ഹസീനയ്ക്ക് പാസ്‌പോര്‍ട്ട് അനുവദിക്കാന്‍ കഴിയില്ലെന്നും ബംഗ്ലാദേശ്
ഇന്ത്യയും ബംഗ്ലാദേശും തമ്മിലുള്ള നിലവിലെ കുറ്റവാളികളെ കൈമാറുന്ന കരാര്‍ പ്രകാരം ഷെയ്ഖ് ഹസീനയെ കൈമാറണമെന്നാണ് ബംഗ്ലാദേശ് സര്‍ക്കാര്‍. ഹസീനയുടെ പാസ്‌പോര്‍ട്ട് പുതുക്കാനുള്ള നീക്കത്തിന് അനുമതി നിഷേധിച്ചിരിക്കുകയാണ് ബംഗ്ലാദേശ് സര്‍ക്കാര്‍. അതേസമയം, ഹസീനയെ ഇന്ത്യയില്‍ നിന്ന് വിട്ടുകിട്ടണമെന്ന ആവശ്യം വീണ്ടും ആവര്‍ത്തിക്കുകയാണ് ബംഗ്ലാദേശ്. ഹസീനയുടെ നീക്കത്തെ വെറും നാടകമെന്നും സര്‍ക്കാര്‍ പരിഹസിച്ചു. തീവ്രവാദ പ്രവര്‍ത്തനങ്ങളില്‍ ഏര്‍പ്പെട്ടവര്‍ക്ക് പാസ്‌പോര്‍ട്ട് അനുവദിക്കാന്‍ കഴിയില്ലെന്നും ബംഗ്ലാദേശ് അധികൃതര്‍ അറിയിച്ചു.
ബംഗ്ലാദേശ് വിദേശകാര്യ സഹമന്ത്രി ഹുമയൂണ്‍ കബീറാണ് ഇക്കാര്യം വ്യക്തമാക്കിയത്. വധശിക്ഷയ്ക്ക് വിധിക്കപ്പെട്ട ഹസീനയ്ക്ക് പുതിയ പാസ്‌പോര്‍ട്ട് അനുവദിക്കുന്ന കാര്യം പരിഗണനയിലില്ലെന്നും അദ്ദേഹം പറഞ്ഞു. ഹസീനയ്ക്ക് പുതിയ പാസ്‌പോര്‍ട്ടും തിരിച്ചറിയല്‍ രേഖയും അനുവദിക്കണമെന്ന് ആവശ്യപ്പെട്ട് അഭിഭാഷകര്‍ മുഖേന ഡല്‍ഹിയിലെ ബംഗ്ലാദേശ് ഹൈക്കമ്മിഷനെ സമീപിച്ചതായി റിപ്പോര്‍ട്ടുകള്‍ പുറത്തുവന്നതിന് പിന്നാലെയായിരുന്നു ബംഗ്ലാദേശ് സര്‍ക്കാരിന്റെ പ്രതികരണം. തിങ്കളാഴ്ചയാണ് അപേക്ഷ സമര്‍പ്പിച്ചതെന്നാണ് വിവരം.
ഡിസംബറില്‍ ബംഗ്ലാദേശിലേക്ക് മടങ്ങുമെന്ന കാര്യത്തില്‍ മാറ്റമില്ലെന്ന് ഹസീന നേരത്തേ വ്യക്തമാക്കിയിരുന്നു. നാട്ടിലെത്തിയാല്‍ അറസ്റ്റിലാകാന്‍ സാദ്ധ്യതയുണ്ടെങ്കിലും മടങ്ങാനുള്ള തീരുമാനത്തില്‍ നിന്ന് പിന്നോട്ടില്ലെന്ന് ഹസീന പറഞ്ഞു. ബംഗ്ലാദേശില്‍ തിരിച്ചെത്തിയാല്‍ കോടതിയില്‍ കീഴടങ്ങാനും ഹസീന തയ്യാറാണെന്നാണ് റിപ്പോര്‍ട്ടുകള്‍. ആവശ്യമായ ഔദ്യോഗിക നടപടികള്‍ പൂര്‍ത്തിയായശേഷം മടക്കയാത്രയുടെ കൃത്യമായ തീയതി പ്രഖ്യാപിക്കുമെന്ന് ഹസീനയുമായി ബന്ധപ്പെട്ട വൃത്തങ്ങള്‍ വ്യക്തമാക്കിയിട്ടുണ്ട്. സ്വന്തം ജനതയില്‍ നിന്ന് അകന്ന് കഴിയുന്നതിനേക്കാള്‍ സ്വന്തം നാട്ടില്‍ മരണം വരിക്കാനാണ് താത്പര്യമെന്നും ഹസീന നേരത്തേ പറഞ്ഞിരുന്നു.
https://www.facebook.com/Malayalivartha
