിട്ടനിലെ അമേരിക്കൻ സൈനിക താവളങ്ങളിൽനിന്ന് യുദ്ധവിമാനങ്ങൾ ഉൾപ്പെടെയുള്ള സൈനിക വിമാനങ്ങൾ മാറ്റാനുള്ള നീക്കം ശ്രദ്ധേയമാകുന്നത്.

ബ്രിട്ടനിലെ സഫോൾക്ക് മേഖലയിലുള്ള റോയൽ എയർഫോഴ്സിന്റെ മിൽഡൻഹാൾ വ്യോമതാവളത്തിൽനിന്നാണ് അമേരിക്കൻ സൈനിക വിമാനങ്ങൾ മാറ്റിയത്. നവംബർ ഒൻപത് തിങ്കളാഴ്ചയാണ് വിമാനങ്ങൾ മറ്റ് കേന്ദ്രങ്ങളിലേക്ക് മാറ്റിയതെന്നാണ് റിപ്പോർട്ടുകൾ. രണ്ട് അമേരിക്കൻ ഇന്ധനം നിറയ്ക്കൽ വിമാനങ്ങൾ ആദ്യം ജർമനിയിലേക്ക് വഴിതിരിച്ചുവിട്ടു. പിന്നാലെ കൂടുതൽ വിമാനങ്ങളും ജർമനിയിലേക്കും മറ്റ് സ്ഥലങ്ങളിലേക്കും മാറ്റി.

വിമാനങ്ങളുടെ നീക്കം സംബന്ധിച്ച ഫ്ലൈറ്റ് ട്രാക്കിങ് വിവരങ്ങൾ പരിശോധിച്ചപ്പോൾ ഒൻപത് ഇന്ധനം നിറയ്ക്കൽ വിമാനങ്ങളും മൂന്ന് ഓസ്പ്രേ വിമാനങ്ങളും മിൽഡൻഹാൾ താവളം വിട്ടതായി കണ്ടെത്തിയെന്നാണ് സ്കൈ ന്യൂസിന്റെ റിപ്പോർട്ട്. ബോയിങ് കെസി-135 സ്ട്രാറ്റോടാങ്കർ വിഭാഗത്തിൽപ്പെട്ടവയാണ് ഇന്ധനം നിറയ്ക്കൽ വിമാനങ്ങൾ. ഇവയിൽ ഭൂരിഭാഗവും ജർമനിയിലെയും സ്പെയിനിലെയും വ്യോമതാവളങ്ങളിലേക്ക് മാറ്റിയപ്പോൾ ഒരെണ്ണം സ്കോട്ട്ലൻഡിലെ പ്രസ്റ്റ്വിക്കിലെത്തി. മൂന്ന് ഓസ്പ്രേ വിമാനങ്ങൾ ബ്രിട്ടനിലെ തന്നെ ലേക്കൻഹീത്ത് താവളത്തിലേക്കാണ് മാറ്റിയത്.

ഇതിനൊപ്പം മിൽഡൻഹാൾ, ലേക്കൻഹീത്ത് എന്നീ രണ്ട് അമേരിക്കൻ സൈനിക കേന്ദ്രങ്ങളിലും സുരക്ഷാ മുന്നറിയിപ്പ് ഉയർത്തിയിട്ടുണ്ട്. ഫോഴ്സ് പ്രൊട്ടക്ഷൻ കണ്ടീഷൻ ചാർലി എന്ന സുരക്ഷാ നിലയിലേക്കാണ് മാറ്റം. അമേരിക്കൻ പ്രതിരോധ വകുപ്പിന്റെ സുരക്ഷാ സംവിധാനത്തിലെ രണ്ടാമത്തെ ഉയർന്ന ജാഗ്രതാ നിലയാണിത്. ഭീകരാക്രമണ സാധ്യതയുണ്ടെന്ന് രഹസ്യാന്വേഷണ വിവരങ്ങൾ സൂചിപ്പിക്കുമ്പോഴാണ് ഈ നില പ്രാബല്യത്തിൽ വരുന്നത്.

എന്നാൽ ഇറാനിൽനിന്നുള്ള ഭീഷണിയുടെ കൃത്യമായ സ്വഭാവം എന്താണെന്ന കാര്യത്തിൽ വ്യക്തതയില്ല. ആക്രമണം ഉടൻ ഉണ്ടാകുമെന്നാണോ അതോ പൊതുവായ സുരക്ഷാ ഭീഷണിയാണോ എന്നതും അമേരിക്കൻ ഉദ്യോഗസ്ഥർക്കിടയിൽ ചർച്ചയിലാണെന്നാണ് പുറത്തുവരുന്ന വിവരം.

അതേസമയം, വിമാനങ്ങൾ മാറ്റിയതിനെക്കുറിച്ച് ഔദ്യോഗികമായി വിശദമായ പ്രതികരണം നൽകാൻ അമേരിക്കൻ വ്യോമസേന തയ്യാറായിട്ടില്ല. പ്രവർത്തനപരമായ ആവശ്യങ്ങൾക്കനുസരിച്ച് വിമാനങ്ങളും മറ്റ് സൈനിക സംവിധാനങ്ങളും വിവിധ താവളങ്ങൾക്കിടയിൽ പതിവായി മാറ്റാറുണ്ടെന്നാണ് അമേരിക്കൻ വ്യോമസേനയുടെ വിശദീകരണം. മറ്റ് രാജ്യങ്ങളുടെ സൈനിക നീക്കങ്ങളെക്കുറിച്ച് പതിവായി പ്രതികരിക്കാറില്ലെന്നും പ്രവർത്തന ആവശ്യങ്ങൾക്കനുസരിച്ച് വിമാനങ്ങൾ മാറാറുണ്ടെന്നും ബ്രിട്ടീഷ് പ്രതിരോധ മന്ത്രാലയവും അറിയിച്ചു.

ബ്രിട്ടനിലെ അമേരിക്കൻ സൈനിക താവളങ്ങളിൽ സുരക്ഷാ ആശങ്ക ഉയരുന്നത് ഇതാദ്യമല്ല. കഴിഞ്ഞ സെപ്റ്റംബറിൽ തെക്കുപടിഞ്ഞാറൻ ഇംഗ്ലണ്ടിലെ ആർഎഎഫ് ഫെയർഫോർഡ് വ്യോമതാവളത്തിന് സമീപമുണ്ടായ സുരക്ഷാ സംഭവത്തെത്തുടർന്ന് അഞ്ച് പേരെ അറസ്റ്റ് ചെയ്തിരുന്നു. പിന്നീട് ഇറാനിയൻ രഹസ്യാന്വേഷണ വിഭാഗത്തെ സഹായിച്ചെന്ന സംശയത്തിൽ രണ്ടുപേരെക്കൂടി അറസ്റ്റ് ചെയ്തു. ഈ സംഭവവുമായി ബന്ധപ്പെട്ട് ഇറാന്റെ പങ്കിനെക്കുറിച്ച് ആരോപണങ്ങൾ ഉയർന്നെങ്കിലും ഇറാൻ അത് നിഷേധിച്ചിരുന്നു.

തുടർന്ന് ഫെയർഫോർഡ് താവളത്തിൽ വിന്യസിച്ചിരുന്ന അമേരിക്കയുടെ ബി-1 ബോംബർ വിമാനങ്ങൾ സുരക്ഷാ കാരണങ്ങളാൽ പിൻവലിച്ചു. ഇറാനെതിരായ ആക്രമണങ്ങൾക്ക് ഉപയോഗിച്ചിരുന്ന പ്രധാന കേന്ദ്രങ്ങളിലൊന്നായിരുന്നു ഈ വ്യോമതാവളം.

അമേരിക്കയുടെ ആക്രമണങ്ങൾ തുടർന്നാൽ പശ്ചിമേഷ്യയ്ക്ക് പുറത്തേക്കും തിരിച്ചടി വ്യാപിപ്പിക്കുമെന്ന മുന്നറിയിപ്പ് ഇറാൻ നേരത്തേ നൽകിയിട്ടുണ്ട്. അമേരിക്കൻ താൽപര്യങ്ങൾക്കും സൈനിക കേന്ദ്രങ്ങൾക്കും ഭീഷണി ഉയർത്തുന്ന തരത്തിലുള്ള പ്രസ്താവനകളും ഇറാന്റെ ഭാഗത്തുനിന്നുണ്ടായി.

ഇതിനിടെ ഇറാനുമായുള്ള സംഘർഷം വീണ്ടും യുദ്ധത്തിലേക്ക് നീങ്ങുമോ എന്ന ആശങ്കയും ശക്തമാണ്. അമേരിക്കൻ പ്രസിഡന്റ് ഡോണൾഡ് ട്രംപ് ഇറാനെതിരായ പുതിയ സൈനിക നടപടിയുടെ ആവശ്യം ഇപ്പോൾ കാണുന്നില്ലെന്ന സൂചന നൽകിയിരുന്നു. എന്നാൽ സാഹചര്യം മാറിയാൽ പ്രതികരിക്കാൻ അമേരിക്ക തയ്യാറാണെന്നും വ്യക്തമാക്കിയിട്ടുണ്ട്.

യുദ്ധം ഒഴിവാക്കാനുള്ള നയതന്ത്ര നീക്കങ്ങൾക്കിടയിലും ബ്രിട്ടനിലെ സൈനിക താവളങ്ങളിൽ സുരക്ഷ ശക്തമാക്കുകയും വിമാനങ്ങൾ മാറ്റുകയും ചെയ്ത അമേരിക്കയുടെ നടപടി മറ്റൊരു സൂചനയാണ് നൽകുന്നത്. ഇറാനിൽനിന്നുള്ള ഭീഷണിയെ വാഷിങ്ടൺ എത്രത്തോളം ഗൗരവത്തോടെയാണ് കാണുന്നതെന്ന ചോദ്യമാണ് ഇപ്പോൾ ഉയരുന്നത്. പശ്ചിമേഷ്യയിൽ വീണ്ടും യുദ്ധസാഹചര്യം രൂപപ്പെടുമോ എന്ന ആശങ്കയോടെ ലോകം ഈ നീക്കങ്ങൾ നിരീക്ഷിക്കുകയാണ്.